1 Petero 4 - Cook Island Maori Revised New Testament(CIMRNT)

Te 'akatūkē'anga'ia o te ora'anga

1Kua mamae te Mesia i te pae kōpapa. Nō reira, kia vai te'ate'amamao kōtou nō te mamae ma te 'akamanako ē, ko tei mamae i te pae kōpapa ra, kua kore ia i te rave i te 'ara.

2Nō reira, kāre te toenga o te ora'anga i roto i te kōpapa nei nō te 'ākono 'aka'ou i te au 'inangaro tangata 'ua nei, nō te 'ākono rā i tō te Atua anoano.

3Kua roa rava tō kōtou rave'anga i tō te au 'ētene 'inangaro i te au tuātau tei topa ki muri. Kua aruaru 'oki kōtou i te au peu kanga, te noinoi, te konā kava, te peu kikino ma te inuinu mārikongakore, ē te 'akamori'anga 'ītoro taukore rava.

4Tē ūmere 'ua ra te au 'ētene i te mea ē, kāre kōtou i piri 'aka'ou ki a rātou i taua au peu kanga ma'ata rava ra, ē tē 'akakino nei rātou i a kōtou.

5Ka 'akakitekite rā rātou i te tuatua ki aia e tiaki 'ua nei 'ei 'akavā i tei ora ē i tei mate katoa.

6Nō reira 'oki i tūtū katoa'ia ai te 'ēvangelia ki te aronga i mate, kia 'akavā'ia rātou i te pae kōpapa mei te au tangata ra, kia ora rā rātou i te pae vaerua mei te Atua ra.

Kia 'aka'aere meitaki'ia te au 'apinga aro'a a te Atua

7Kua vaitata te 'openga o te au mea rava rāi. E 'akamako meitaki i a kōtou ē e 'ākono meitaki kia rauka i a kōtou kia pure.

8Mase 10.12I runga roa rā i te au mea kātoatoa, e aro'a atu kōtou tēta'i ki tēta'i i te aro'a mou tikāi, nō te mea, tē tāpoki nei te aro'a i te au 'ara 'e mānganui.

9E 'ō'ō katoa mai kōtou tēta'i ki tēta'i ma te kō'umu'umukore.

10Nā te Atua i 'ōronga mai i te 'apinga aro'a tūkēkē ki te tangata tātakita'i. Mei te au 'aka'aere mēmeitaki o te aro'a ma'ata o te Atua e 'akapu'apinga nei i te reira i te tāvini'anga tēta'i ki tēta'i.

11Mē tē ako nei tēta'i, kia ako atu aia i te au karere a te Atua; mē tē raverave nei tēta'i, kia 'akapērā aia ma te ririnui tā te Atua i tuku mai ki aia, kia 'akakakā'ia te Atua i te au mea rava rāi nā roto i a Iēsū Mesia. 'Ei aia te kakā ē te mana e tuātatau 'ua atu. Āmene.

Te au mate nō te ora'anga Keretitiāno

12E aku au taeake, auraka e pō'itirere i te au tākinga kino'anga rikarika i a kōtou, mei te mea atura ē, 'e mea tūkē 'ua ake rāi tē tupu ra ki a kōtou.

13E rekareka rā kōtou, mē tē rave katoa nei kōtou i te au mate o te Mesia ra, nō te mea, ka rekareka katoa kōtou ma te perepere kāvana ma'ata kia 'akaāri'ia mai tōna kakā.

14'E ao tō kōtou kia 'akakino'ia mai nō te ingoa o te Mesia, nō te mea, tē no'o nei te Vaerua kakā, ko te Vaerua 'oki ia o te Atua ki runga a'o i a kōtou.

15Kia kore roa tēta'i o kōtou e tāmamae'ia nō te mea ē, kua tā tangata aia, kua keiā, kua rave i te 'anga'anga kino, mē kāre rā, kua tāmanamanatā i a ēta'i kē ra.

16Kia tāmamae'ia rā tēta'i nō te mea e Keretitiāno aia, kāre rava aia e 'akamā i te reira. Kia 'akakakā rā aia i te Atua nō taua ingoa ra.

17Kua tae 'oki ki te tuātau o te 'akavā'anga ē ka 'akamata te reira ki te ngutu'are o te Atua. Mē tē 'akamata nei te reira ki a tātou nei, 'e a'a i reira te 'openga o te aronga kāre i 'āriki i te 'ēvangelia a te Atua?

18Mase 11.31Kua tātā'ia 'oki ē,

“Mē te tangata tuatua tika i 'akaora ngatā'ia,

'e a'a i reira te ka tupu ki te tangata 'ākonokore i te Atua

ē ki te tangata rave 'ara?”

19Ko te aronga e mate nei mei tei tau i te anoano o te Atua, kia tuku atu rātou i tō rātou vaerua ki te Atua 'irinaki'ia tei 'anga i a rātou, kia tāmou rāi rātou i te rave i te 'anga'anga meitaki.