2 Kōrīnētia 12 - Cook Island Maori Revised New Testament(CIMRNT)

Te au 'ōrama ē te au tuatua 'e'eu'ia

1Kia 'akaparau 'ua atu rāi au 'e tikāi. Noa atu 'oki ē, kāre 'e pu'apinga e rauka mai, ka 'akakite atu rāi au i te au 'ōrama ē te au tuatua 'e'eu'ia nō kō mai i te 'Atu ra.

2Kua kite au i tēta'i tangata i roto i te Mesia tei 'apai rava atu'ia e ta'i nga'uru mā 'ā mata'iti i topa ake nei ki runga i te rangi tuatoru ra. Kāre rā au i kite ē, mē i roto ia i te kōpapa, mē i va'o ia i te kōpapa, ko te Atua 'ua tei kite.

3-4Kua kite rā au ē, kua 'apaina'ia taua tangata ra ki Pārataito. Kāre rā au i kite ē, mē i roto ia i te kōpapa, mē i va'o ia i te kōpapa, ko te Atua 'ua tei kite. Ē kua 'akarongo aia i te au tuatua i reira tei kore e rauka kia tuatua'ia ra ē tei kore rava te tangata e 'akatika'ia kia tuatua.

5Ka 'akaparau rāi au i taua tū tangata ra, kāre rā au e 'akaparau i āku 'ua'orāi, māri rā, i te au mea tei 'akaāri mai i tōku nei tū paruparu.

6Nāringa au i 'inangaro i te 'akaparau, kāre au i te nēneva i reira, nō te mea, tē 'akakite 'ua nei au i te tuatua mou. Kāre rā au e 'akapērā, kia kore rava tēta'i tangata e manako teitei atu i āku i tāna i kite mai i āku nei, ē tāna i 'akarongo mei konei atu i āku.

7Ē kia kore e ma'atama'ata tōku ūpoko nō te tū pāpānunui o te au tuatua tei 'e'eu'ia mai ki āku nei, kua tukuna'ia mai tēta'i tara ki roto i tōku kōpapa nei, 'e karere ia nā Sātani 'ei pāpā mai i āku, ē 'ei 'akapāpū mai ē, auraka au kia ūpoko ma'atama'ata.

8Ē e toru ōku pati 'akatenga'anga ki te 'Atu i taua mea ra kia 'akaātea atu aia i te reira.

9Ē kua 'akakite mai rā aia ki āku ē, “Ko tōku nei aro'a 'ua ka rava 'ua ia nō'ou. Nā roto 'oki i tō'ou paruparu e kitea meitaki'ia ai tōku nei ririnui.” Ē tēianei, 'e mea rekareka ma'ata rava nāku i te 'akaparau 'ua i tōku nei paruparu, kia no'o mārie mai te mana ririnui o te Mesia i runga i āku nei.

10Nō reira, nō te Mesia ra 'oki i mareka ai au i te au tū paruparu, te au 'akakino'anga, te au ngere'anga, te au tākinga kino'anga'ia ē te au tūmatetenga; nō te mea, mē paruparu au ra, tē ririnui tikāi ra au i reira.

Tō Paulo apiapi nō te 'Ēkālēsia i Kōrīnētia

11Kua riro au mei te nēneva rāi te tū! Nā kōtou 'ua'orāi i mārō mai i āku kia 'akapērā au. Te tika'anga 'oki, kia 'akameitaki'ia au e kōtou na. Kāre rava 'oki au i ngere i tēta'i mea a taua au 'āpōsetolo tūkē rava atura, noa atu 'oki ē, 'e pu'apingakore 'ua rāi au nei.

12Kua 'akaāri'ia ma te mou mārie tikāi i rotopū i a kōtou na te au 'akairo o te 'āpōsetolo tika tikāi, koia 'oki, te au 'akairo vāvāria, te au rāvenga ūmeremere ē te au 'anga'anga mana ma'ata.

13'E a'a 'oki kōtou i manako ei ē, 'e iti ake kōtou i te au 'ēkālēsia kē? Pēnei ake, kāre au i 'akateia'a i a kōtou? E 'akakore mai kōtou i taua tārevakē nōku ra.

14Inā, ko te toru tēia o tōku vave'anga i te 'aere atu ki a kōtou na, ē kāre rāi au e 'akateia'a i a kōtou. Nō te mea, kāre au ē tē umuumu ra i tā kōtou, ko kōtou 'ua'orāi rā! Kāre 'oki e tau kia 'akaputuputu te tamariki nā te metua, ko te metua rā kia turu ia i te tamariki.

15'E mea rekareka ma'ata rava nāku kia pou rava tōku meitaki ē tōku māro'iro'i katoa nō kōtou. Iti 'ua rāi āina tō kōtou aro'a mai i āku nō te ra'i o tōku aro'a i a kōtou?

16Noa atu rā ē, kāre au i 'akateia'a i a kōtou, kua karanga rā ēta'i ē, nō tōku kāraperape i rauka ai kōtou i āku nā roto i te tāpikipiki.

17'E meitaki āina tōku i rauka ana nō ko nā mai i a kōtou nā roto i tēta'i o ngā tangata tāku i unga atu ki a kōtou na?

18Kua pati 'akatenga atu au i a Tito kia 'aere atu ki a kōtou na ma te unga atu i tō mātou taeake kia āru katoa atu i aia. Tē rauka mai āina i a Tito te meitaki nō ko nā mai i a kōtou na? Kāre āina māua i 'ā'āere ma te vaerua 'okota'i ē te āru i te rua tapuae 'okota'i?

19Tē manako āina kōtou ē, tē pāruru 'ua nei mātou i a mātou 'ua'orāi i mua i a kōtou? Tē tuatua nei mātou i mua i te aroaro o te Atua mei tā te Mesia i 'inangaro ra. Ē te au mea kātoatoa tā mātou e rave nei, e aku au 'akaperepere ē, i rave'ia te reira nō tō kōtou meitaki rāi.

20Tē mataku nei rā au mē tae atu au ki a kōtou na, kāre kōtou i tau ki te tū tāku tikāi e 'inangaro ra, ē kāre katoa au i tau ki te tū tā kōtou tikāi e 'inangaro ra. Pēnei ake tē vai ra rāi te taumārō, te vare'ae, te riri 'oto'oto, te kimi pu'apinga nōna 'ua'orāi, te tuatua 'akakino, te uruto'e, te 'akateitei i aia 'ua'orāi ē te 'ōrure'au.

21Tē mataku katoa nei rāi au ko te tā'aka'aka'ia mai au e taku Atua i mua i a kōtou, mē tae 'aka'ou atu au ki a kōtou na; ē ka auē au i te tangata 'e mānganui tei 'ara ana ē kāre i tatarā'ara i te 'anga'anga vi'ivi'i, te 'akaturi ē te kanga taukore i rave'ia e rātou ra.