'Anga'anga 11 - Cook Island Maori Revised New Testament(CIMRNT)

Te 'akamārama'anga a Pētero ki te 'ēkālēsia i Iērūsalēma ra

1Kua 'akarongo 'oki te au 'āpōsetolo ē te au taeake i Iūdea kātoatoa ra ē, kua 'āriki katoa te au 'ētene i te tuatua a te Atua.

2Ē kia tae atura a Pētero ki Iērūsalēma ra, kua taumārō maira te au pipi Ngāti Iūda ki aia,

3nā kō maira, “I tomo ana koe ki roto i te ngutu'are o te aronga peritomekore'ia ra, ē i kaikai ana 'oki koe ē rātou katoa.”

4Kua 'akamata atura a Pētero i te 'akamārama mārie atu ki a rātou, nā kō atura,

5“Tē pure ra au i roto i te 'ōire i Iōpa, kua tāre'u'ia i'ora tōku manako ē kua kite atura au i tēta'i 'ōrama. Kua kite 'oki au i tēta'i 'āriki i te 'eke'anga mai mei te kāka'u ma'atama'ata ra te tū i te tuku'anga'ia mai mei te rangi maira ki raro i nā tōna ngā kautuai ē 'ā ra, e tae rava mai ki vaitata i āku ra.

6Kua 'ākara matariki atura au ki taua mea ra, ē kite atura i te au manu vaevae 'ā o te 'enua nei, te au mea taetaevao, te au mea torotoro 'aere ē te au manu o te reva ra.

7Ē kua 'akarongo atura au i tēta'i reo i te nā kō'anga mai ki āku, ‘E Pētero, ka tū, ka tā, ka kai.’

8Kua pa'u atura rā au, ‘Auraka rava ia, e te 'Atu; kāre rava ake nei tēta'i kai taukore, mē kāre tēta'i mea vi'ivi'i i ō ake ki roto i tōku va'a, ē tēia noa ai.’

9Kua tuatua 'aka'ou maira taua reo ra nō te rangi mai, ‘Auraka koe e tuatua i tēta'i 'ua atu mea tā te Atua i tāmā ra ē, 'e mea taukore ia.’

10E toru akera 'akapērā'anga mai, kua 'uti 'aka'ou'ia atura te au mea kātoatoa ki runga i te rangi.

11“Ē inā, e toru tangata tei tonokia mai ki āku mei Kaisarea mai, kua tāpū mai ki te ngutu'are e no'o ra mātou.

12Kua 'akaue maira te Vaerua ki āku ē, auraka au kia 'ēkōkō i te āru'anga atu i a rātou. Kua 'aere atura au ma tēia au taeake katoa e ono ē kua tomo atura mātou ki roto i te 'are o taua tangata ra.

13Ē kua 'akakite maira aia ki a mātou i tōna kite'anga i tēta'i 'āngela i te tū'anga mai i roto i tōna 'are ē te nā kō'anga mai ē, ‘Tono atu i tēta'i tangata ki Iōpa e tiki mai i a Simona tei kāpiki'ia ē ko Pētero.

14Ka 'apai mai aia i tēta'i karere ki a koe te ka riro 'ei ora nō'ou ma tō'ou ngutu'are tangata katoa ra.’

15I āku e 'akamata ra i te tuatua atu, kua 'aere maira te Vaerua Tapu ki runga a'o i a rātou mei aia rāi i 'aere mai ki runga a'o i a tātou i mua ana.

16Anga 1.5I reira, kua ma'ara mai i āku tā te 'Atu i tuatua ra ē, ‘I bāpetīto 'oki a Ioane ki te vai, ka bāpetīto'ia rā kōtou ki te Vaerua Tapu.’

17Mē kua 'ōronga mai te Atua i te 'apinga aro'a nā rātou mei tāna i 'ōronga mai nā tātou nei tei 'irinaki i te 'Atu i a Iēsū Mesia ra, ko 'ai 'oki au nei kia manako ē ka rauka i āku i te ārai atu i te Atua?”

18Ē kia 'akarongo rātou i tēia au tuatua nei, kua mūtēkī 'ua i'ora rātou, ē kua 'akakakā atura rātou i te Atua, nā kō akera, “Kua 'ōronga māri katoa te Atua i te tatarā'ara ki te au 'ētene kia ora rātou.”

Te 'ēkālēsia i Ānētiōka

19 Anga 8.1-4 Inā, ko te aronga 'oki i pue'urikiriki kē i te tākinga kino'anga i tupu mei te rā mai i mate ei a Setephano ra, kua tae rava rātou ki Phēnia, ki Kūpero ē ki Ānētiōka, i te 'akakitekite'anga i te karere ki te Ngāti Iūda 'ua anake, kāre ki tēta'i tangata kē atu.

20Ko ēta'i rā i a rātou, nō Kūpero mai ia ē nō Kurene mai, i tō rātou tae'anga atu ki Ānētiōka, kua tuatua katoa atura rātou ki te au Eleni i te tūtū 'aere'anga atu i te tuatua meitaki nō runga i te 'Atu i a Iēsū.

21Tei a rātou 'oki te rima o te 'Atu, ē 'e mānganui 'oki tei 'irinaki ē tei 'āriu ki te 'Atu ra.

22Kua tae rava tēia rongo ki te taringa o te 'ēkālēsia i Iērūsalēma, ē kua tono atura rātou i a Bānaba e 'aere ki Ānētiōka.

23Ē kia tae atu aia ki reira ra, ē kite atura i te 'akairo o te aro'a 'ua o te Atua, kua mareka atura aia, ē kua 'akamāro'iro'i atura i a rātou kātoatoa kia no'o piri tikāi rātou ki te 'Atu ma te ngākau 'okota'i.

24'E tangata meitaki 'oki aia, ē kua kī aia i te Vaerua Tapu ē te 'akarongo. Ē 'e mānganui 'oki tei kāpiti'ia mai ki te 'Atu ra.

25I reira, kua 'aere atura a Bānaba ki Tāreso e kimi i a Saula.

26Ē kia kitea'ia maira a Saula e ia ra, kua arataki maira a Bānaba i aia ki Ānētiōka. E 'okota'i ō rāua mata'iti pūpū ki reira i te kāpiti'anga ki taua 'ēkālēsia ra ē te 'āpi'i'anga atu i te tangata 'e mānganui. Ē i Ānētiōka i tapa mua'ia ai te au pipi ē 'e Keretitiāno.

27Ē i taua au rā ra, 'e au peroveta tei 'aere mai ana mei Iērūsalēma mai ki Ānētiōka.

28Anga 21.10Ko tēta'i i ō rātou ra, ko Āgabo te ingoa, kua tū akera aia ki runga, ē kua toto'u maira nā roto i te Vaerua ē, 'e onge ma'ata te ka tupu ki te pā 'enua rava rāi. Kua tupu 'oki tēia i te tuātau o te 'au o Kalaudio Kaisara ra.

29Kua 'akakoro i'ora te au pipi e 'akaū atu i te 'apinga te ka rauka i aia atu ē i aia atu, 'ei tauturu atu i te au taeake e no'o maira i Iūdea ra.

30Kua 'akapērā atura 'oki rātou, ē kua 'akaū atura i tā rātou au 'apinga aro'a ki te aronga pakari ra nā roto atu i a Bānaba rāua ko Saula.