Ephesia Nō runga i tēia leta - Cook Island Maori Revised New Testament(CIMRNT)
Nō runga i tēia leta“Kia 'akameitaki'ia te Atua, te Metua o tō tātou 'Atu ra, ko Iēsū Mesia, ko tei 'akameitaki mai i a tātou nei ki te au tū 'akameitaki'anga vaerua rava rāi i te ao ra nā roto i te Mesia ra” (1.3).Kua 'akamata a Paulo i tāna leta ki te Keretitiāno i Ēphēsia nā roto i te 'akama'ara ki a rātou i te manako ma'ata o tāna karere, koia 'oki, kua mate te Mesia ki runga i te sātauro kia rauka i a tātou te rāvenga ora (1.7-8). Kua 'akatū rā te Atua i te Mesia mei te mate maira, ē 'akano'o i'ora i aia ki tōna rima katau i te ao ra, ē tē tūtara nei te Mesia i tēianei ao; ē 'eia'a i tēianei ao anake 'ua, i te ao katoa rā ā muri atu (1.20-21).Ko te Mesia 'oki, tei 'akariro i te Ngāti Iūda ē te 'ētene 'ei 'iti tangata 'okota'i i te 'akaātea'anga i te tū 'enemi, koia 'oki, “te patu 'akatakakē i rotopū” (2.14), ē kua tā'okota'i i a rātou kātoatoa 'ei nao tapu, 'ei ngā'i e no'o ei te Vaerua o te Atua (2.22), mei tei tau ki te 'akakoro'anga o te Atua mei muatangāna mai rāi (3.11).'Okota'i 'Atu, 'okota'i Vaerua o te Atua, 'okota'i Atua, ko te Metua ia nō te tangata rava rāi (4.4-6). Nō reira, kia 'āriki rāi te Keretitiāno ē, nā te Vaerua i tā'okota'i ei tō rātou ngākau kia 'au rātou (4.3). Ko te 'akakoro'anga kia 'okota'i te au Keretitiāno kātoatoa ki a Iēsū, ko te manako ma'ata ia o tēia leta. E rua nga'uru 'oki tōna tā'iku'anga'ia. 'Okota'i 'akarongo, 'okota'i bāpetīto'anga. Nā roto i te reira ka riro te au Keretitiāno 'ei kōpapa 'okota'i.Ko Ēphēsia, 'e 'ōire ma'ata tēia, ē 'e ava tōna, i te tu'anga 'opunga i te pae tai o Āsia Mīnora. Ko Tūrēkia te ingoa o taua 'enua i tēianei. I tō Paulo tuātau, ko te 'ā tēia o te au 'ōire mama'ata o te 'au Rōma. Ko te ngā'i ta'ito tēia nō te peu 'akamori 'ītoro, ē ko te 'ītoro va'ine ma'ata tei 'akamori'ia ki reira, ko Diāna ia ('Anga'anga 19).Kua 'akakite a Paulo ki tō Ēphēsia ē, kua 'akatūkē tākiri'ia tō rātou ora'anga nā roto i tō rātou kāpiki'anga'ia ki te ora'anga 'ōu (4.17—5.20). Ko te aronga tei 'āriki i te 'Atu, 'e tamariki 'akaperepere rātou nā te Atua, ē kia āru rātou i te Atua e tikāi (5.1). I mua ake, kua no'o rātou i te pōiri, i tēianei rā, tē no'o nei rātou i roto i te mārama ē kia kakā rāi tō rātou mārama i mua i te tangata e tikāi (5.8-9).Kua 'āpi'i a Paulo i te tāne ē te va'ine, te tamariki ē te au metua, te au tuika'a ē te au pū i te tū o te ora'anga Keretitiāno (5.21—6.9).Kāre rava a Paulo i 'akangaropōina i te tākinga meitaki o te Atua:“Ko te Atua rā i roto i tōna tākinga meitaki ma'ata, kua aro'a ma'ata rava mai i a tātou, ē kua 'ōronga mai ki a tātou nei i te ora i roto i te Mesia, noa atu ē 'e aronga mate tātou nō te au 'ara. Kua 'akaora'ia kōtou e te aro'a 'ua!” (2.4-5).“Kua 'akaora'ia 'oki kōtou e tō kōtou 'irinaki'anga i tōna aro'a 'ua. Ē kāre te reira 'irinaki'anga ē, nō kō mai i a kōtou 'ua'orāi, 'e mea 'ōronga'ia mai rā ia e te Atua” (2.8).Te 'akano'ono'o'anga o tēia leta1. Te aro'a'anga 1.1-22. Ko te Mesia tei tuku mai i te 'akameitaki'anga vaerua 1.3—3.213. Te ora 'ōu i te 'okota'i'anga ki te Mesia 4.1—6.204. Te ve'eve'e'anga aro'a 'openga 6.21-24
