Ebera 4 - Cook Island Maori Revised New Testament(CIMRNT)

1Ē tēianei, tē vai nei rāi te papa'u'anga nō te 'akaō'anga ki roto i tō te Atua ngā'i 'akangāro'i'anga. Nō reira, e matakite tātou kia kore tēta'i o kōtou e ngere i taua tika'anga ra.

2Kua 'akakite'ia mai 'oki te karere meitaki o taua 'akangāro'i'anga ra ki a tātou, ē pērā katoa ki a rātou ra. Kāre rā tō rātou 'akarongo'anga i te karere i riro mai 'ei pu'apinga nō rātou, nō te mea, kāre rātou i piri ki a rātou tei 'irinaki i tā rātou i 'akarongo ana.

3Sal 95.11Ko tātou 'oki te aronga tei 'irinaki ra, ē te ka ō ki roto i te ngā'i 'akangāro'i'anga. Ko tēia 'oki tā te Atua i tuatua mai ē,

“Kua taputo'u'ia e au i tōku riri'anga ē,

Auraka roa rātou kia ō ki roto i tōku ngā'i 'akangāro'i'anga.”

'E tuatua 'oki tēia nāna, noa atu ē, kua oti te au mea kātoatoa i te 'anga'ia e ia 'ōu te 'akamata'anga mai o tēianei ao.

4Gen 2.2Tē nā kō maira 'oki te Tuatua Tapu i tēta'i 'īrava nō runga i te 'itu o te rā ē, “Kua 'akangāro'i te Atua i te 'itu o te rā i tāna katoa ra au 'anga'anga.”

5Sal 95.11Ē tē nā kō 'aka'ou nei aia i tēia 'īrava nei ē, “Ko rātou, auraka roa rātou kia ō ki roto i tōku ngā'i 'akangāro'i'anga.”

6Kāre te aronga tei 'akakite'ia mai te tuatua meitaki i muatangāna i ō ki roto i te ngā'i 'akangāro'i'anga, nō tō rātou 'irinakikore. 'E mea pāpū rā ē, ka ō ēta'i tangata ki roto i te reira.

7Sal 95.7,8Kua 'ākono 'aka'ou 'oki te Atua i tēta'i rā, tei tapa'ia ē, “tēia rā nei,” nā roto mai i te tuatua a Dāvida i muri ake i tēta'i tuatua roa, mei tei tā'iku'ia i mua ake i te nā kō'anga ē,

“Mē 'akarongo kōtou i tēia rā nei i te reo o te Atua,

auraka e 'akamārōki'aki'a i tō kōtou ngākau!”

8 Deut 31.7; Iosu 22.4 Nāringa ko Iōsua tei 'ōronga ki a rātou i te ngā'i 'akangāro'i'anga, kāre te Atua i tuatua nō runga i tēta'i rā kē i muri ake.

9Nō reira, tē vai nei rāi tēta'i 'akangāro'i'anga nō te ngutu'are tangata o te Atua.

10Gen 2.2Ko te tangata 'oki tei ō ki roto i tō te Atua ngā'i 'akangāro'i'anga, kua 'akangāro'i aia i tāna 'anga'anga mei te Atua rāi i 'akangāro'i i tāna 'ua'orāi.

11Nō reira, e tautā pakari tātou kia ō atu tātou ki roto i taua ngā'i 'akangāro'i'anga ra, kia kore tēta'i e ngere i te reira nā roto i te āru'anga i taua 'ākara'anga kino o te 'irinakikore ra.

12Te karere a te Atua 'e mea ora ia ē tē 'anga'anga nei rāi. 'E ma'ata tōna kokoi i tō tēta'i 'ua atu koke matarua, ē tē kōputa mama ra e tae 'ua atu ki te vaerua ē te ngākau, ē ki te au pa'unga ē te u'o ivi. Tē kite meitaki nei aia i te tū tikāi o te au manako ē te au 'akakoro'anga o te ngākau.

13Kāre rava 'e mea e ngaro i mua i te Atua. Tē vai 'ua nei rā te au mea kātoatoa i tō rātou tū tikāi ma te tāpokikore'ia i mua i tōna aroaro; ē ki aia rāi ka 'akakitekite tātou i te tuatua o te au mea tā tātou i rave.

Ko Iēsū te Ta'unga Ma'ata nō tātou

14Ē tēianei, kia mou piri tikāi tātou i te 'akarongo tā tātou e 'a'aki nei. 'E Ta'unga Ma'ata Teitei 'oki tō tātou, ko Iēsū te Tamaiti a te Atua, tei 'aere atu ki mua tikāi i te aroaro o te Atua 'ua'orāi.

15'E Ta'unga Ma'ata 'oki aia tei kite meitaki i tō tātou au paruparu, nō te mea, kua tīmata katoa'ia aia i te au mea rava rāi mei a tātou nei rāi, inārā, kāre rava āna 'ara.

16Ē tēianei, e 'akavaitata atu tātou ki te terōno o tō te Atua aro'a 'ua ma te 'ēkōkōkore kia 'akaaro'a'ia mai tātou, ē kia rauka mai i a tātou te tauturu meitaki i te tuātau 'inangaro'ia ra.