Rōma 10 - Cook Island Maori Revised New Testament(CIMRNT)

1E te au taeake ē, te 'inangaro 'ō'onu o tōku nei ngākau, ē pērā katoa tāku nei pure ki te Atua nō tōku 'iti tangata ē, kia 'akaora'ia rātou.

2Ko au nei 'oki te kite nō rātou ē, 'e māro'iro'i rava tō rātou i tā te Atua, inārā, kāre te reira māro'iro'i i nā roto mai i te mārama meitaki tikāi.

3Nō te mea ē, kāre rātou i nakiro i te tū o tā te Atua 'akatikatika'anga i te tangata, tē kimi ra rā rātou i te 'akatupu i tā rātou 'ua'orāi 'akatikatika'anga. Nō reira, kāre rātou i āru i tā te Atua 'akatikatika'anga.

4Ko te Mesia 'oki te 'openga o te Ture kia 'akatikatika'ia te aronga rava rāi nā roto i te 'irinaki'anga ra.

Nō te kātoatoa te 'akaora'anga

5 Lev 18.5 Tē tātā mai nei 'oki a Mōse nō runga i tā te Ture 'akatikatika'anga ē, “Ko te tangata tei 'ākono i te Ture ra, ka ora aia i roto i te reira.”

6Deut 30.12-14Tē karanga maira rā te 'akatikatika'anga nā roto mai i te 'irinaki'anga ra ē, “'Eia'a koe e ui i roto i tō'ou ngākau ē, ‘Nā 'ai e kake ki runga i te rangi?’ ” (koia 'oki 'ei arataki mai i te Mesia ki raro nei).

7“Mē kāre, ‘Nā 'ai e 'eke atu ki raro i te va'arua takerekore?’ ” (koia 'oki, 'ei arataki mai i te Mesia mei te mate mai).

8Kāre! Tē 'akapē'ea maira 'oki te reira? “Tei vaitata roa a'o te tuatua a te Atua i a koe, tei roto i tō va'a, ē tei roto i tō ngākau.” Ko tēnā 'oki te karere o te 'irinaki'anga tā mātou e tūtū 'aere nei.

9Mei te mea ē, tē 'a'aki nei koe ma tō va'a ē ko Iēsū te 'Atu ē tē 'irinaki nei koe i roto i tō'ou ngākau ē, nā te Atua i 'akatū mai i aia mei te mate maira, ka 'akaora'ia mai koe i reira.

10Tē 'irinaki nei 'oki tātou i roto i tō tātou ngākau ē tē 'akatikatika'ia mai nei tātou. Tē 'a'aki nei tātou i te reira ma tō tātou va'a ē tē 'akaora'ia mai nei tātou.

11 Isa 28.16 Tē karanga maira 'oki te tuatua i tātā'ia ra ē, “Ko te tangata rava rāi tei 'irinaki i aia ra, kāre rava ia e tā'akamā'ia.”

12Kāre rava 'oki 'e tūkē i te Ngāti Iūda ē te Eleni, nō te mea, ko te 'Atu ra 'oki 'e 'Atu rāi ia nō te kātoatoa, ē tē tākinga meitaki ma'ata ra aia i te aronga kātoatoa e kāpiki atu ki aia ra.

13Ioel 2.32Nō te mea, “Ko tēta'i 'ua atu tangata te ka kāpiki i te ingoa o te 'Atu ra, ka 'akaora'ia mai ia.”

14E 'akapē'ea e tikāi i a rātou i te kāpiki atu ki aia, mei te mea ē, kāre rātou i 'irinaki i aia ra? E 'akapē'ea 'oki e tikāi i a rātou i te 'irinaki i aia, mei te mea ē, kāre rātou i 'akarongo ana i tōna rongo? E 'akapē'ea 'oki e tikāi i a rātou i te 'akarongo i tōna rongo, mei te mea ē, kāre tēta'i i 'akakite atu i te reira?

15Isa 52.7E 'akapē'ea 'oki e tikāi i te tangata i te 'akakite 'aere i taua rongo ra, mei te mea ē, kāre rātou i tonokia? Ko tēia 'oki tei tātā'ia ra ē, “Auē te mānea o te 'aere'anga mai o te aronga i 'apai mai i te 'ēvangelia o te meitaki ra e!”

16Isa 53.1Kāre rā te kātoatoa o tō Īserā'ela i 'āriki mai i te 'ēvangelia. Tē nā kō maira 'oki a Īsaia ē, “E te 'Atu, ko 'ai rā tei 'irinaki i tā mātou ako'anga?”

17Ko te 'irinaki'anga i reira ka nā roto mai i te ako'anga, ē ko te ako'anga ka nā roto mai i te karere nō te Mesia.

18 Sal 19.4 Tēia rā tāku ui'anga: Kāre āinei rātou i 'akarongo ake? Nō te a'a!

“Kua tae atu 'oki tō rātou reo ki te pā 'enua rava rāi,

ē tā rātou karere ki te kōtinga o tēianei ao!”

19 Deut 32.21 Tē ui 'aka'ou nei rāi au: Kāre āinei a Īserā'ela i kite? Ko Mōse 'oki te mōmua e pa'u mai nei ē,

“E 'akakōkō 'oki au i a kōtou kia vare'ae i te au tangata

kāre i te 'iti tangata ake;

ē e 'akariri au i a kōtou

nā roto i tēta'i 'iti tangata māramakore.”

20 Isa 65.1 Ē ko Īsaia tei nā kō maira ma te matakukore,

“Kua kitea au e te aronga kāre i kimi mai i āku ra,

kua 'akaāri atu au i āku 'ua'orāi ki te aronga kāre i uiui 'aere mai i āku.”

21 Isa 65.2 Inārā, tē nā kō katoa maira aia ki a Īserā'ela, “I 'o'ora 'ua ana au i ōku rima ki tēta'i 'iti tangata kaurarokore ē te mārōki'aki'a e 'ope rava ake nei te rā.”