Rōma 3 - Cook Island Maori Revised New Testament(CIMRNT)

Te Atua tuatua mou

1'E meitaki atu āinei te Ngāti Iūda i te aronga kē? Mē kāre ra, 'e pu'apinga āinei tēta'i kia peritome'ia?

2'E ma'ata tikāi te pu'apinga mē 'ākarakara'ia atu te au mea rava rāi. Ko te mea mua, kua tuku tikāi 'ia mai te karere a te Atua ki te Ngāti Iūda.

3E 'akapē'ea rā, mei te mea ē, kāre ēta'i o rātou i 'ākono meitaki i tei tukuna'ia mai ki a rātou? Ka 'ākonokore āinei te Atua i tāna tuatua, nō te mea, kāre rātou i 'ākono i tei tukuna'ia mai ki a rātou?

4Sal 51.4Kāre rava ia! Ka vai rāi te Atua 'ei Atua tuatua mou, noa atu ē 'e pikipikika'a te tangata rava rāi, mei tei tātā'ia ra ē,

“Ka tika 'ua rāi tā'au mē tuatua koe,

ē ka 'autū 'ua rāi tā'au mē 'akavā'ia koe.”

5Mē riro rā tā tātou tuatua tikakore 'ei 'akaāri meitaki mai i te tuatua tika a te Atua ra, ka 'akapē'ea rā tātou i reira? Kua tikakore āina te Atua mē 'akautunga mai aia i a tātou? (Mei tā te tangata tāku e tuatua nei.)

6Kāre rava ia! Nāringa 'e tuatua tikakore te Atua, 'e a'a i reira e tikāi i aia kia 'akavā i tō te ao nei?

7Mē riro tōku tū pikika'a 'ei 'akama'ata atu i te kakā o te Atua nō tōna tuatua mou, 'e a'a i'ora au i 'akavā'ia ai ē, 'e tangata rave 'ara?

8'E a'a i kore ei i tika kia karanga atu ē, “Ka rave tātou i te kino kia tupu mai te meitaki,” mei a mātou i 'akakino'ia mai e tēta'i pae tei 'akakite mai ē, nā mātou i tuatua atu i tēia mea tikāi? Kua tau meitaki rātou kia 'akavā'ia.

Kāre rava 'e tangata tuatua tika

9'E a'a i reira? 'E meitaki atu āina tātou? Kāre rava ia! Kua 'aka'apa takere'ia ana 'oki tātou, nō te mea, kua 'āiteite te Ngāti Iūda ē te Eleni i te no'o kātoatoa'anga i raro ake i te mana o te 'ara,

10Sal 14.1-3; 53.1-3mei tei tātā'ia ra 'oki ē,

“Kāre rava 'e tangata tuatua tika, kāre e 'okota'i iti ake,

11kāre rava 'e tangata i nakiro,

kāre rava 'e tangata i kimi mārie i te Atua.

12Kua 'ope rava i te 'aere kē,

ē kua pu'apingakore 'oki rātou rava rāi;

kāre rava 'e tangata i rave i te meitaki, kāre e 'okota'i iti ake.

13 a: Sal 5.9; b: Sal 140.3 'E va'arua turuma e tu'era 'ua ra tō rātou karaponga;

ē nā tō rātou arero e pikipikika'a mai.

Tei runga te kavangū vīpera i tō rātou ngutu.

14 Sal 10.7 Kua kī tō rātou va'a i te tao ē te ngākau kino.

15 Isa 59.7,8 'E viviki tō rātou vaevae i te 'akamaringi toto;

16ko te mate ē te mamae ma'ata tei tō rātou au 'aerenga,

17ē te mataara o te 'au ra, kāre rātou i kite.

18 Sal 36.1 Kāre rava 'e mataku i te Atua i mua i tō rātou mata.”

19Kua kite 'oki tātou ē, ko te au mea rava rāi tā te Ture e tuatua maira, tē tuatua maira ia ki te aronga i raro ake i te Ture ra, kia tāpiri'ia te au va'a rava rāi, ē kia riro mai tō te ao kātoatoa nei ki raro ake i te 'akavā'anga a te Atua.

20Sal 143.2; Gal 2.16Nō te mea, kāre rava tēta'i 'ua atu e 'akatikatika'ia ki mua i te aroaro o te Atua, nō tei rave aia i tā te Ture ra; nō te Ture 'oki i nakiro ei tātou i te 'ara.

Tē 'akatikatika nei te Atua i te tangata nō te 'irinaki'anga

21-22 Gal 2.16 Inārā, i tēianei tē 'akaāri'ia mai nei tō te Atua 'akatikatika'anga i te tangata mei tei 'akakite katoa'ia mai e te Ture ē te au peroveta, 'eia'a nō te 'ākono i te Ture, nō te 'irinaki'anga rā i a Iēsū Mesia. Ko tō te Atua mataara te reira nō te 'akatikatika i te tangata rava rāi e 'irinaki ra; nō te mea, kāre roa 'e tūkē te Ngāti Iūda ē te Eleni.

23Kua 'ara pou roa 'oki te kātoatoa ē kua ngere i te kakā o te Atua,

24ē kua 'akatikatika 'ua'ia mai e tōna aro'a 'ua nā roto mai i te rāvenga ora a te Mesia ra i a Iēsū.

25-26Kua tuku mai te Atua i aia 'ei tārangā'ara nā roto i tō rātou 'irinaki'anga i tōna toto. Kua rave aia i tēia 'ei 'akaāri mai i tāna tuatua tika, nō te mea, nō tōna 'akakoromaki, kāre te Atua i 'akautunga atu i te au 'ara i rave'ia i muatangāna ra. Ē kua rave katoa aia i tēia 'ei 'akaāri mai i tāna tuatua tika i tēia tuātau nei, nā roto i tōna 'ua'orāi tū tiratiratū ē tē 'akatikatika katoa mai nei aia i te tangata rava rāi tei 'irinaki i a Iēsū ra.

27Tei 'ea, i reira, tō tātou ngākau parau? Kua 'akakore'ia ia. 'E a'a rā i 'akakore'ia ai? Nō te 'ākono āina i te Ture? Kāre! Ko te 'irinaki'anga anake 'ua, ē kāre roa te 'ākono Ture i 'ōronga mai i te meitaki.

28Tē tuatua nei 'oki mātou ē, ka 'akatikatika'ia mai te tangata e te 'irinaki'anga, 'eia'a nō tāna 'ākono i te 'anga'anga a te Ture ra.

29'E Atua āina te Atua nō te Ngāti Iūda anake 'ua? Kāre āina aia i te Atua nō te 'ētene katoa ra? Nō te a'a, nō te 'ētene katoa ia,

30Deut 6.4; Gal 3.20nō te mea, 'okota'i te Atua. Ka 'akatikatika mai aia i tei peritome'ia nō te 'irinaki'anga, ē te peritomekore'ia ra nā roto i taua 'irinaki'anga rāi.

31Tē tākore nei āina mātou i reira i te Ture nā roto i te 'irinaki'anga? Kāre rava ia! E ngari, tē 'akatinamou nei rāi mātou i te Ture.