Ephesia 1 - Cook Island Maori Revised New Testament(CIMRNT)

Te aro'a'anga

1 Anga 18.19-21; 19.1 Ko au, ko Paulo, 'e 'āpōsetolo nā te Mesia ra, nā Iēsū, nō te anoano o te Atua ra, tē tātā atu nei au ki te aronga tapu i Ēphēsia na tei 'ākono meitaki i tō rātou piri'anga ki te Mesia ra i a Iēsū.

2Kia 'ōronga 'ua mai te Atua tō tātou Metua ē te 'Atu ko Iēsū Mesia i te aro'a 'ua ē te 'au ki a kōtou.

Te au 'akameitaki'anga vaerua nā roto i te Mesia

3Kia 'akameitaki'ia te Atua, ko te Metua o tō tātou 'Atu ra ko Iēsū Mesia, ko tei 'akameitaki mai i a tātou nei ki te au tū 'akameitaki'anga vaerua rava rāi i te ao ra nā roto i te Mesia ra.

4Ko te Atua 'oki tei 'iki i a tātou nōna 'ua'orāi nā roto i te Mesia ra, 'ōu te 'akamata'anga o tēianei ao, kia riro mai tātou 'ei aronga tapu ē te 'apakore i mua i tōna aroaro.

5Nō tōna aro'a 'oki kua 'ākono mamao te Atua i a tātou kia riro tātou 'ei tamariki rave nāna 'ua'orāi nā roto i a Iēsū Mesia ra, mei tei tau ki tōna anoano tākinga meitaki.

6Kia 'akapa'apa'a'ia te kakā o tōna aro'a 'ua tāna i riringi ma'ata rava mai ki a tātou nei i roto i tāna Tamaiti 'akaperepere'ia ra!

7 Kol 1.14 Nā roto i aia, nā roto i te 'akamaringi'anga i tōna toto i rauka ai i a tātou te rāvenga ora, koia 'oki, te 'akakore'anga i te au 'ara. Nō te ma'ata o te aro'a 'ua o te Atua,

8kua riringi 'ua mai aia i te reira ki runga i a tātou. I roto i tōna pakari ē te karape,

9kua 'akakite mai te Atua ki a tātou i te mea muna ngaro o tōna 'akakoro'anga tāna i anoano i te rave nā roto i te Mesia.

10Tēia taua 'akakoro'anga o te Atua ra: kia tā'okota'i'ia te au mea rava rāi, tō te rangi ē tō te ao katoa nei, i raro ake i te ūpoko 'okota'i, koia te Mesia. Ē nā te Atua e rave i te reira kia tae ki te tuātau tau tikāi.

11'Ei roto i te Mesia ra kua riro mai mātou 'ei aronga tu'anga, ko mātou tei 'ākono mamao'ia nō te 'akakoro'anga nāna, nā tei rave i te au mea kātoatoa kia tika i tō te Atua anoano,

12kia riro mai mātou nei, ko te aronga mua i te mānakonako i te Mesia, 'ei 'akapa'apa'a'anga i tōna kakā.

13Ē i roto i te Mesia kua 'akarongo katoa kōtou i te karere nō te tuatua mou, ko te tuatua meitaki 'oki ia o tō kōtou 'akaora'anga'ia, ē kua 'āriki kōtou i te reira ē kua 'akairo'ia kōtou e te 'Atu ki te Vaerua Tapu tāna i tuatua maira.

14Ko te Vaerua 'oki, ko te 'akapāpū'anga'ia ē, 'e aronga tu'anga tātou e tae 'ua atu ki te 'akarangatira'anga i tōna aronga tikāi, kia 'akapa'apa'a'ia tōna kakā.

Tā Paulo pure

15Nō reira, ko au nei, i tōku 'akarongo'anga i tō kōtou 'irinaki'anga i te 'Atu ra i a Iēsū ē tō kōtou aro'a i te aronga tapu katoa ra,

16kāre au e tīvata i te 'akameitaki i te Atua nō kōtou i te tā'iku'anga i a kōtou i tāku nei pure.

17Tē pati atu nei au ki te Metua nōna te kakā, ko te Atua o tō tātou 'Atu i a Iēsū Mesia, kia 'ōronga mai aia ki a kōtou i te Vaerua, te ka 'akariro i a kōtou 'ei aronga pakari, ē te ka 'akaāri mai ki a kōtou i te tū o te Atua kia kite kōtou i aia.

18Tē pati nei au kia mārama tō kōtou mata ngākau kia nakiro kōtou ē, 'e a'a tikāi te mānakonako'anga tei nā roto mai i tōna kāpiki'anga mai i a kōtou, 'e a'a te kakā ma'ata te ka riro 'ei tu'anga nā te aronga tapu ra;

19ē 'e a'a te ma'ata ē te 'āitekore o tō te Atua mana tei 'anga'anga nō tātou, te aronga tei 'irinaki i aia. E tau 'oki ia ki tāna rāvenga mana ririnui

20Sal 110.1tei 'anga'anga nō te Mesia ka 'akatū mai ei i aia mei te mate maira, ē 'akano'o i'ora i aia ki tōna rima katau i te ao ra,

21ki runga rava atu i te au manārangi, te au mea mana ē te mārōrō ē te au tūtara, ē ki runga katoa i te au ingoa rava rāi i 'aka'iki'ia nei, 'eia'a i tēianei ao anake 'ua, i te ao katoa rā ā muri atu.

22Sal 8.6

Kol 1.18Ē kua tuku te Atua i te au mea rava rāi ki raro i te vaevae o te Mesia, ē kua 'ōronga atu i aia ki te 'ēkālēsia 'ei ūpoko ki runga a'o i te au mea kātoatoa.

23Ko te 'ēkālēsia 'oki ko tōna kōpapa ia, ko te kī ia o te Mesia, ē nā te Mesia e 'akakī i te au mea rava rāi i te au ngā'i rava rāi.