Mātaio 8 - Cook Island Maori Revised New Testament(CIMRNT)

Te 'akaora'anga a Iēsū i tēta'i tangata lēpera(Māreko 1.40-45; Luka 5.12-16)

1Ē i a Iēsū i 'eke mai mei te maunga maira, ma te urupū ma'ata katoa i te āru'anga mai i aia,

2inā kua 'aere maira tēta'i lēpera, tīpapa maira ki raro ki mua i aia, nā kō maira, “E te 'Atu, mē ka tika i a koe na, kia mā au i a koe.”

3Ē kua 'akatoro maira a Iēsū i tōna rima, 'akatūkia atura i aia, nā kō atura, “Kua tika ia i āku, kia mā koe.” Mā atura te lēpera nōna i reira rāi.

4Lev 14.1-32Ē kua karanga atura a Iēsū ki aia, “Auraka rava koe e 'akakite ki tēta'i 'ua atu tangata. Ka 'aere rā, e 'akaāri i a koe 'ua'orāi ki te ta'unga ra, e 'apai atu i te tao'ongā rima i 'akaue'ia mai e Mōse ra 'ei 'akakite'anga atu ki a rātou.”

Tē 'akaora nei a Iēsū i te tāvini o te rangatira 'ānere(Luka 7.1-10)

5E tae atura a Iēsū ki Kāperenāuma, kua 'aere maira tēta'i rangatira 'ānere ki aia, ē kua pati 'akatenga maira,

6nā kō maira, “E te 'Atu, kua maki taku tāvini, ē tē vai 'akangoru 'ua ra i te ngutu'are, kua ma'ata rava tōna mamae.”

7Ē kua karanga atura a Iēsū, “E 'aere atu au e 'akaora i aia.”

8Ē kua pa'u maira te rangatira 'ānere, nā kō maira, “E te 'Atu, kāre au e tau kia tomo mai koe ki roto i taku 'are. Inārā, e tuatua 'ua mai koe i tēta'i tuatua, ka ora'ia taku tāvini i reira.

9Ko au katoa nei 'oki, tei raro ake au i te mana o tēta'i kē, 'e au va'e'au rāi tō raro ake i āku. Ē kia 'akakite au ki tēta'i, ‘Ka 'aere!’, kua 'aere ia; ē ki tēta'i, ‘Ka 'aere mai!’, kua 'aere mai ia; ē ki taku tāvini, ‘E rave koe i tēia!’, ē tē rave nei aia i te reira.”

10E 'akarongo akera a Iēsū i te reira, vā 'ua i'ora aia, ē kua tuatua atura ki te aronga i āru mai i aia, “Koia mou tāku e karanga atu ki a kōtou na, kāre rāi au i kite i tēia tū 'akarongo nei i Īserā'ela nei.

11Luk 13.29E 'akakite atu rā au ki a kōtou, 'e mānganui te ka 'aere mai mei te 'itinga ē te 'opunga o te rā, ē ka no'o katoa rātou ko Āberahāma ē ko Īsā'aka ē ko Iākōba i roto i te bāsileia o te ao ra;

12Māt 22.13; 25.30; Luk 13.28kāreka te tamariki bāsileia ra, e 'uri'ia ki va'o i te pōiri ra, tei reira te auē ē te pākati'angā ni'o ra.”

13Ē kua tuatua atura a Iēsū ki taua rangatira 'ānere ra, “Ka 'aere, ē mei tā'au i 'irinaki ra, tē pērā katoa'ia nei ki a koe.”

Ē e ora atura taua tāvini nōna i te reira ora tikāi.

Tē 'akaora nei a Iēsū 'e ma'ata te tangata(Māreko 1.29-34; Luka 4.38-41)

14Ē tē tomo maira a Iēsū ki roto i te 'are o Pētero, 'ākara atura aia i tōna metua 'ōngai va'ine tē 'aka'āvai 'ua ra, kua mate i te vera.

15Ē kua 'akatūkia atura a Iēsū i tōna rima, ē peke atura te vera. E tū akera taua va'ine ra ki runga, mātuāpuru maira i a Iēsū.

16E a'ia'i i'ora, kua 'apai maira rātou ki a Iēsū i te aronga 'e mānganui ra i uru'ia e te dēmoni, ē kua tuaru atura aia i taua au vaerua ra ki tēta'i tuatua 'ua. Ē kua 'akaora i te aronga maki katoa ra.

17Isa 53.4Tupu atura te tuatua a Īsaia peroveta ra, ka nā kō maira ē, “Nāna 'ua'orāi i rave atu i tō tātou au 'āpikepike, ē kua 'apai aia i tō tātou au mate.”

Te tū tāvaita'i i te āru i a Iēsū(Luka 9.57-62)

18Kia 'ākara akera a Iēsū ē, kua kako aia i te tangata 'e mānganui, kua 'akaue atura aia ē kia 'oe atu ki tēta'i tua mai o te roto.

19Kua 'aere mai tēta'i Pū'āpi'i Ture, nā kō maira ki aia, “E te Pū'āpi'i, e āru atu au i a koe i tō'ou au 'aerenga katoa.”

20Kua pa'u atura a Iēsū ki aia, “'E ana tō te suoli, 'e kō'anga tō te au manu o te reva, kāreka te Tamaiti a te Tangata nei, kāre ōna 'e urunga ūpoko.”

21Kua tuatua maira tēta'i o tāna au pipi ki aia, “E te 'Atu, e tuku koe i āku kia 'aere au nā mua e tanu i taku metua tāne.”

22Kua pa'u atura a Iēsū ki aia, “Āru mai i āku! E vai'o atu nā tei mate e tanu i tō rātou i mate ra.”

Tō Iēsū 'akamarino'anga i te 'uri'ia(Māreko 4.35-41; Luka 8.22-25)

23'Aere atura a Iēsū ki runga i te poti, ē kua āru atura tāna au pipi i aia.

24Ē inā, kua tupu maira tēta'i 'uri'ia ma'ata i taua roto ra, ē ngaromia i'ora te poti e te kāre, inārā tē moe ra a Iēsū.

25'Akavaitata atura tāna au pipi e 'akaara i aia, nā kō atura, “E te 'Atu, e 'akaora i a mātou! Ka maremo mātou!”

26Kua pa'u maira aia ki a rātou, “'E a'a kōtou i mataku ei, e te aronga 'akarongo meangiti nei?” Tū akera aia ki runga, kauvae atura i te matangi ē te tai, ē marino ma'ata rava akera.

27Vā 'ua i'ora taua au tangata ra, ē ui atura, “'E a'a 'ua te tū o tēianei tangata, i 'akarongo ei te matangi ē te tai i aia?”

Te 'akaora'anga a Iēsū i ngā tangata tokorua tei uru'ia e te au dēmoni(Māreko 5.1-20; Luka 8.26-39)

28E tae atura a Iēsū ki tēta'i tua o te roto i te 'enua o tō Gerāsini, kua 'ārāvei maira i aia 'e tokorua tangata tei uru'ia e te au dēmoni mei roto mai i te au mēnema ra, 'e ngā tangata tā'ae 'oki, kāre 'ua 'e tangata e tae i te 'aere nā reira.

29Ē inā, kua kāpiki 'ua maira rāua ra, nā kō maira, “'E a'a tā'au i a māua nei, e te Tamaiti a te Atua ra? I 'aere mai āinei koe e tāmamae i a māua i mua ake i te tuātau tikāi?”

30Ē tei tēta'i ngā'i mamao akera i a rātou tēta'i 'ānana puaka ma'ata ra tē kai ra i te kai.

31Kua kaku maira te au dēmoni ki a Iēsū, nā kō maira, “Kia tuaru koe i a mātou ki va'o, e tuku ake koe i a mātou ki roto i tērā ra 'ānana puaka.”

32Kua karanga atura a Iēsū, “'Aere!” Kua 'aere atura rātou ki va'o, tomo atura ki roto i te au puaka ra. Ē inā, 'oro viviki 'ua atura taua 'ānana katoa ra ki raro nā te ngā'i pā'eke'eke ra ē ki roto rava i te roto ra, mate atura i roto i te vai.

33'Ati i'ora te aronga tiaki, ē 'aere atura ki roto i te 'ōire, 'akakite 'aere atura i te au mea katoa tei tupu ki ngā tangata dēmoni ra.

34Ē inā, kua 'aere maira taua 'ōire katoa ra kia 'ārāvei i a Iēsū. E kite maira rātou i aia, kua 'akateni maira kia 'aere kē atu aia mei tō rātou 'enua.