'Anga'anga 28 - Cook Island Maori Revised New Testament(CIMRNT)

Ko Paulo i te 'enua ko Mēlita

1E ora anake atura mātou, kua kite akera mātou ē, ko Mēlita te ingoa o taua 'enua ra.

2Kua tākinga meitaki ma'ata roa mai te au tangata o taua 'enua ra i a mātou: kua ta'u i'ora 'oki rātou i te a'i, ē kua arataki atura i a mātou rava rāi ki reira, nō te mea, tē topa 'ua maira te ua ē tē anu ra 'oki.

3Kua ko'iko'i i'ora a Paulo i tēta'i ruru va'ie, ē i tōna tuku'anga atu i te reira ki runga i te a'i, kua rere maira tēta'i vīpera ki va'o nō te vera 'oki o te a'i, ē kua piri maira ki runga i tōna rima.

4Kia 'ākara maira taua au tangata ra i taua ōvī ra i te tautau'anga mai mei tōna rima ra, kua kārangaranga i'ora rātou, rātou 'ua'orāi. “'E mea pāpū ē, 'e tangata tā tangata aia nei; ko te tuatua nōna kāre aia e ora mei tāna i rave, noa atu ē kua ora aia mei te moana mai.”

5Kua rūrū atura a Paulo i taua ōvī ra ki roto i te a'i, kāre tākiri rā aia i roko'ia e te kino.

6Ko rātou rā, tē tāpapa 'ua ra rātou i te 'ē'ē'anga aia ē te 'inga'anga ki raro i taua 'ati'anga rāi, ka mate rava atu ei. Kia tāpapa rā rātou e roa akera, ē kāre atura rātou i kite i tēta'i 'ua atu kino i te tupu'anga ki aia, kua taui atura rātou i tō rātou manako ē kua kārangaranga atura ē, “'E atua aia!”

7Ē i vaitata ki taua ngā'i ra te au kāinga o te tūtara o taua 'enua ra, ko Pōpiliō tōna ingoa, ko tei 'ō'ō mai i a mātou, ē tei 'ākono mai i a mātou 'ei manu'iri nāna i roto i tōna 'are e toru rā.

8Tē maki'ia ra te metua tāne o Pōpiliō e te vera ma te 'eke toto, tē 'aka'āvai 'ua ra. Kua 'aere atura a Paulo e 'ātoro i aia, pure i'ora, tuku atura i ōna rima ki runga a'o i aia ē e 'akaora atura i aia.

9E oti akera taua 'akaora'anga ra, kua 'akamata akera te aronga maki kātoatoa o taua 'enua ra i te 'aere mai, ē kua 'akaora'ia i'ora,

10ē kua 'akangāteitei ma'ata maira rātou i a mātou. Ē i tō mātou 'akaruke'anga i muri roa mai, kua tuku maira rātou i te au mea umuumu'ia ki runga i te pa'ī.

Te tere mei Mēlita ki Rōma

11E topa akera e toru marama ki muri, kua tere atura mātou nā runga i tēta'i pa'ī nō Ālekānētēria mai tei 'akaruru i te tuātau 'uri'ia i taua 'enua ra. Ko te “Mā'anga Tamāroa” te tiki 'akairo o taua pa'ī ra.

12E kake atura mātou ki uta i Sirakusa, ē kua no'o i'ora ki reira e toru rā.

13Ē tē 'ano atura mātou mei reira atu, tae atura ki Rēgio. E pō ta'i akera, kua 'akamata maira te matangi tonga i te 'arara mai, e pō rua akera 'oki, tae atura mātou ki Pūteoli.

14Ē 'e aronga taeake tei kitea'ia e mātou ki reira, ko tei pati 'akatenga mai ki a mātou kia no'o mātou ki ō rātou ra e 'itu rā. I pērā 'oki tō mātou tere ki Rōma.

15I tō te au taeake i Rōma 'akarongo'anga i te karere i a mātou, kua 'aere maira rātou e 'ārāvei mai i a mātou e tae 'ua maira ki Āpio Fora ē te 'Are Tāpae'anga Toru. Ko Paulo, i tōna kite'anga atu i a rātou, kua 'akameitaki atura i te Atua, ē māro'iro'i atura aia.

Tei Rōma a Paulo

16Kia tomo atu mātou ki roto i a Rōma, kua 'akatika'ia a Paulo kia no'o anake 'ua aia ē tēta'i va'e'au 'ei tiaki i aia.

17E topa akera e toru rā ki muri, kua kāpiki atura a Paulo i te aronga nunui o te Ngāti Iūda ki tēta'i 'uipā'anga. Ē kia putuputu maira rātou, kua karanga atura aia ki a rātou, “E tama mā ē te au taeake nei, ko au, noa atu ē kāre au i 'apa ana i tō tātou 'iti tangata, mē kāre ra i tā tātou au peu 'ui tupuna ra, kua tuku mou'āuri'ia atu rāi au ki roto i te rima o tō Rōma i Iērūsalēma ra.

18E oti akera rātou i te uiui mai i āku, kua 'āriki rātou i te tuku i āku, nō te mea, kāre āku mea i rave e tau ei i āku te mate.

19

30No'o atura a Paulo e rua akera mata'iti pūpū ki roto i tōna 'ua'orāi 'are tāra'u ra, ē kua 'āriki maira aia i te tangata rava rāi tei 'aere mai e 'ārāvei i aia ra,

31ma te 'akakite atu i te bāsileia o te Atua ē te 'āpi'i atu i te karere o te Atu ra ko Iēsū Mesia ma te matakukore, ē kāre tākiri aia i ārairai'ia.