Rōma Nō runga i tēia leta - Cook Island Maori Revised New Testament(CIMRNT)

Nō runga i tēia letaTē tātā nei a Paulo i tēia leta 'ei 'aka'ārāvei atu i aia ē tāna karere ki te 'ēkālēsia i Rōma. Kāre rava 'oki aia i tae ake ki tēia 'ōire rongonui, noa atu ē, kua kite aia i te ingoa o te au Keretitiāno 'e mānganui ki reira; ē kua umuumu aia i te 'ārāvei viviki atu i a rātou (15.22—16.21). Kua 'akakite a Paulo ki a rātou ē, 'e 'āpōsetolo aia tei 'iki'ia 'ei tūtū 'aere i te 'ēvangelia (1.1). Ē ko tēia te karere tāna e 'akakite nei: “'E rāvenga mana tā te Atua kia 'ōronga i te ora mutukore ki te tangata rava rāi e 'irinaki ra, mē 'e Ngāti Iūda rātou, mē 'e Eleni rātou” (1.16).Tē 'inangaro nei a Paulo i te 'akama'ara i a rātou ē, “Kua 'ara pou roa tātou ē kua ngere i te kakā o te Atua” (3.23). Ka 'akapē'ea rā tātou e mareka'ia mai ei e te Atua? Ko tēia 'oki te ui'anga tā Paulo e tīmata nei i te pa'u atu i roto i tēia leta nei. Kua 'akamata aia nā roto i te 'akaāri'anga ē, kua kore te tangata tātakita'i i te rave i tā te Atua e anoano ra. Kāre 'oki te Ngāti Iūda i kauraro i te Ture a Mōse, ē kāre te 'ētene e ma'ara 'ua atu i te Atua, noa atu ē, kua tuatua mai ana te Atua ki a rātou nā roto i te au mataara tūkēkē (1.18—3.20).I tēianei tē kite nei tātou ē, i 'akapē'ea te Atua i te 'akatikatika'anga i a tātou pou roa (3.21). 'Āiteite 'ua 'oki te kātoatoa i tō te Atua 'ākara'anga: ka 'āriki 'ua aia i te tangata rava rāi nō tō rātou 'irinaki'anga i a Iēsū Mesia. 'E meitaki tikāi 'oki te Atua, ē nō Iēsū 'oki i mareka ei aia i a tātou ē kua 'akaora i a tātou mei roto mai i tā tātou au 'ara (3.22-24).Kua 'ōronga mai te Atua i te Mesia kia mate aia nō tā tātou au 'ara, ē kua 'akatū aia i aia kia rauka rāi i te Atua i te 'akatikatika mai i a tātou (4.25).Te 'akano'ono'o'anga o tēia leta1. Ko Paulo ē tāna karere nō runga i te 'ēvangelia 1.1-172. Kua 'ara te tangata pou roa 1.18—3.203. Tā te Atua mataara nō te 'akatikatika'anga i te tangata rava rāi 3.21—4.254. Te ora'anga 'ōu nō te 'Iti Tangata o te Atua 5.1—8.395. Ka 'akapē'ea te 'Iti Tangata Īserā'ela? 9.1—11.366. Te tūranga o te ora'anga 'ōu nō te aro'a 12.1—15.137. Tō Paulo mānakonako'anga ē tōna aro'a'anga 15.14—16.27