1 Tesalōnia 3 - Cook Island Maori Revised New Testament(CIMRNT)

1 Anga 17.15 I te 'openga i'ora, kāre i rauka i a mātou i te 'akakoromaki 'aka'ou. Nō reira, kua manako mātou ē, 'e ngari ake kia no'o 'ua ko māua anake i Ātene.

2Ē kua 'akaunga atura māua i a Tīmōteo ki a kōtou, tō tātou taeake 'oki, ē tō te Atua tauturu nō te karere nō runga i te Mesia. Ka 'akamātūtū ē ka 'akamāro'iro'i aia i a kōtou i te pae o tō kōtou 'akarongo,

3kia ngāueuekore kōtou i roto i tō kōtou tākinga kino'anga. Kua nakiro 'oki kōtou ē, kua 'ākono'ia tātou e te Atua nō te reira.

4Nō te mea, i tō mātou no'o'anga ki ō kōtou na, kua 'akakite ātea 'ua mātou ē, ka tae mai te tākinga kino'anga, ē kua tupu rāi mei tā kōtou i kite.

5Nō taua tumu ra, kāre i rauka i āku i te 'akakoromaki 'aka'ou, ē kua tono i'ora au i a Tīmōteo ki a kōtou kia kite au i te tū o tō kōtou 'akarongo. Pēnei pa'a kua tāpikipiki'ia kōtou e te Tiāporo ē kua riro pa'a tā mātou au 'anga'anga 'ei mea pu'apingakore.

6 Anga 18.5 Kua 'oki mai a Tīmōteo i tēianei mei ko nā mai i a kōtou ē kua 'apai mai i te tuatua mataora ki a māua nō runga i tō kōtou 'akarongo ē tō kōtou aro'a'anga mai i a māua. Kua 'akakite mai aia ē, tē ma'ara meitaki maina rāi kōtou i a māua i te au 'ati'anga rava rāi, ē tē 'inangaro pakari nei kōtou i te 'ārāvei i a māua, mei a māua nei 'oki i a kōtou.

7Nō reira, e te au taeake ē, kua marū mai tō māua ngākau nō runga i a kōtou i roto i tō māua tū apiapi ē te manamanatā nō tō kōtou 'akarongo.

8'E ora'anga 'ōu ē te rekareka tō māua i tēianei i te kite'anga ē, tē mou mārie nei tō kōtou piri'anga ki te 'Atu.

9'E a'a 'oki i reira te 'akameitaki'anga tau tikāi tā tātou ka 'ōronga atu ki te Atua nō kōtou? Tē rekareka ma'ata roa nei 'oki mātou i mua i te aroaro o tō tātou Atua nō kōtou.

10Ē tē pati 'ua nei rāi mātou i te pō ē te ao kia 'ārāvei mātou i a kōtou, ē kia 'akarava mai 'oki i te ngā'i ngere o tō kōtou 'akarongo.

11Nā te Atua 'ua'orāi, tō tātou Metua, ē tō tātou 'Atu i a Iēsū e 'akate'ate'amamao i tō mātou mataara ki a kōtou!

12Kia 'ōronga mai te 'Atu kia ma'ata atu tō kōtou aro'a ē kia maringi 'ua atu te reira tēta'i ki tēta'i ē ki te tangata rava rāi, mei a mātou rāi e aro'a atu i a kōtou.

13Mē pērā kōtou, ka 'akamātūtū mai aia i tō kōtou ngākau kia tapu ē kia 'apakore kōtou i mua i te aroaro o te Atua tō tātou Metua, mē mama mai tō tātou 'Atu ra ko Iēsū ma te aronga tapu rava rāi nōna ra.