'Anga'anga 3 - Cook Island Maori Revised New Testament(CIMRNT)

Te 'akaora'anga i te tangata pirikoki

1'Aere atura a Pētero rāua ko Ioane ki te 'iero ra nō te pure'anga 'oki o te ora toru ra.

2Ē ko tēta'i tangata, 'e pirikoki mei te 'ānau'anga mai i mātau i te 'apai'ia ki reira, kua tuku'ia i te au rā rava rāi ki te ngūtupa o te 'iero tei tuatua'ia ra ē ko te Ngūtupa Mānea, kia pati 'apinga aia ki te tangata tei tomo ki roto i te 'iero ra.

3I tōna kite'anga i a Pētero ē Ioane i te tomo'anga ki roto i te 'iero, kua pati mai ai i te 'apinga.

4Kua 'ākara tika atura a Pētero ē Ioane katoa ki aia. Kua tuatua atura a Petero, “'Ākara mai ki a māua.”

5Kua 'ākara atura aia i a rāua ma te manako ē, ka rauka i aia tēta'i 'apinga nō kō mai i a rāua.

6Kua nā kō atura a Pētero, “Kāre āku 'ārio ē te 'auro, ko tāku rā ka 'ōronga atu nā'au; i te ingoa o Iēsū Mesia nō Nāzarēta, e tū ki runga, e 'aere.”

7Kua 'akatū maira a Pētero i aia ki runga ma te mou i tōna rima katau. Ē i taua 'ati'anga rāi, kua māro'iro'i tōna vaevae ē te puke vaevae.

8Rere 'ua maira aia ki runga, tū i'ora, 'ā'āere atura; ē kua tomo atura ma rāua katoa ki roto i te 'iero ma te 'ā'āere'anga ē te rererere'anga ē te 'akameitaki'anga i te Atua.

9Kua kite 'oki te au tangata rava rāi i aia i te 'ā'āere'anga ē te 'akameitaki'anga i te Atua,

10ē kua ma'ara akera 'oki i a rātou ē, ko ia rāi tei no'o ana i te Ngūtupa Mānea ma te pati 'apinga, ē kua vā ma'ata i'ora rātou ē kua ūmeremere i tei tupu ki taua tangata ra.

Tē tuatua nei a Pētero i roto i te 'iero

11Tē piri 'ua ra 'oki te tangata pirikoki ki a Pētero ē Ioane, kua 'oro maira te tangata rava rāi ki a rātou i roto i te porotito tei tuatua'ia ra ē nō Sōlomona ma te ūmere ma'ata.

12E kite akera a Pētero, kua tuatua atura aia ki te tangata rava rāi, “E te au tangata nō Īserā'ela nei, 'e a'a kōtou i ūmere ei i tei tupu? 'E a'a 'oki kōtou i 'ākara 'ua mai ei ki a māua, mei te mea ra ē, nā roto i tō māua 'ua'orāi mana ē te tū meitaki i rauka ai i aia kia 'aere?

13Exo 3.15Nā te Atua nō Āberahāma, nō Īsā'aka ē nō Iākōba, te Atua o tō tātou 'ui tupuna ra, i 'akakakā mai i tōna tāvini ko Iēsū, tā kōtou i tuku atu kia 'akavā'ia, ē kua kōpae atu kōtou i aia i mua i a Pilato, i tōna manako'anga ē, e tau kia ora aia.

14Māt 27.15-23; Mār 15.6-14; Luk 23.13-23; Ioa 19.12-15Kua kōpae rā kōtou i te Mea Tapu ē te Tuatua tika, ē pati atura kia 'ōronga 'ua'ia mai ki a kōtou tēta'i tangata tā tangata ra.

15Nā kōtou i tāmate i te tumu o te ora; nā te Atua rā i 'akatū mai i aia mei te mate mai. Ko mātou nei 'oki te au kite.

16Nō tōna ingoa, nā roto i te 'irinaki'anga 'oki i te ingoa o Iēsū, i 'akamāro'iro'i'ia ai tēianei tangata tā kōtou e 'ākara nei ē e kite nei. Nō te 'irinaki'anga 'oki nō kō mai i a Iēsū i rauka ai i aia tēianei tū māro'iro'i tikāi i mua i a kōtou rava rāi.

17“Ē tēianei, e te au taeake, kua mārama au ē, kua 'akapērā kōtou nō te kitekore 'oki, mei tō kōtou au arataki katoa na.

18Inārā, i pērā 'oki te Atua i te 'akatupu'anga i tāna i 'akakite takere mai nā roto i te va'a o te au peroveta rava rāi ē, ka mamae tāna Mesia ra.

19Ē tēianei, e tatarā'ara ē e 'āriu mai kia 'akakore'ia mai tā kōtou au 'ara,

20kia tae mai te 'ati'anga o te 'aka'ou'anga nō kō mai i te 'Atu, ē kia tono mai aia i te Mesia ko Iēsū, tei 'akataka takere'ia nō kōtou;

21ko te ka no'o i te rangi e tikāi, e tae 'ua atu ki te tuātau e 'akatupu 'aka'ou'ia ai te au mea rava rāi; ko te tuātau 'oki tā te Atua i tuatua mai nā roto i te va'a o tāna au peroveta tapu mei 'ito mai rāi.

22Deut 18.15,18Kua tuatua ana 'oki a Mōse ē, ‘Ka 'akatupu te 'Atu tō kōtou Atua mei rotopū i tō kōtou au taeake i tēta'i peroveta nō kōtou, mei āku nei rāi. E 'akarongo atu kōtou i aia i te au mea rava rāi tāna ka 'akakite atu ki a kōtou.

23Deut 18.19Ē ko te au tangata rava rāi e kore e 'akarongo i taua peroveta ra, ka tīpū kē'ia rātou mei roto mai i te 'iti tangata ra.’

24“Ē te au peroveta rava rāi tei tuatua mai, mei a Sāmuela mai ē i a rātou i muringa a'o, kua 'akakite kātoatoa mai rātou i tēianei au rā.

25Gen 22.18Ko kōtou 'oki te au tamariki a te au peroveta ra ē te au tamariki nō te kōreromotu tā te Atua i papa'u mai ki tō kōtou 'ai tupuna ra, i te nā kō'anga atu ki a Āberahāma ē, ‘Ē i tō'ou ra 'uānga e 'akameitaki'ia ai te au 'iti tangata rava rāi o te ao nei.’

26Kua tono mai te Atua nā mua ki a kōtou i tōna tāvini, tāna i 'akatū mai ki runga, kia 'akameitaki mai aia i a kōtou nā roto i te 'aka'āriu'anga mai i a kōtou tātakita'i mei tō kōtou au kino mai.”