Māreko 5 - Cook Island Maori Revised New Testament(CIMRNT)

Te 'akaora'anga a Iēsū i te tangata tei uru'ia e te au dēmoni(Mātaio 8.28-34; Luka 8.26-39)

1E tāpae atura a Iēsū ē tāna au pipi ki tērā atu pae o te roto i Galilea ra, i te 'enua ra o te Gerāsini.

2Ē kia 'akaruke aia i te poti ra, kua 'ārāvei maira i aia i reira rā tēta'i tangata i uru'ia e te vaerua vi'ivi'i nō roto mai i te au tanumanga ra.

3E no'o tāmou ana aia ki roto i taua au tanumanga ra; ē kāre rava 'e tangata e rauka kia tāpeka 'aka'ou i aia, ē kāre rāi 'oki ki te piri'anganaoa.

4I tāpeka putuputu'ia ana 'oki aia ki te 'āuri ē te piri'anganaoa. Kua motu rā te piri'anganaoa ē kua 'ati'ati te 'āuri i aia; ē kāre 'ua 'e tangata e rarata ai.

5E no'o tāmou ana aia i te maunga i te pō ē te ao, ē i roto i te au tanumanga ra, kāpiki 'aere 'ua ai ma te kotikoti i aia 'ua'orāi ki te toka.

6Ē kia 'ākara mai aia i a Iēsū i te ātea kē ra, kua 'oro maira, e 'akatopa maira ki mua i aia,

7ē kua kāpiki nui maira, “'E a'a tā'au i āku nei, e Iēsū, e te Tamaiti a te Atua Teitei? Tē pati atu nei au ki a koe i te ingoa o te Atua, auraka koe e tāmamae mai i āku.”

8I tuatua ana 'oki a Iēsū ki aia, “'Aere ki va'o, e tēnā na vaerua vi'ivi'i, mei tēnā na tangata!”

9Kua ui atura a Iēsū ki aia, “Ko 'ai tō'ou ingoa?”

Kua pa'u maira aia, “Ko Manotini tōku ingoa, 'e mānganui 'oki mātou.”

10Kua ma'ata 'ua mai tōna kaku'anga ki a Iēsū ē, auraka aia e tuaru kē atu i a rātou mei te reira 'enua atu.

11'E 'ānana puaka ma'ata tei reira i runga i te maunga e kaikai ra.

12Kua kaku maira te au dēmoni ki aia, nā kō maira, “E tuku koe i a mātou kia tomo ki roto i tērā ra 'ānana puaka.”

13Kua tuku atura a Iēsū i a rātou. 'Aere atura te au vaerua vi'ivi'i ra ki va'o, tomo atura ki roto i te au puaka. 'Oro atura taua 'ānana mei te rua tauatini nā te mato ki raro rava i taua roto ra, maremo tākiri atura.

14'Ati atura te aronga i 'āngai i te au puaka ra, 'akakite 'aere atura i roto i te 'ōire ē te au kāinga ra. Kua 'aere maira 'oki tō reira e 'ākara i taua mea ra.

15E tae maira rātou ki a Iēsū ra, kite maira i te tangata tei uru'ia e te dēmoni e manotini ra, i te no'o mārie'anga, ē kua kāka'u 'oki i te kāka'u, ē kua mārama 'aka'ou tōna manako, mataku akera rātou.

16Ē te aronga tei kite i tei rave'ia ki taua tangata dēmoni ra ē ki te 'ānana puaka ra 'oki, kua 'akakite atura ki a rātou tei 'aere mai.

17Kua kakukaku atura 'oki rātou i a Iēsū i reira ra kia 'aere kē atu aia mei tō rātou au tu'anga 'enua.

18Ē tei te 'aerenga mai a Iēsū ki runga i te poti, kua pati maira te tangata i uru'ia e te dēmoni ra kia āru katoa aia i a Iēsū.

19Kāre rā a Iēsū i 'akatika atu, inārā, kua nā kō atura ki aia, “Ka 'aere ki tō ngutu'are ki tō'ou taeake, e 'akakite atu ki a rātou i taua au mea kātoatoa tā te Atua i rave i'o nei, ē i tōna aro'a ki a koe.”

20'Aere atura aia, 'akakitekite 'aere atura ki Dēkāpoli katoa ra i te au mea katoa tā Iēsū i rave ki aia. Ūmeremere i'ora te tangata rava rāi.

Te tamā'ine a Iāiro ē te va'ine tei 'āmiri atu i te kāka'u o Iēsū(Mātaio 9.18-26; Luka 8.40-56)

21Ē kia 'oki 'aka'ou atura a Iēsū ki tēta'i pae o te roto nā runga i te poti, 'e urupū ma'ata tei 'uipā mai ki aia ra i te pae rāi o taua roto ra.

22Ē tē 'aere maira tēta'i tūtara o te sūnago, ko Iāiro te ingoa. E kite maira aia i a Iēsū, kua 'akatopa i'ora ki tōna pae vaevae,

23ē kua pati 'akatenga maira ki aia, nā kō maira, “Kua vaitata taku tamā'ine iti i te mate, e 'aere mai koe e tuku i tō rima ki runga a'o i aia kia meitaki aia ē ka ora'ia aia.”

24'Aere atura a Iēsū ma ia katoa; ē te au tangata 'e mānganui tē 'ōtotitoti maira i muringa a'o i aia.

25Ē tēta'i va'ine i reira, e rau nga'uru mā rua akera ōna mata'iti i te riu 'ua'anga.

26I rapakau'ia ana 'oki aia e te aronga rapakau ra 'e mānganui, kua pou rava tōna 'apinga, tē ma'ata 'ua atura tōna maki.

27Kua 'akarongo ana 'oki aia i te rongo o Iēsū, ē kua nā muri maira aia i te 'aere nā roto i te 'aerenga tangata ra. Kua 'akatūkia atura i tōna kāka'u,

28nā kō akera, “Kia 'akatūkia 'ua atu au i tōna kāka'u, ka ora'ia au.”

29Mao i'ora tōna riu i reira, ē kite i'ora aia ē, kua ora aia i taua maki nōna ra.

30Kite akera a Iēsū ē, 'e mana tei riro atu nō roto mai i aia i reira, kua 'āriu akera ki te 'aerenga tangata, nā kō akera, “Ko 'ai tei 'akatūkia mai i tōku kāka'u nei?”

31Kua nā kō maira tāna au pipi ki aia, “Tē kite mai nei koe i te tangata tini nei i te 'ōtoti'anga i a koe, ē ka ui mai koe ē, ‘Nā 'ai i 'akatūkia mai i āku?’ ”

32Kua 'akarau atura a Iēsū kia kite aia i aia i tei pērā maira.

33Kua 'aere maira taua va'ine ra ma te mataku ē te rūtetetete. Kua kite 'oki aia i te tūkē i 'akatupu'ia i roto i aia. Kua tīpapa i'ora ki raro ki mua i a Iēsū, kua 'a'aki 'ua maira i te tuatua mou.

34Kua karanga atura a Iēsū ki aia, “E taku tamā'ine, kua ora koe i tō'ou 'irinaki'anga i āku. Ka 'aere koe ma te 'au ē ma te ora i tō maki.”

35Kāre i mutu taua tuatua ra, ko te karere maira nō kō i te 'are o te tūtara o te sūnago ra, nā kō maira, “Kua mate rava tō tamā'ine. 'E a'a koe ka tāmanamanatā atu ei i te Pū'āpi'i?”

36I tō Iēsū 'akarongo'anga i taua tuatua ra, kua nā kō atura ki taua tūtara ra, “Auraka e mataku, ka 'irinaki 'ua mai koe.”

37Ē kāre atura i tika i aia kia āru mai te tangata, māri rā ko Pētero, ko Iākōbo ē te teina o Iākōbo ra ko Ioane.

38E tae atura ki te 'are o taua tūtara ra, kite atura aia i te auē ē te tangi ma'ata o te aronga i 'ea ra.

39Kia tomo atura aia ki roto ra, kua nā kō atura aia ki a rātou, “'E a'a kōtou i 'ea ai, ē i ma'ata ai tō kōtou auē? Kāre te tamā'ine i mate, kua moe rā.”

40Kua tā'ito'ito maira rātou i aia. Kua tuku atura aia i a rātou rava rāi ki va'o, arataki atura i te metua tāne ē te metua va'ine o taua tamā'ine ra, ē te aronga i āru mai i aia ra, tomo atura ki roto i te pi'a tei reira taua tamā'ine ra i te vai 'ua'anga.

41Kua rave atura i te rima o taua tamā'ine ra, nā kō atura ki aia, “Talita kumi!” Tērā 'oki te 'akatau'anga, “E te tamā'ine, tē 'akaue atu nei au ki a koe, e tū ki runga!”

42Kua tū maira taua tamā'ine ra ki runga i reira, 'ā'āere i'ora; e rau nga'uru mā rua 'oki ōna mata'iti. Vā ma'ata 'ua i'ora rātou.

43Kua ako 'ua atura a Iēsū i a rātou ē, auraka rava e 'akakite atu ki te tangata. Ē kua 'akaue atu 'oki i te mānga nā taua tamā'ine ra.