1Kia oti akera a Iēsū i te tuatua'anga, kua 'akaruke atura aia i a Galilea, e tomo atura ki roto i te kōtinga 'enua o Iūdea ki tērā tua mai i Iōrīdāna.
2'E ma'ata rāi te urupū tangata tei āru mai i aia, ē kua 'akaora aia i tō rātou au maki i reira.
3Kua 'aere mai ēta'i Phārīsea ki a Iēsū i te tīmata i aia i te nā kō'anga ē, “'E tika āina i te tāne kia kōpae atu i tāna va'ine nō te au tumu katoa ra?”
4 Gen 1.27; 5.2 Kua pa'u atura a Iēsū, “Kāre āina kōtou i tatau ē, ko tei 'anga i a rāua i muatangāna ‘i 'anga i a rāua i te tāne ē te va'ine?’
5Gen 2.24Ē kua tuatua akera aia, ‘Nō reira e 'akaruke ei te tangata i te metua tāne ē te metua va'ine, ē ka tōpiri atu ei ki tāna va'ine, ē ka riro 'oki rāua 'ei kōpapa 'okota'i.’
6Ē pērā kōtou rāi, kāre rāua 'e tokorua 'aka'ou, 'e kōpapa 'okota'i rā. Ē tā te Atua i kāpipiti ra, auraka te tangata e 'akatakakē atu.”
7 Deut 24.1-4; Māt 5.31 Kua ui maira te au Phārīsea ki aia, “'E a'a i'ora a Mōse i 'akaue mai ei, e 'ō ake atu i tēta'i tuatua kōpae, ka tuku atu ei i aia?”
8Kua pa'u atura a Iēsū ki a rātou, “Nō te mārōketaketa o tō kōtou ngākau i 'akatika mai ei a Mōse i te kōpae atu i tā kōtou au va'ine; kāre rā i pērā i muatangāna.
9Māt 5.32; 1 Kōr 7.10,11Ē tē 'akakite atu nei au ki a kōtou, ko tei kōpae atu i tāna va'ine, māri 'ua nō te 'akaturi, ka 'akaipoipo ei i tēta'i, kua 'akaturi ia.”
10Kua tuatua maira te au pipi ki a Iēsū, “Mē ko te 'ākono'anga te reira o te tāne ki te va'ine, 'e ngari ake kia kore e 'akaipoipo.”
11Kua karanga atura aia ki a rātou, “Kāre i te au tangata rava rāi e tika kia 'āriki mai i tēianei tuatua, māri rā i a rātou tei 'ōronga'ia atu.
12'E au 'eunuka 'oki tēta'i, 'e au 'eunuka rātou mei te 'ānau'anga mai nō roto mai i te kōpū o te metua va'ine; 'e au 'eunuka tēta'i tei 'aka'eunuka'ia e te tangata, ē 'e au 'eunuka tēta'i tei 'aka'eunuka i a rātou 'ua'orāi nō te bāsileia o te ao ra. Ko tei tika i aia i te 'āriki, kia 'akapērā aia.”
Ko Iēsū ē te au tamariki(Māreko 10.13-16; Luka 18.15-17)13I reira i 'apaina'ia maira te tamariki meariki ki a Iēsū, kia tuku aia i tōna rima ki runga a'o i a rātou ē kia pure. Kua kauvae atura rā te au pipi i a rātou.
14Inārā, kua karanga atura a Iēsū, “Ka tuku mai ana i te tamariki meariki, ē auraka e ārai i a rātou i te 'aere mai ki āku nei, nō te mea, nō te tangata 'oki mei a rātou nei te bāsileia o te ao ra.”
15Ē kua tuku atura aia i tōna rima ki runga a'o i a rātou, ē kua 'aere atura mei te reira ngā'i.
Te tangata 'apinga nui(Māreko 10.17-31; Luka 18.18-30)16Ē inā, kua 'ārāvei mai tēta'i tangata i a Iēsū ē tuatua maira ki aia, “E te Pū'āpi'i ē, 'e a'a te mea meitaki tāku ka rave e rauka ai i āku te ora mutukore?”
17Kua pa'u atura a Iēsū ki aia, “'E a'a koe e ui mai ei ki āku nō runga i te meitaki? Ko te Atua anake 'ua te meitaki! Kia 'inangaro koe i te tomo ki roto i te ora, e 'ākono i te au 'akaue'anga.”
18 a: Exo 20.13; Deut 5.17; b: Exo 20.14; Deut 5.18; c: Exo 20.15; Deut 5.19; d: Exo 20.16; Deut 5.20 Kua ui maira taua tangata ra, “I tē'ea?”
Kua pa'u atura a Iēsū, “Ko tēia 'oki: ‘Auraka e tā 'ua, auraka e 'akaturi, auraka e keiā, auraka koe kia riro 'ei kite pikika'a,
19a: Exo 20.12; Deut 5.16; b: Lev 19.18e 'akangāteitei i tō metua tāne ē tō metua va'ine.’ Ē pērā katoa: ‘E aro'a atu i tō tangata tupu mei a koe 'ua'orāi.’ ”
20Kua tuatua maira te tangata 'ōu ra ki aia, “Kua 'ope pou roa te reira i te 'ākono'ia e au. 'E a'a 'ua te mea toe i āku?”
21Kua pa'u atura a Iēsū ki aia, “Kia 'inangaro koe ē kia meitaki rava, ka 'aere, ka 'oko i tō'ou au 'apinga, ka 'apai atu ei nā te puta'ua, ē 'e 'apinga tā'au i reira i te rangi. Ka 'aere mai ei, ka āru mai i āku.”
22Kia 'akarongo maira te tangata 'ōu ra i te reira tuatua, kua 'aere kē atura aia ma te auē, nō te mea, 'e 'apinga ma'ata 'oki tōna.
23Kua 'akakite atura a Iēsū ki tāna au pipi, “Koia mou tāku e karanga atu ki a kōtou na, e 'akaō ngatā te tangata 'apinga nui ki roto i te bāsileia o te ao ra.
24Tē 'akakite 'aka'ou atu nei au ki a kōtou, e 'akaō ngō'ie ake te kāmela nā roto i te putā nira i tēta'i tangata 'apinga nui kia 'akaō ki roto i te bāsileia o te Atua.”
25I te 'akarongo'anga te au pipi kua vā ma'ata rava rātou nā kō akera, “Ko 'ai i reira te ka 'akaora'ia?”
26Kua 'ākara atura a Iēsū ki a rātou ē kua nā kō atura, “Kāre ia 'e rauka i te tangata nei. 'E rauka rā te au mea kātoatoa i te Atua.”
27I reira kua tuatua maira a Pētero ki aia, nā kō maira, “Inā mātou, kua 'akaruke mātou i te au mea katoa ē kua āru mai i a koe. 'E a'a te ka rauka i a mātou?”
28 a: Māt 25.31; b: Luk 22.30 Kua pa'u atura a Iēsū ki a rātou, “Koia mou tāku e karanga atu ki a kōtou tei āru mai i āku nei, kia no'o te Tamaiti a te Tangata ki runga i tōna terōno kakā i te tuātau 'aka'ōu'anga ra, e no'o katoa kōtou ki runga i te au terōno e ta'i nga'uru mā rua e 'akavā i te au kōpū o Īserā'ela e ta'i nga'uru mā rua ra.
29Ē tēta'i 'ua atu tangata tei 'akaruke i te ngutu'are, te au taeake, te au tua'ine, te metua tāne, te metua va'ine, te tamariki, mē kāre te au kāinga nō tōku nei ingoa, e 'ānere 'ua atu tāna ka rauka, ē e rauka 'oki i aia te ora mutukore.
30Māt 20.16; Luk 13.30Ka riro rā i tō mua 'e mānganui 'ei 'openga, ē te 'openga ra 'ei nō mua ia.”
Who We AreWhat We EelieveWhat We Do
2025 by iamachristian.org,Inc All rights reserved.
