1 Kōrīnētia 12 - Cook Island Maori Revised New Testament(CIMRNT)

Te au tao'ongā rima a te Vaerua ra

1I tēianei, e te au taeake, tē 'inangaro nei au kia pāpū meitaki kōtou nō runga i te au tao'ongā rima a te Vaerua ra.

2Kua nakiro 'oki kōtou ē, i a kōtou e vai 'ētene ra, kua arataki kē'ia kōtou i tō kōtou arataki'anga'ia ki te au 'ītoro mūrare ra.

3Nō reira, tē 'akakite atu nei au ki a kōtou ē, kāre rava tēta'i tangata e 'akanauru'ia e te Vaerua o te Atua i nā kō ana ē, “Kia tauma'a'ia a Iēsū,” ē kāre katoa e rauka kia karanga atu ē, “Ko Iēsū te 'Atu,” māri rā nā roto i te Vaerua Tapu ra.

4 Rōm 12.6-8 'E mānganui te tū o te au tao'ongā rima ra, inārā, 'okota'i rāi Vaerua.

5'E mānganui te tū o te au tāvini'anga, inārā, 'okota'i rāi 'Atu.

6'E mānganui te tū o te au 'anga'anga, inārā, 'okota'i rāi Atua tei tā'anga'anga i aua mea rava rāi i roto i te au tangata kātoatoa.

7Kua kitea pū'ia te 'anga'anga takakē a te Vaerua i roto i te tangata tātakita'i kia rauka te meitaki nō te kātoatoa.

8Ki tēta'i rā 'oki kua 'ōronga'ia mai te tuatua pakari nā roto i te Vaerua; ē ki tēta'i rā te tuatua karape kia tau ki taua Vaerua rāi.

9Kua 'ōronga taua Vaerua rāi ki tēta'i i te 'akarongo mou tikāi, ē ki tēta'i i te au tao'ongā rima 'akaora maki.

10Pērā katoa i 'ōronga'ia mai te rave i te au 'anga'anga ūmeremere ki tēta'i ē ki tēta'i te toto'u; ki tēta'i rā ko te kite i te tū 'anga'anga a te vaerua kino ē te vaerua meitaki. Tēta'i i rauka mai te kite i te tuatua i te au reo kekē, ē tēta'i, ko te kite i te 'uri i aua reo kekē ra.

11Ko tēia au mea kātoatoa nei, kua tā'anga'anga'ia mai te reira e taua Vaerua 'okota'i rāi, tei tu'a i te reira mei tāna i anoano ki te tangata tātakita'i.

'Okota'i kōpapa 'e mānganui rā te au mero

12 Rōm 12.4,5 Ko te kōpapa ra e 'okota'i ia, 'e mānganui rā tōna au mero. Noa atu ē 'e mānganui te au mero rava rāi o taua kōpapa ra, 'okota'i rāi ia kōpapa. Koia katoa rāi te Mesia.

13Nā taua Vaerua 'okota'i ra 'oki i tā'okota'i i a tātou kātoatoa ki roto i te kōpapa 'okota'i nā roto i te bāpetīto'anga: mē 'e Ngāti Iūda tātou, mē 'e Eleni; mē 'e aronga tuika'a tātou, mē 'e aronga ora'anga rangatira, ē kua 'aka'ōu'ia rā tātou kātoatoa e taua Vaerua 'okota'i ra.

14Kāre 'oki te kōpapa nei i te mero 'okota'i, 'e mānganui rā.

15Mē karanga te vaevae ē, “I te mea ē kāre au i te rima, kāre ia au nō te kōpapa,” kāre rā aia e riro mai 'ei mero takakē nō te kōpapa.

16Mē karanga te taringa ē, “I te mea ē kāre au i te mata, kāre ia au nō te kōpapa,” kāre rā aia e riro mai 'ei mero takakē nō te kōpapa.

17Nāringa te kōpapa katoa ra ē 'e mata anake 'ua, ka 'akapē'ea i reira te pae 'akarongo'anga? Nāringa te kōpapa katoa ra ē 'e taringa anake 'ua, ka 'akapē'ea i reira te 'ongi'anga i te 'aunga?

18Ko te tika rā, kua 'akano'ono'o te Atua i te au mero kātoatoa i roto i te kōpapa nei mei tei tau ki te 'akakoro'anga tāna i anoano ra.

19Nāringa 'oki te au mero kātoatoa ē 'e mero 'okota'i anake 'ua, ka 'akapē'ea i reira te kōpapa?

20I tēianei rā, 'e mānganui te au mero, 'okota'i rā kōpapa!

21Kāre 'oki 'e rauka i te mata kia karanga atu ki te rima ē, “Kāre ō'ou pu'apinga ki āku!” Kāre katoa 'e rauka i te ūpoko kia karanga atu ki ngā vaevae ē, “Kāre ō kōrua pu'apinga ki āku!”

22Kāre rā 'oki ē, ko te au mero o te kōpapa nei 'e 'ākara'anga 'āpikepike tō rātou, 'e ma'ata atu tō rātou pu'apinga,

23ē ko te au mero o te kōpapa nei tā tātou e manako ra ē, 'eia'a kia 'akaāri'ia, ko tā tātou ia e 'u'una pakari nei; ē tō tātou au mero 'akamā'ia, ko tā tātou ia e rākei ma'ata nei;

24kāreka tō tātou au mero mānea ra, kāre e 'inangaro'ia kia rākei'ia. Kua 'akano'ono'o mārie rā te Atua i te kōpapa ra, ē kua 'akangāteitei ma'ata i te mero i ngere i te ngāteitei,

25kia tā'okota'i meitaki te au mero o te kōpapa nei ma te tauturu atu tēta'i i tēta'i.

26Mē mamae 'oki tēta'i mero 'okota'i, ka mamae te au mero rava rāi, ē mē 'akangāteitei'ia tēta'i mero 'okota'i ra, e rekareka te au mero rava rāi.

27Ē tēianei, ko te kōpapa kōtou o te Mesia, ē ko kōtou tātakita'i te au mero nō te reira.

28Eph 4.11Ē kua tuku 'oki te Atua i a rātou ki roto i te 'ēkālēsia. Te mea mua, ko te au 'āpōsetolo ia; te rua, ko te au peroveta ia; te toru, ko te au pū'āpi'i ia; e oti akera, ko te au tangata 'anga'anga ūmeremere, ko te aronga 'e tao'onga 'akaora maki tō rātou, ko te aronga tauturu, ko te aronga arataki ē ko te au tangata e tuatua i te au reo kekē ra.

29'E au 'āpōsetolo kātoatoa āina rātou? 'E au peroveta kātoatoa āina rātou? 'E au pū'āpi'i kātoatoa āina rātou? Tē rave kātoatoa āina rātou i te 'anga'anga ūmeremere?

30Tei a rātou kātoatoa āina te tao'onga 'akaora maki? Tē tuatua kātoatoa āina rātou i te au reo kekē? 'E 'uri tuatua kātoatoa āina rātou?

31I tēianei rā, e umuumu atu kōtou i te au tao'ongā rima meitaki rava atu.

Ē tēianei, tē 'akaāri atu nei au ki a kōtou i te mataara meitaki ma'ata rava atu.