1'E au peroveta pikika'a tō roto i tō tātou 'iti tangata i muatangāna, ē ka tae katoa mai te au pū'āpi'i pikika'a i rotopū i a kōtou na. Ka 'āpi'i rātou i te karere tārevakē te ka riro mai 'ei mate tikāi. Ka kōpae rāi rātou i te 'Atu tei 'akaora i a rātou ra, ē ka 'apai mai i te mate viviki ki runga i a rātou 'ua'orāi.
2'E mānganui te tangata te ka āru i tā rātou au peu kanga. Ē nō rātou 'oki e 'akakino'ia ai te arāta'a o te tuatua mou ra.
3Nō tō rātou noinoi 'apinga i 'atu ei rātou i te au tua nō kōtou kia 'apinga'ia rātou. Ko tō rātou utunga tei 'akapapa'ia i ta'ito ra ka tae mai ia, ē tō rātou mate kāre ia i mamao.
4Kāre 'oki te Atua i 'akaperepere i te au 'āngela tei rave i te 'ara, kua titiri rā i a rātou ki roto i te pō, kia vai'o tāpeka'ia rātou ki te piri'anganaoa i roto i te pōiri e tae 'ua atu ki te 'akavā'anga.
5Gen 6.1—7.24Ē kāre katoa te Atua i 'akaperepere i tō te ao ta'ito ra, ka 'apai mai ei aia i te nina'anga o te vai puke ki tēianei ao 'ākonokore i te Atua. Kua 'akaora rā aia i a Noa, 'e karere 'oki ia nō te tuatua tika, ma ēta'i e toko'itu ra.
6Gen 19.24Kua 'akautunga katoa aia i ngā 'ōire ko Sodoma ē Gōmora, ē i 'akariro i a rāua 'ei re'u a'i. I pērā 'oki aia i te 'ōronga'anga mai i te 'ākara'anga nō te ka tupu ki te aronga 'ākonokore i te Atua i muri ake.
7Gen 19.1-16Kua 'akaora rā aia i a Lota, te tangata tuatua tika ra, ko tei tangi tōna ngākau nō te ora'anga kanga taukore o te aronga kino ra.
8Kua no'o 'oki taua tangata tuatua tika ra i rotopū i a rātou, ē kua mamae tōna ngākau tuatua tika ra i te 'ākara'anga ē te 'akarongo'anga atu i tā rātou 'anga'anga tikakore i tērā rā ē i tērā rā.
9Kua kite māri te 'Atu i te 'akaora i te aronga 'ākono Atua mei roto mai i te manamanatā ra, ē i te tāpū i te utunga nō te aronga tuatua tikakore e tae 'ua atu ki te rā 'akavā'anga,
10ē nā mua rā i a rātou tei 'ākono 'ua i tā te kōpapa ē te 'inangaro vi'ivi'i ra, ē tei 'akava'ava'a i te mana tūtara ra.
Ko taua au pū'āpi'i pikika'a ra, nō tō rātou matakukore i te Atua ē te mārō i tō rātou 'ua'orāi 'inangaro, kāre i mataku i te 'akakino atu i te au vaerua kakā i runga ra.
11Ko te au 'āngela rā tei ma'ata atu tō rātou mana ē te ririnui, kāre rava ia i tāpepe 'akakino atu i taua au vaerua kakā ra ki mua i te aroaro o te 'Atu ra.
12Kāreka tēia aronga nei, mei te au manu manakokore rāi rātou tei 'ānau 'ua'ia kia 'aru'ia ē kia tā'ia. Tē 'akakino nei 'oki rātou i te au mea kāre rātou i mārama. Ka mate rātou mei te au manu tā'ae rāi.
13'E aronga rave i te 'anga'anga tikakore rātou, ē ka rauka i a rātou te tūtaki nō te 'anga'anga tikakore. 'E mea rekareka nā rātou te 'anga'anga kanga i te ao ra. Kia tae mai rātou ki tā kōtou kaingākai ra, ka riro i a rātou mei te tōpata repo, ē 'ei mea 'akamā, nō tō rātou mareka'anga i tā rātou 'āpi'i'anga tāpikipiki.
14Tē 'ākara noinoi 'akaturi 'ua nei tō rātou mata; kāre rātou e ro'iro'i i te rave i te 'ara ē i te tā'ei i te aronga 'akarongo tinamoukore; 'e ngākau tō rātou i 'akamātau'ia nō te noinoi 'apinga, 'e tamariki tauma'a'ia 'oki rātou.
15Num 22.4-35Kua 'akaruke rātou i te mataara mou, ē kua 'aere kē atura i te āru'anga i te arāta'a o Bālaama a Beora, ko tei 'inangaro 'oki i te rave i te 'anga'anga tikakore nō te tūtaki.
16I kauvae'ia 'oki aia, i aia i rave ei i tāna 'ara. Nā te 'āsini mūrare 'oki i tuatua tangata mai, ē i 'akamutu i te 'anga'anga nēneva a taua peroveta ra.
17Mei te ruāvai vaikore ē te tumurangi 'uakore e peke 'aere 'ua i te matangi ma'ata taua au tangata ra. Ē i te pōiri tangotango tā rātou tu'anga e tuātau 'ua atu.
18Tē tuatua nei 'oki rātou i te tuatua 'akateitei ē te mārikongakore. Ē nā roto i te peu kanga ē te noinoi o te kōpapa ra tē 'akatā'ei nei rātou i te au tangata tei 'akaruke 'ua mai i te aronga e no'o i roto i te tārevakē.
19Tē papa'u nei 'oki rātou i te tū rangatira, ko rātou 'ua'orāi rā 'e au tuika'a ia nā te kino. Ko tā te tangata 'oki i vī 'ei ra, kua tuika'a aia nā te reira.
20Kia 'akaruke 'oki te au tangata i te vi'ivi'i o tēianei ao nā roto i te kite i tō tātou Atua ē te 'Akaora ko Iēsū Mesia, ē ka tā'ī'ī 'aka'ou rātou ki te reira ē ka vī rāi, 'e kino ma'ata 'ua atu tō rātou tūranga 'openga i tei muatangāna ra.
21'E meitaki ake i a rātou te kitekore tākiri i te arāta'a tuatua tika ra, i te 'āpi'i mai i te reira ē te 'akaruke i te 'akaue'anga tapu i tukuna'ia mai ki a rātou ra.
22Mase 26.11Ko tei tupu ki a rātou kua 'akaāri mai ia i te tika o tēia 'aka'āite'anga poto ē, “Kua 'oki te kurī ki tōna 'ua'orāi ruaki,” ē pērā katoa nō tēia, “Te tīnana puaka i tāmā'ia ra e takaviri 'aka'ou ki roto i te vari.”
Who We AreWhat We EelieveWhat We Do
2025 by iamachristian.org,Inc All rights reserved.
