2 Timōteo 3 - Cook Island Maori Revised New Testament(CIMRNT)

Te kino o te au rā 'openga

1Kia ma'ara meitaki koe ē, ka riro te au rā 'openga o tēianei ao 'ei tuātau manamanatā ma'ata.

2Kua riro 'oki te tangata i te 'akaperepere 'ua i a rātou 'ua'orāi ē te 'inangaro atu i te moni. Ka riro rātou 'ei aronga pūpūva'a, kōperepere, va'a 'akakino ē te kaurarokore i te ngā metua. 'E ngākau 'akameitakikore ē te tapukore tō rātou.

3Kāre ō rātou aro'a mou ē te tangi i te tangata, ē ka 'o'onitua i a rātou. 'E aronga manava kino rātou ē te roto riri, tei 'akava'ava'a i te au mea meitaki.

4Ka tuku pikika'a rātou i te au mea muna. Ka rapurapu 'ua rātou i te rave i tēta'i 'ua atu 'anga'anga. Ka 'akateitei'ia rātou e te ngākau parau, ē ka 'inangaro 'ua rātou i te au mea nanave, ē kāre i te Atua.

5I va'o 'e tū 'ākono Atua tō rātou, kua 'akaruke rā rātou i te ririnui o te reira. E 'āriu kē katoa mai koe mei taua tū tangata ra.

6I rotopū 'oki i a rātou ēta'i tangata tei 'akaō 'ua ki roto i te au ngutu'are ē tei riro atura i a rātou te au va'ine manako 'āpikepike i 'akateima'a'ia e te au 'ara ē i kika kē'ia e te au noinoi tūkēkē.

7Tē tinamou 'ua nei taua au va'ine ra i te 'āpi'i mai, ē kāre tākiri i rauka i a rātou te kite i te tuatua mou.

8Exo 7.11Mei tā Iāne rāua ko Iāmebera pāto'i'anga i a Mōse ra, pērā katoa tō aua tangata ra pāto'i'anga i te tuatua mou. 'E au tangata manako tārevakē tākiri rātou, ē kāre tō rātou 'irinaki i te mea tika tikāi.

9Kāre rā e manuia roa tā rātou 'anga'anga, nō te mea, ka mārama te kātoatoa i tō rātou nēneva, mei tei tupu rāi ki a Iāne rāua ko Iāmebera.

Te au ako'anga 'openga

10Ko koe rā, kua 'ākara meitaki koe i tāku 'āpi'i'anga, te tū o tōku ora'anga, ē tōku 'akakoro'anga, pērā katoa tōku 'akarongo, tōku 'akakoromaki, tōku aro'a ē tōku mou mārie'anga.

11a: Anga 13.14-52; b: Anga 14.1-7; c: Anga 14.8-20Kua kite koe i te au tākinga kino'anga'ia ē te au mate tei tupu mai ki āku i Ānētiōka, i Īkōnio ē i Lūsētera. Auē te au tākinga kino'anga tāku i 'akakoromaki ē! Nā te 'Atu rā i 'akaora mai i āku i taua au mea rava rāi!

12Ē pērā katoa rāi, ka tākinga kino'ia te tangata rava rāi tei umuumu i te ora'anga 'ākono Atua nā roto i te piri'anga ki te Mesia ra i a Iēsū.

13Ko te aronga kino ra ē te aronga tāpikika'a, ka kino ē ka kino ma'ata 'ua atu. Ka 'akavāvare atu rātou ē ka 'akavāvare'ia mai rātou 'ua'orāi.

14Ko koe rā, e tāmou mārie koe ki tā'au i 'āpi'i maira ē tā'au i 'āriki 'ei tuatua mou. Kua kite 'oki koe ē, ko 'ai tō'ou pū'āpi'i,

15ē mei tō'ou tamariki'anga mai rāi, kua kite koe i te Tuatua Tapu te ka tika i te 'ō ake ki a koe i te pakari, kia rauka i a koe te rāvenga ora nā roto i te 'irinaki'anga i te Mesia ra i a Iēsū.

16Te au Tuatua Tapu katoa i tātā'ia ra, 'e mea 'akauru'ia mai ia e te Atua ē 'e pu'apinga nō te 'āpi'i atu, nō te 'akamārama atu ki te tangata i tō rātou au tārevakē, nō te 'akatika'anga i te ora'anga tangata, ē nō te 'āpi'i'anga mai i te tuatua tika.

17Kia pērā, ka meitaki tikāi te tangata o te Atua, ē tē vai te'ate'amamao nei nō te tū 'anga'anga meitaki rava rāi.