1Ē tēianei e aku au taeake ē, kia rekareka kōtou i tō kōtou piri'anga ki te 'Atu. Kāre 'e manamanatā i āku i te tātā 'aka'ou ki a kōtou i ēia mea nei. 'E tuatua ora rāi 'oki te reira nō kōtou.
2E matakite i te aronga 'anga'anga kikino, taua au puakaaoa ra, ko te aronga 'oki tei mānono i te koti i te kōpapa.
3Ko tātou nei 'oki te “peritome” tikāi, ko tei 'akamori i te Atua nā roto i tōna Vaerua ē tei 'akaparau i te piri'anga ki a Iēsū, ma te 'irinaki'angakore i tā te kōpapa nei.
4Nōku rā, 'e tika'anga tōku kia 'irinaki katoa au i te kōpapa nei. Mei te mea ē, tē manako ra tēta'i tangata kē ē, 'e tika'anga tōna kia 'irinaki aia i tā te kōpapa nei, 'e ma'ata atu rāi tōku tika'anga i tōna.
5a: Rōm 11.1; b: Anga 23.6; 26.5Ko au, i peritome'ia au i te pō varu. 'E Ngāti Īserā'ela au. 'E kōpū Bēniāmina au. 'E toto 'Ēbera anake 'ua tōku. I te pae o te Ture, 'e Phārīsea au.
6Anga 8.3; 22.4; 26.9-11I te pae rā o te māro'iro'i, ko au tikāi tei tākinga kino i te 'ēkālēsia. I te pae rā o te tuatua tika a te Ture, 'e tangata 'apakore au.
7Ko aua mea nei tei riro ana 'ei au mea meitaki nōku, tē manako nei au i tēianei ē, 'e au mea pu'apingakore 'ua te reira nō tōku piri'anga 'oki ki te Mesia.
8Ē kāre ko aua mea anake 'ua, ko te au mea rava rāi rā i manako'ia e au ē, 'e au mea pu'apingakore ia. Ko te mea pu'apinga ma'ata rava atu 'oki ko te kite i taku 'Atu, te Mesia ko Iēsū. Nōna 'oki i 'akaruke ei au i te au mea katoa ra, ē kua 'akariro au i te reira 'ei tītā, kia rauka i āku te meitaki o te piri'anga ki te Mesia,
9ē kia 'okota'i tikāi māua ko te Mesia. Kāre āku tuatua tika i nā roto 'aka'ou mai i te Ture, i nā roto mai rā i te 'irinaki'anga i te Mesia. Ko te tuatua tika 'oki ia nō kō mai i te Atua ra i 'akamou'ia ai e te 'irinaki'anga.
10Tē 'inangaro 'ua nei rāi au i te kite i te Mesia ē te mārōrō o tōna tū'aka'ou'anga, kia kāpiti'ia atu au ki tōna au mamae, i te 'aka'ārite'anga'ia ki aia i tōna mate,
11kia rauka i āku te tū'aka'ou'anga mei te mate maira.
Te aruaru'anga i te 'akakoro'anga12Auraka e manako ē, kua rauka i āku te reira, mē kāre ra, kua meitaki rava au i tēianei. Tē umuumu atu nei rā au i te 'akakoro'anga tā te Mesia i 'akakoro ra i tōna 'akariro mai'anga i āku nōna.
13E te au taeake ē, ko au nei, kāre au i manako ē kua rauka mai i āku te reira. 'Okota'i 'ua rā mea tāku e rave nei, koia 'oki, tē 'uapou atu nei au i te au mea i mua i āku ma te 'akangaropōina atu i te au mea i muri.
14Tē 'oro tika nei au ki te 'openga kia rauka i āku te rē, koia 'oki, te kī'anga o te ora'anga 'ōu. Nō te reira 'oki i kāpiki'ia ai au e te Atua mei runga mai nā roto i te Mesia ko Iēsū.
15Ko te aronga katoa i ō tātou nei tei pakari te 'irinaki'anga, kia pērā tō rātou manako'anga. Ē mei te mea ra ē, 'e mānga tūkē tō kōtou manako, nā te Atua rāi e 'akamārama i tēia ki a kōtou.
16Ko te mea ma'ata 'oki kia tau tō tātou 'aerenga ki te tūranga vaerua i rauka i a tātou.
17 1 Kōr 4.16; 11.1 E aku au taeake ē, e āru kōtou i āku, ē e 'ākara meitaki i te aronga tei 'āite tō rātou 'aerenga mei te 'ākara'anga tā mātou i tuku atu ki a kōtou na.
18Kua 'akakite putuputu atu ana au ki a kōtou ē te 'akakite 'aka'ou atu nei au i tēianei ma te roimata ē, 'e mānganui te tangata 'e au 'enemi rātou nō te sātauro o te Mesia nō te tū o tō rātou ora'anga.
19Ko tō rātou 'openga, ko te mate ia. Ko tō rātou atua, ko te kōpū ia. Ko tō rātou 'akaparau'anga, ko te 'anga'anga 'akamā ia tā rātou i rave. Tē manako 'ua nei rātou i tā tō tēianei ao.
20Ko tātou rā, 'e aronga kāinga tātou nō te ao ra, ē tē tāpapa atu nei tātou i te 'Akaora mei reira mai, ko te 'Atu ko Iēsū Mesia.
21Nāna e 'akatūkē i tō tātou kōpapa paruparu ē te pē 'ua nei kia 'okota'i rāi tū ē tōna kōpapa kakā nā roto i tāna rāvenga mana te ka rauka i te tuku i te au mea rava rāi i raro ake i aia 'ua'orāi.
Who We AreWhat We EelieveWhat We Do
2025 by iamachristian.org,Inc All rights reserved.
