Galatia 3 - Cook Island Maori Revised New Testament(CIMRNT)

Ko te Ture, mē ko te 'akarongo

1Kua nēneva i a kōtou, e tō Gālātia ē! Nā 'ai kōtou i tāpikipiki? I mua tikāi i ō kōtou mata kua 'akaāri pāpū'ia atu ē ko Iēsū Mesia tei 'akasātauro'ia.

2'Okota'i 'ua ake mea ka 'inangaro au kia kite mei a kōtou na: i rauka mai āina te Vaerua i a kōtou nō te 'ākono'anga i tā te Ture, mē kāre, nō te 'irinaki'anga kōtou i tā kōtou i 'akarongo ra?

3Ko te tū āina tēnā o tō kōtou 'āuouō? I muri ake i tō kōtou 'akamata'anga ma te Vaerua ra, tē 'akaoti āinei kōtou ma tā te kōpapa 'ua nei rāvenga?

4'E mea pu'apingakore āinei tei tupu ki a kōtou na? Kāre pa'a i te mea pu'apingakore.

5Tē tuku atu āinei te Atua i tōna Vaerua ki a kōtou ē tē rave ra aia i te au rāvenga mana takakē i rotopū i a kōtou na nō te 'ākono'anga kōtou i tā te Ture, mē nō te 'irinaki'anga kōtou i tā kōtou i 'akarongo ra?

6 Gen 15.6; Rōm 4.3 E 'ākara na i a Āberahāma: “Kua 'irinaki aia i te Atua, ē kua 'āriki'ia te reira e te Atua 'ei tumu 'akatikatika'anga nōna.”

7Rōm 4.16Kia mārama mai kōtou i reira ē, ko te aronga rava rāi tei 'irinaki ra, 'e tamariki i a rātou nā Āberahāma.

8Gen 12.3Kua kite mamao kē ana 'oki te tuatua i tātā'ia ra ē, ka 'akatikatika te Atua i te au 'iti tangata rava rāi nō tō rātou 'irinaki'anga. Ē kua 'akakite'ia taua karere ra ki a Āberahāma i muatangāna, ka nā kō ei ra ē, “'Ei a koe na e meitaki ei te au 'iti tangata rava rāi.”

9Ē nō reira, ka 'akameitaki'ia te aronga 'irinaki ra mei a Āberahāma katoa, te tangata 'irinaki ra.

10 Deut 27.26 Kua tauma'a'ia te tangata rava rāi tei 'irinaki 'ua i te rave i tā te Ture ra. Kua tātā'ia 'oki ē, “Kia tauma'a'ia te kātoatoa rava tei kore e rave tāmou i te au mea rava rāi i tātā'ia i roto i te Puka o te Ture ra.”

11Hab 2.4Kua pāpū meitaki ē, kāre rava tēta'i tangata e 'akatikatika'ia e te Ture ki mua i te aroaro o te Atua, nō te mea, “E ora 'oki te tangata tuatua tika nō tōna 'irinaki'anga.”

12Lev 18.5Ko te 'irinaki i te Atua, kāre ia ko te tumu i te 'ākono i te Ture ra, nō te mea, kua tātā'ia 'oki ē, “Ka ora rāi te tangata mē rave aia i ēia mea nei.”

13 Deut 21.23 Kua 'akati'amā te Mesia i a tātou mei roto mai i te tauma'a o te Ture, nā roto i te 'akariro'anga i aia 'ua'orāi 'ei tauma'a nō tātou. Kua tātā'ia 'oki ē, “Kia tauma'a'ia te kātoatoa rava tei rī'ia ki runga i te rākau.”

14I pērā 'oki a Iēsū Mesia, kia riro mai nā roto i aia te 'akameitaki'anga o Āberahāma ki te pā 'enua rava rāi, ē kia rauka mai i a tātou te papa'u'anga a te Vaerua nā roto i te 'irinaki'anga ra.

Ko te Ture ē te papa'u'anga

15E te au taeake, e tuku atuna au i tēta'i 'ākara'anga nō te ora'anga tangata nei. Mē oti tēta'i kōreromotu tangata i te 'akamana'ia, kāre rava 'e tangata e rauka i te kiriti i tēta'i ngā'i, ē kāre 'oki e rauka i te pa'u atu i tēta'i ngā'i.

16I tuatua'ia 'oki te au papa'u'anga ki a Āberahāma ē ki tōna 'uānga. Kāre i tātā'ia ē, “ē ki te au 'uānga,” mei te mea ē, 'e mānganui te tangata, māri rā ē, “ē ki tō'ou 'uānga,” koia 'oki, ko te tangata 'okota'i anake, ko te Mesia ra.

17Exo 12.40Tēia te 'āite'anga i tāku tuatua: ko te Ture tei tuku'ia mai e 'ā 'ānere e toru nga'uru mata'iti i muri ake i te 'akamana'anga te Atua i tēta'i kōreromotu, kāre te reira e rauka i te kiriti i te mana o taua kōreromotu ra kia riro te papa'u'anga 'ei mea pu'apingakore.

18Rōm 4.14Nāringa ē i nā roto mai i te tu'anga o te Ture, kāre tākiri i reira taua tu'anga ra i nā roto mai i te papa'u'anga. Ko te Atua rā kua 'akaāri mai i tōna aro'a ki a Āberahāma nā roto i tēta'i papa'u'anga.

19'E a'a i reira te 'akakoro'anga o te Ture? Nō te ma'ata 'ua rā o te 'ara i kāpiti'ia mai ei te reira e tae roa mai taua 'uānga ra ē nōna te papa'u'anga. Kua tuku'ia mai te Ture e te tangata rotopū nā roto i te au 'āngela.

20Kāre rā te tangata rotopū ē nō te tangata 'okota'i 'ua. E 'okota'i rāi te Atua.

Te 'akakoro'anga o te Ture

21Tē pāto'i āinei te Ture i te au papa'u'anga a te Atua ra? Kāre rava ia! Nāringa 'oki ē 'e ture tēta'i i tukuna'ia mai te ka rauka i te 'ōronga mai i te ora, kua riro i reira ē, nā roto mai rāi i te Ture te 'akatikatika'anga ra.

22Inārā, kua riro ē, nā te tuatua i tātā'ia ra i mōpani i te kātoatoa rava i raro ake i te mana o te 'ara. Nō reira, ko te papa'u'anga nō te 'irinaki'anga i a Iēsū Mesia ra, kua 'ōronga'ia te reira ki te aronga i 'irinaki ra.

23I mua ake rā ka tae mai ei tēia 'irinaki'anga, tei raro ake rāi tātou i te mana o te Ture, ē kua mōpani rava'ia e tae rava mai ki te tuātau e 'e'eu'ia mai ei te 'irinaki'anga.

24Nō reira te Ture i riro ei 'ei arataki i a tātou ki te Mesia kia rauka tātou i te 'akatikatika'ia e te 'irinaki'anga.

25I tēianei rā ē kua tae mai te 'irinaki'anga, kāre atura tātou i raro ake i taua arataki ra.

26'E tamariki kātoatoa 'oki tātou nā te Atua nā roto i te 'irinaki'anga i a Iēsū Mesia ra,

27nō te mea, ko kōtou rava rāi 'oki tei bāpetīto'ia ki roto i te Mesia ra, kua 'akakāka'u kōtou i a kōtou 'ua'orāi ki te Mesia.

28Kāre 'e Ngāti Iūda ē kāre 'e Eleni; kāre 'e tuika'a ē kāre 'e rangatira; kāre 'e tāne ē kāre 'e va'ine; 'okota'i anake 'oki kōtou kātoatoa i roto i te Mesia ra i a Iēsū.

29Rōm 4.13Mē nō te Mesia ra 'oki kōtou na, 'e 'uānga tikāi kōtou i reira nō Āberahāma, ē 'e au tangata kāinga katoa 'oki mei tei papa'u'ia maira.