1Tae atura a Paulo ki Dērebe ē Lūsētera. Ē inā, tei reira tēta'i pipi, ko Tīmōteo te ingoa, 'e tamaiti aia nā tēta'i va'ine Ngāti Iūda 'akarongo ra ē te metua tāne Eleni.
2'E tangata rongo meitaki 'oki a Tīmōteo ki te au taeake i Lūsētera ē Īkōnio.
3Kua 'inangaro 'oki a Paulo i aia e 'aere katoa rāua. Ē kua rave atura aia i aia, e peritome i'ora, nō te au Ngāti Iūda 'oki e no'o i taua ngā 'ōire ra, nō te mea, kua kite rātou pou roa ē, 'e tangata Eleni tōna metua tāne.
4I tō rātou 'aere'anga nā roto i te au 'ōire ra, kua tuku atura rātou ki te au taeake i te au 'akaue'anga tei 'akatinamou'ia e te au 'āpōsetolo ē te aronga pakari i Iērūsalēma ra, 'ei 'ākono'anga nā rātou.
5Kua mātūtū 'aere atura te au 'ēkālēsia i te 'akarongo ē kua tupu atura ki te ma'ata'anga, kāre 'e rā i tīvata.
Te 'ōrama a Paulo i Tēroa6Kua 'aere atura a Paulo mā nā roto i te tu'anga 'enua o Phērigia ē Gālātia, nō te mea, kua ārai'ia rātou e te Vaerua Tapu i te tuatua 'aere i te karere i Āsia.
7E tae atura rātou ki Mūsia, kua tāmata i'ora rātou i te 'aere ki Bītūnia, kāre rā te Vaerua o Iēsū i 'akatika mai i a rātou i te 'aere ki reira.
8Kua 'aere atura rātou nā roto i a Mūsia, ē kua tae atura ki raro rava ki Tēroa.
9Kua kitea maira tēta'i 'ōrama e Paulo i te pō ra. Kua tū maira tēta'i tangata Mākedōnia, kua pati 'akatenga maira ki aia, nā kō maira, “Ka 'ano mai ana ki Mākedōnia nei, e tūpae mai i a mātou nei.”
10Kite akera aia i taua 'ōrama ra, kua 'ākonokono i'ora mātou i reira rāi e 'aere ki Mākedōnia. Kua pāpū tikāi 'oki i a mātou ē, nā te Atua i kāpiki mai i a mātou kia tūtū 'aere mātou i te 'ēvangelia ki a rātou.
Tō Ludia 'aka'āriu'anga'ia i Philipi11I tō mātou tere'anga mei Tēroa atu, 'aere tika atura mātou ki Sāmōterakia, ē i tērā mai rā ki Neapoli,
12ē mei reira atu ki Philipi, ko tēta'i 'ōire ma'ata ia o te tu'anga mua o Mākedōnia, ē 'e kolone 'oki. Kua no'o atura mātou i ēta'i rā i te reira 'ōire.
13E tae akera ki te rā Sābati, kua 'aere atura mātou ki va'o mai i te ngūtupa o te 'ōire ki te pae kauvai, nō te mea, kua manako mātou ē, tei reira te ngā'i pure'anga, ē kua no'o i'ora mātou ki raro, ē kua tuatua atura ki te au va'ine tei putuputu mai ki reira.
14Ko tēta'i va'ine 'ākono Atua, ko Lūdia tōna ingoa, 'e va'ine 'oko'oko kāka'u muramura aia nō te 'ōire o Tuatira, tē 'akarongo maira aia ē nā te Atua 'oki i 'akamā'ora'ora i tōna ngākau kia piri tikāi aia ki te karere i 'akakite'ia mai e Paulo ra.
15E oti akera aia i te bāpetīto'ia ē tōna ngutu'are tangata katoa 'oki, kua pati 'akatenga maira ki a mātou, nā kō maira, “Mē tē manako na kōtou ē 'e va'ine 'irinaki tikāi au i te 'Atu, e 'aere mai kōtou ki roto i tōku nei 'are no'o ei.” Kua mānono roa maira aia i a mātou.
Ko Paulo rāua ko Sila i roto i te 'are 'āuri i Philipi16Ē tē 'aere 'aka'ou atura mātou ki te pure, kua 'ārāvei'ia maira mātou e tēta'i va'ine tuika'a, 'e vaerua purepure tōna. Ē, 'e 'apinga nui tā tōna pū i rauka mai nā roto i tāna 'anga'anga purepure.
17Kua āru 'aere maira aia i a Paulo ē i a mātou katoa ma te kāpiki ma'ata, nā kō maira, “'E tāvini anake tēia ngā tangata nei nō te Atua Teitei Rava, ko tei 'āpi'i atu ki a kōtou i te mataara o te rāvenga ora.”
18I pērā mai aia 'e mānganui te rā. E 'ongo'ongo rava akera a Paulo, ē kua 'āriu atura, ē kua nā kō atura ki taua vaerua ra, “Tē 'akaue atu nei au i a koe ma te ingoa o Iēsū Mesia, e 'aere atu koe ki va'o mei roto mai i tēnā na va'ine ra.” Ē kua 'aere atura taua vaerua kino ra ki va'o i taua 'ati'anga rāi.
19E nakiro akera tōna au pū ē, kua ngaro tō rātou rāvenga e rauka mai ei te 'apinga nui, kua 'opu atura rātou i a Paulo rāua ko Sila, kika atura i a rāua ki te ngā'i 'oko'oko'anga ki mua i te au tūtara ra.
20Ē kia tukuna'ia rāua ki ngā 'akavānui ra, kua tuatua atura rātou, “Ko tēia ngā tangata nei i tāoriori kino rāua i tō tātou nei 'ōire, 'e Ngāti Iūda 'oki rāua.
21Ē tē 'āpi'i mai nei rāua i te au peu kāre e tau kia 'āriki ē kia 'ākono tātou, nō te mea ē, nō Rōma 'oki tātou.”
22Kua kāpiti atura te urupū tangata i te 'akakino'anga i a rāua.
Ē nā ngā 'akavānui i 'ae'ae atu i tō rāua kāka'u, ē kua 'akaue atura kia pāpā'ia rāua.
23E oti akera tō rāua pāpā'anga'ia 'e mānganui e rātou ra, kua titiri atura rātou i a rāua ki roto i te 'are 'āuri, ē kua poroaki atura rātou ki te tiaki mou'āuri ē, kia tāpū meitaki aia i a rāua.
24Nō te mea ē, i pērā'ia mai aia i te poroaki'anga'ia mai, kua titiri atura aia i a rāua ki roto i te pi'a i roto rava o te 'are 'āuri, e tāmou atura i tō rāua vaevae ki rotopū i ngā potonga rākau e rua ra.
25E tūruā'ipō akera, kua pure ē kua 'īmene i'ora a Paulo rāua ko Sila ki te Atua, ē tē 'akarongo maira te au mou'āuri i a rāua ra.
26Ē kāre akera i mamia, 'e ngāueue'anga 'enua ma'ata tēta'i i reira, ē kua keu katoa atura te tango o taua 'are 'āuri ra. I reira rāi, ma'eu 'ua i'ora te au ngūtupa katoa o te 'are 'āuri, ē kua matara akera te 'āuri piri'anganaoa o te au mou'āuri kātoatoa ra.
27Kua 'itirere akera te moe a te tiaki mou'āuri ra, ē i tōna kite'anga i te au ngūtupa o te 'are 'āuri i te ma'eu 'ua'anga, kua unu'i akera aia i tāna koke ē kua vaitata i te tā i aia 'ua'orāi, i te manako'anga 'oki aia ē, kua 'oro kē atu te au mou'āuri ra.
28Kua kāpiki maira a Paulo ma te reo ma'ata, nā kō maira, “Auraka e toetoeā i a koe 'ua'orāi; tei konei 'oki mātou pou roa.”
29Kua pati atura te tiaki mou'āuri i tēta'i tūrama, 'oro viviki 'ua atura ki roto, 'akatopa i'ora ki raro ki mua a'o i a Paulo rāua ko Sila ma te rūtetetete.
30Kua arataki atura aia i a rāua ki va'o, ē kua nā kō atura, “E tama mā, 'e a'a tāku ka rave e tikāi kia 'akaora'ia au?”
31Kua pa'u maira rāua, “E 'irinaki i te 'Atu i a Iēsū, ē ka 'akaora'ia koe ē tō ngutu'are katoa.”
32Ē kua 'akakite atura rāua i te karere o te 'Atu ki aia ē tōna ngutu'are tangata kātoatoa.
33Ē i taua ora o te pō ra, kua rave akera aia i a rāua, ē kua 'ōrei i'ora aia i tō rāua kāravarava ra. Ē i reira rāi, kua bāpetīto'ia i'ora aia ē tōna ngutu'are tangata kātoatoa ra.
34Ē kua arataki atura aia i a rāua ki roto i tōna 'are, ē kua 'akano'ono'o akera aia i tēta'i kaingākai nō rāua; kua rekareka rava atura 'oki aia ē tōna ngutu'are tangata rava rāi, nō te mea, kua 'irinaki rātou i te Atua.
35E ao akera, kua tono maira ngā 'akavānui i te au 'akavā, nā kō maira, “E tuku atu i ngā tangata ra ki va'o.”
36Kua 'akakite maira te tiaki mou'āuri i taua karere ra ki a Paulo ē, “Kua tono mai ngā 'akavānui i te karere, e tuku atu i a kōrua ki va'o. Nō reira, e 'akaruke 'ua kōrua, e 'aere ma te 'au.”
37Kua karanga atura a Paulo ki a rātou, “Kua pāpā mai rātou i a māua, ngā tangata Rōma nei, i mua i te kātoatoa, kāre rava i 'akavā'ia ana, ē kua titiri'ia māua ki roto i te 'are 'āuri. Ē i tēianei, tē tuku pōiri 'ua āinei rātou i a māua ki va'o? Auraka rava ia! Nā rātou 'ua'orāi e 'aere mai e tuku atu i a māua ki va'o!”
38Kua 'akakite atura te au 'akavā i taua au tuatua ra ki ngā 'akavānui ra. Ē kua mataku i'ora rātou i tō rātou 'akarongo'anga ē, 'e ngā tangata Rōma rāua.
39Kua 'aere maira rātou ē kua tuatua marū maira i reira ki a rāua, ē kua arataki atu rātou i a rāua ki va'o, ē kua pati atura ki a rāua e 'akaruke i te 'ōire.
40Kua 'akaruke maira rāua i te 'are 'āuri, ē kua tomo atura ki roto i te 'are o Ludia. Ē i tō rāua kite'anga atu i te au taeake, kua 'akamāro'iro'i atura rāua i a rātou, ē kua 'aere atura.
Who We AreWhat We EelieveWhat We Do
2025 by iamachristian.org,Inc All rights reserved.
