1 Tesalōnia 5 - Cook Island Maori Revised New Testament(CIMRNT)

1Kāre e umuumu'ia kia tātā atu au ki a kōtou, e te au taeake, nō runga i te au 'ati'anga ē te au tuātau.

2Māt 24.43; Luk 12.39; 2 Pet 3.10Ko kōtou 'oki, tē nakiro pū nei kōtou ē, tē 'aere maira taua rā o te 'Atu mei te keiā i te pō ra.

3Mē karanga'ia ē, “'E 'au ē kāre 'e kino i tēia 'ati'anga nei,” ka roko'ia pō'itirere 'ua'ia rāi te tangata e te mate, mei te va'ine nui i roko'ia e te mamae 'ānau ra. Kāre tākiri rātou e 'oro kē i te reira.

4Ko kōtou rā, e te au taeake, kāre kōtou i roto i te pōiri, ka roko'ia mai ei kōtou e taua rā ra mei te keiā ra te tū.

5Ko kōtou rava rāi 'oki 'e tamariki nō te mārama ē 'e tamariki nō te ao. Kāre 'oki tātou i tō te pōiri ē tō te pō.

6Nō reira, auraka tātou e moe mei te aronga kē ra, kia ara rā ē kia 'ākono meitaki.

7Ko tei moe ra 'oki, i moe ia i te pō; ē ko tei 'akakona ra, e 'akakona ia i te pō.

8Isa 59.17; Eph 6.13-17Ko tātou rā ko te aronga o te ao ra, kia 'ākono meitaki tātou i te kāka'u'anga i te 'akarongo ē te aro'a 'ei tāpoki umauma, ē te mānakonako'anga o te rāvenga ora 'ei pare pāruru.

9Kāre 'oki te Atua i 'ākono i a tātou kia kite i tōna riri, kia rauka rā te rāvenga ora nā roto i tō tātou 'Atu ra ko Iēsū Mesia.

10Kua mate aia nō tātou kia ora tātou ma ia katoa, mē tē ora 'ua ra tātou, mē kua mate.

11Nō reira, e 'akapūma'ana kōtou tēta'i i tēta'i ē e tauturu tēta'i i tēta'i mei tā kōtou rāi e rave ra i tēianei.

Tā Paulo pati'anga ē te 'akamatakite'anga 'openga

12Tē pati nei mātou ki a kōtou, e te au taeake, kia 'akangāteitei kōtou i te aronga tē 'anga'anga pakari nei i ō kōtou na, koia 'oki, te aronga tē arataki nei i a kōtou ē tē ako nei i a kōtou i tō kōtou piri'anga ki te 'Atu ra.

13Kia ma'ata rava te 'akangāteitei'anga ē te aro'a tā kōtou e 'akaāri ki a rātou nō te au mea kātoatoa 'oki tā rātou i rave. 'Ei 'au 'oki tō rotopū i a kōtou 'ua'orāi.

14Tē pati 'akatenga atu nei mātou ki a kōtou, e te au taeake, e ako atu kōtou i te aronga no'o 'anga'angakore 'ua, e 'akamāro'iro'i i te aronga ngākau paruparu, e tauturu i te aronga 'āpikepikē, ē e 'akakoromaki i te tangata rava rāi.

15E matakite kia kore rava tēta'i e tūtaki i te kino ki te kino, kia kimi mārie rā kōtou ma te tīvatakore i te meitaki tēta'i ki tēta'i ē nō te kātoatoa.

16E rekareka kōtou i te au 'ati'anga rava rāi.

17E pure kōtou, 'aua e tīvata.

18E 'akameitaki i te Atua i te au mea katoa ra. Ko tēia ngā mea nei 'oki ko tō te Atua anoano ia nō kōtou i tō kōtou piri'anga ki te Mesia ko Iēsū.

19Auraka e ārai i tā te Vaerua ra.

20Auraka e 'akava'ava'a i te au toto'u'anga.

21E 'ākara matariki i te au mea katoa ra mē tē meitaki ra, e tāpū mārie.

22E kōpae atu i te au mea kino rava rāi.

Te ve'eve'e'anga aro'a

23Nā te Atua 'ua'orāi, te tumu o te 'au, e 'akatapu rava mai i a kōtou, ē nāna rāi e tiaki i a kōtou kia meitaki kōtou i te pae vaerua, te pae kōpapa ē te pae ngākau ma te 'apakore e tae 'ua atu ki te tae'anga mai o tō tātou 'Atu ra ko Iēsū Mesia.

24Ko tei kāpiki i a kōtou, ka rave rāi i te reira, nō te mea, e Atua 'irinaki'ia aia.

25E te au taeake ē, e pure i a mātou.

26E aro'a atu i te au taeake rava rāi ki te 'ongi tapu ra.

27Tē 'akaue atu nei au ki a kōtou i te ingoa o te 'Atu ra, kia tatau'ia tēia leta ki te au taeake kātoatoa ra.

28'Ei a kōtou te aro'a 'ua o tō tātou 'Atu ra ko Iēsū Mesia.