Philipi 2 - Cook Island Maori Revised New Testament(CIMRNT)

Tō te Mesia tā'aka'aka'anga i aia ē tōna 'akangāteitei'anga'ia

1Ē tēianei, kua 'akamāro'iro'i'ia rāi kōtou nā roto i tō kōtou piri'anga ki te Mesia, ē kua riro mai tōna aro'a 'ei pūma'ana nō kōtou. Kua tā'okota'i'ia kōtou ma tōna Vaerua, ē 'e ngākau aro'a ē te tangi rāi tō kōtou tēta'i ki tēta'i.

2Nō reira, ka 'akarava mai kōtou i tōku nei rekareka nā roto i tō kōtou manako'anga 'okota'i, ma te 'inangaro 'okota'i, ma te ngākau ē te 'akakoro'anga 'okota'i.

3Auraka kōtou e rave i tēta'i mea ma te mārō, mē kāre nō te nengonengo pu'apingakore, e manako rā ma te 'aka'aka ē, e meitaki atu tēta'i ē tēta'i i a kōtou 'ua'orāi.

4Auraka te tangata e manako 'ua i tei tau i aia 'ua'orāi, e ma'ara katoa rā aia i a ēta'i kē ra.

5Kia 'okota'i rāi ō kōtou tū ngākau ē tō te Mesia ra tō Iēsū:

6Ko tōna tū ko te tū 'oki ia o te Atua.

Kāre rā aia i manako i te umuumu kia 'āite aia ki te Atua.

7Kua tuku kē atura rā aia i tōna 'ua'orāi tū,

ē kua rave i tō te tuika'a i te riro'anga mei te tangata nei rāi.

Ē i tōna kitea'anga'ia mai mei te tangata nei te tū,

8kua tā'aka'aka aia i aia 'ua'orāi

i te kauraro'anga e tae 'ua atu ki te mate,

ki te mate sātauro ra.

9Ko te tumu 'oki ia i 'akangāteitei rava'ia atu ei aia e te Atua,

ē i 'ōronga'ia mai ei ki aia i te ingoa i ma'ata 'ua atu te ngāteitei i te au ingoa rava rāi.

10 Isa 45.23 Nō reira, kia tuku te au turi katoa ki raro,

tō te rangi, tō runga i te 'enua, ē tō raro ake i te 'enua,

'ei 'akangāteitei'anga i te ingoa o Iēsū.

11Ē kia 'a'aki te au va'a rava rāi ē, “Ko Iēsū Mesia te 'Atu,”

'ei 'akakakā'anga 'oki i te Atua te Metua ra.

Kia kakā kōtou mei te tūrama i te ao nei

12Ē tēnā na, e aku au 'akaperepere ē, kua kauraro mai kōtou i āku i te au 'ati'anga rava rāi. I pērā kōtou i tōku no'o'anga i rotopū i a kōtou; kia ma'ata atu rā i tēianei i tōku ātea kē'anga. E tāmou i te 'anga'anga ma te mataku ē te rūtetetete kia rauka te kī'anga o tō kōtou rāvenga ora.

13Ko te Atua 'oki tei 'anga'anga ki roto i a kōtou na i te 'inangaro ē te rave rāi i tāna i anoano ra.

14E rave i te au mea rava rāi ma te kō'umu'umukore ē te taumārōkore,

15Deut 32.5kia riro mai kōtou 'ei aronga mā tikāi ē te 'apakore, koia 'oki, 'ei tamariki kinokore nā te Atua i rotopū i tēia uki tāpikipiki ē te tārurikē'ia nei. Kia kakā rāi kōtou i rotopū i a rātou mei te au tūrama i tēianei ao,

16i te āru'anga i te karere ora. 'E parau'anga te reira nōku i te rā e tae mai ei te Mesia ra; nō te mea, kāre i riro tōku ora'anga ē tāku 'anga'anga 'ei mea pu'apingakore.

17'Ua atu oki ē kia 'akamaringi'ia atu tōku toto 'ei tu'anga nō te 'ātinga i 'apai 'akakite 'ua'ia e tō kōtou 'akarongo, ka rekareka ia au. Ko tātou katoa ka rekareka kāpipiti ei.

18Kia pērā katoa rāi kōtou i te rekareka'anga, ko tōku rekareka rāi ia.

Ko Tīmōteo ē ko Ēpāperodito

19Mē ka tika i te 'Atu ra ko Iēsū, tē mānakonako nei au ē, ka tono atu au i a Tīmōteo ki a kōtou kia roa poto ake, kia mareka au i te kite'anga i te au tuatua nō kōtou na.

20Kāre 'oki ōku 'e tangata tei 'āite ki aia i te ngākau 'ākonokono tikāi i tā kōtou na.

21Tē kimikimi 'ua nei 'oki te tangata rava rāi i tā rātou 'ua'orāi, kāre i tā Iēsū Mesia.

22Kua kite kōtou i tōna tūranga meitaki. Kua kāpiti aia ki āku mei te tamaiti ki tōna metua i te 'anga'anga pakari nō te tupu'anga o te 'ēvangelia.

23Ko ia rāi tāku i manako i te tono atu, mē pāpū ake ana i āku te tuatua nōku 'ua'orāi.

24Ē tē 'irinaki nei au ē, mē ka tika i te 'Atu, ka tae atu au ki a kōtou, kāre e roa'ia.

25Tē manako nei au ē, 'e mea tau i te tono atu i tō tātou taeake i a Ēpāperodito ki a kōtou, 'e 'oa ia nōku i te 'anga'anga ē te pāruru'anga i te 'ēvangelia, ē 'e karere nā kōtou tei mātuāpuru mai i āku nei i tōku nei ngere'anga.

26Tē 'inangaro ma'ata nei 'oki aia i te 'ārāvei i a kōtou rava rāi ē tē tangi nei tōna ngākau, nō te mea, kua tuatua'ia ki ō kōtou na ē, kua roko'ia aia e te maki.

27I maki ma'ata ana aia ē kua vaitata rāi i te mate. I aro'a mai rā te Atua i aia, ē kāre rā i aia anake ra, i āku katoa nei rāi, kia kore e tupu tēta'i tūmatetenga ōku nā runga ake i tēta'i.

28'E ma'ata tōku 'inangaro i te tono atu i aia kia rekareka kōtou i te 'ārāvei 'aka'ou atu i aia, ē kia iti mai tōku tūmatetenga.

29Ē tēnā na, e 'ō'ō mai kōtou i aia i roto i te aro'a o te 'Atu ma te rekareka ma'ata, ē e 'akangāteitei i te aronga mei aia rāi te tū,

30nō te mea, i vaitata ana aia i te mate nō te 'anga'anga a te Mesia i te 'ōronga'anga mai ki āku i te tauturu kāre i rauka i a kōtou i te 'ōronga mai, ma te ma'arakore i tōna 'ua'orāi ora.