1 Ezek 9.4; Apo 7.3 Kua 'ākara atura au, ē inā, tē tū 'ua ra te Punua Māmoe i runga i te Maunga Siona, ko ia ē e ta'i 'ānere e 'ā nga'uru mā 'ā i te tauatini tangata ma tōna ingoa ē te ingoa o tōna Metua i tātā'ia ki runga a'o i tō rātou rae.
2Kua 'akarongo atura au i tēta'i reo mei te rangi mai, mei te 'aruru o te au vai 'e mānganui ē mei te māngūngū rāi. Ko te reo tāku i 'akarongo ra mei te reo katoa ia o te aronga 'akatangi kītara i te 'akatangi'anga i tā rātou au kītara.
3Kua 'īmene rātou i tēta'i 'īmene 'ōu i mua i te aroaro o te terōno, i mua i te aroaro o ngā mea ora e 'ā ra ē i mua i te aroaro o te aronga pakari. Ē kāre rava 'e tangata e rauka i te 'āpi'i mai i taua 'īmene ra, māri rā ko te ta'i 'ānere e 'ā nga'uru mā 'ā i te tauatini tangata tei 'oko'ia mai nō roto mai i tēianei ao.
4Ko te aronga 'oki tēia tei kore i 'akavi'ivi'i i a rātou ki te au va'ine. 'E pāretēnia 'oki rātou. Tē āru nei rātou i te Punua Māmoe i tōna au 'aerenga rava rāi. Kua 'oko'ia mai rātou 'ei 'ua mua nā te Atua ē nā te Punua Māmoe nō roto mai i te au tangata nei.
5Zeph 3.13Kāre rava 'e pikika'a i kitea'ia mei roto mai i tō rātou va'a. 'E 'apakore 'oki rātou.
Te au karere o ngā 'āngela e toru6Kua kite atura au i tēta'i 'āngela kē i te rere'anga nā rotopū i te māreva. 'E karere mutukore tāna e tau kia tūtū 'aere'ia ki te aronga e no'o i te 'enua nei, ki te au 'iti tangata, te au kōpū tangata, te au reo ē te au tū tangata rava rāi.
7Kua kāpiki aia ma te reo ma'ata, “Ka mataku i te Atua ē e 'akakakā i aia, nō te mea kua tae te tuātau o tāna 'akavā'anga. E 'akamori atu i aia ko tei 'anga i te rangi ē te 'enua, te tai ē te au punāvai.”
8 Isa 21.9; Ier 51.8; Apo 18.2 Kua āru maira tēta'i 'āngela kē atu, ko te rua ia, ē kua nā kō maira, “Kua 'inga, kua 'inga te 'ōire ma'ata ko Bābulōnia, ko tei 'akainu i te au pā 'enua rava rāi i te uaina o tāna 'akaturi'anga.”
9Kua āru 'aka'ou mai tēta'i 'āngela i a rāua, ko te toru ia, ē kua nā kō maira ma te reo ma'ata, “Mē ka 'akamori tēta'i tangata i te puaka tā'ae ē tōna tiki, ē mē ka 'āriki i te tāpa'o ki runga a'o i tōna rae mē kāre ki runga a'o i tōna rima,
10a: Isa 51.17; b: Gen 19.24; Ezek 38.22ka inu aia i te uaina o tō te Atua riri, tei riringi'ia ma te 'irokore ki roto i te kapu o tōna riri. Nā te a'i ē te teio e 'akamamae i aia i mua i te aroaro o tāna au 'āngela tapu ē te Punua Māmoe.
11Isa 34.10Te au a'i o tō rātou mamae ka kake ki runga e tuātau 'ua atu. Kāre rava ō rātou tei 'akamori i te puaka tā'ae ē tōna tiki, ē tei 'āriki mai i te tāpa'o o tōna ingoa 'e 'akaea'anga i te pō ē te ao.”
12Ko tēia 'oki te ora o tō te aronga tapu 'akakoromaki, ko tei 'ākono i te 'akaue'anga a te Atua ē te 'irinaki i a Iēsū.
13Kua 'akarongo atura au i tēta'i reo nō te rangi mai i te nā kō'anga mai, “E tātā koe i tēia: ‘'E ao tō te aronga mate te ka mate i roto i te 'Atu i tēianei ē ā muri 'ua atu.’ ” Koia ia, tē tuatua maira te Vaerua, ka 'akaea rātou i tā rātou au 'anga'anga. E āru 'oki tā rātou au 'anga'anga i a rātou.
Te mou o te 'enua nei14 Dan 7.13 Kua 'ākara atura au, ē inā, 'e tiao teatea, ē tē no'o ra tēta'i i runga i taua tiao ra mei te tangata te tū, ma te korōna 'auro i runga a'o i tōna ūpoko ē te mātipi mingi kokoi i te rima.
15Ioel 3.13Kua 'aere maira tēta'i 'āngela kē mei roto mai i te nao i te kāpiki'anga ma te reo ma'ata ki tei no'o ki runga a'o i te tiao ra, “Ka tā'anga'anga ana i tā'au mātipi mingi ē kokoti, kua tae mai 'oki te tuātau nō te kokoti'anga. Kua para rava 'oki te mou o te 'enua nei.”
16Ē ko ia tei no'o i runga a'o i te tiao ra, kua tā'anga'anga i tāna mātipi mingi. Kua kokoti'ia i'ora te mou o te 'enua.
17Kua 'aere atura tēta'i 'āngela kē mei roto mai i te nao ki runga i te rangi, 'e mātipi mingi kokoi katoa tāna.
18Kua 'aere 'aka'ou mai rāi tēta'i 'āngela kē mei te 'atarau mai, 'e mana tōna nō runga i te a'i nei. Ē kua kāpiki atura aia ma te reo ma'ata ki te 'āngela ma te mātipi mingi kokoi, nā kō maira, “Ka tā'anga'anga ana i te mātipi mingi kokoi nā'au, ka kokoti ei i te kā'ui vine o te 'enua nei, kua para rava 'oki te vine.”
19Kua tā'anga'anga atura te 'āngela i te mātipi mingi kokoi ki runga a'o i te 'enua nei, kokoti i'ora i te vine o te 'enua nei, ē kua 'uri atura ki roto i te taomi'angā vine ma'ata ra, ko te riri 'oki ia o te Atua ra.
20Isa 63.3; Aue 1.15; Apo 19.15Kua takataka'i'ia i'ora te taomi'angā vine i va'o i te 'ōire ra. Kua tae maira te toto mei taua taomi'angā vine ra e rua 'ānere maire te mamao, e ono 'oki tapuae te 'o'onu.
Who We AreWhat We EelieveWhat We Do
2025 by iamachristian.org,Inc All rights reserved.
