Māreko 3 - Cook Island Maori Revised New Testament(CIMRNT)

Te tangata rima 'akamate(Mātaio 12.9-14; Luka 6.6-11)

1Kua tomo 'aka'ou atura a Iēsū ki roto i te sūnago, tei reira 'oki tēta'i tangata rima 'akamate.

2Tē 'ākara matariki maira te au tangata i aia mē ka 'akaora aia i taua tangata ra i te Sābati, kia rauka tā rātou tāpepe'anga mai i aia.

3Kua karanga atura aia ki te tangata nōna te rima 'akamate ra, “Ka tū mai i rotopū nei.”

4Kua ui atura aia ki a rātou, “'E a'a tei tau i te Ture ki rave i te rā Sābati, ko te meitaki āina mē ko te kino? Ko te 'akaora āina mē ko te tā?”

Mūtēkī akera rātou.

5Kua 'akarau 'aere atura tōna mata ki a rātou rava rāi e pini 'ua ake ma te riri, tē tangi ra 'oki aia nō te mārōki'aki'a o tō rātou ngākau, ē kua karanga atura ki taua tangata ra, “Ka 'akatoro mai ana i tō rima.” Ē tei te 'akatoro'anga ra, ora tākiri akera tōna rima.

6Kua 'aere atura te au Phārīsea ki va'o i reira rāi ē kua kotikoti kupenga ma te Hērōdiāni ē 'akapē'ea i te tā i a Iēsū.

Tēta'i motu'anga tangata i te pae roto

7Kua unu'i atura a Iēsū ma tāna au pipi, 'aere atura ki te pae roto ra. Ē kua āru maira tēta'i motu'anga tangata ma'ata nō Galilea ē nō Iūdea mai,

8nō Iērūsalēma, nō Idumea, nō te pae i tērā tua mai i a Iōrīdāna ra, ē tō te pae i Tūria ra 'oki ē tō Sīdona; 'e motu'anga tangata ma'ata katoa tei 'aere mai ki aia nō te rongo o te au rāvenga mana nāna ra.

9Mār 4.1; Luk 5.1-3Kua karanga atura aia ki tāna au pipi kia 'akate'ate'amamao mai i tēta'i poti meangiti nōna, kia kore aia e 'aka'ete'ete'ia mai e te au tangata.

10'E mānganui 'oki tāna i 'akaora, ē kua 'aka'ete'ete maira te aronga maki 'e mānganui ki aia kia 'akatūkia mai rātou i aia.

11Ē te au vaerua vi'ivi'i katoa tei kite mai i aia ra, kua 'akatopa maira ki mua a'o i aia ma te kāpiki'anga i te nā kō'anga mai ē, “Ko te Tamaiti koe a te Atua.”

12Kua ako 'ua atura aia i a rātou ē, auraka rava rātou e 'a'aki i aia.

'Iki i'ora a Iēsū i te au pipi tino nga'uru mā rua(Mātaio 10.1-4; Luka 6.12-16)

13Ē i muri akera, 'aere atura a Iēsū ki runga i tēta'i maunga, kua kāpiki maira 'oki i te aronga tāna i anoano ra, ē kua 'aere maira rātou ki aia ra.

14Kua 'iki atura aia i tēta'i tino nga'uru mā rua (ē ko tāna ia i tapa i te ingoa 'e au 'āpōsetolo), kia āru rātou i aia ē kia unga atu 'oki aia i a rātou e ako 'aere.

15Ē kua 'ōronga atu i te mana ki a rātou kia tuaru 'oki i te au dēmoni ki va'o.

16Tēia 'oki taua tino nga'uru mā rua ra: ko Simona, tāna i tapa ē ko Pētero;

17ko Iākōbo a Zebedaio ra, ē ko Ioane, te teina o Iākōbo ra; ko rāua tāna i tapa ē ko Boanere, koia 'oki, ngā tamariki a te māngūngū;

18ko Ānēderea 'oki, ko Philipa, ko Baratolomea, ko Mātaio, ko Toma, ko Iākōbo a Ālephaia ra, ko Tādaio, ko Simona te Kananaio ra,

19ē ko Iūda Ikariota 'oki tei tuku pikika'a i a Iēsū.

Ko Iēsū ē Bēlezebūba(Mātaio 12.22-32; Luka 11.14-23; 12.10)

20'Aere atura a Iēsū ki te kāinga, ē kua putuputu 'aka'ou maira te urupū tangata, kāre akera e meitaki i a Iēsū mā kia kai i te mānga.

21E rongo akera tōna 'ua'orāi kōpū tangata, 'aere atura rātou e tāpū mai i aia, nō te mea, kua karanga rātou ē, “Kua 'āuouō'ia!”

22 Māt 9.34; 10.25 Ko te au Pū'āpi'i Ture ra i 'aere mai mei Iērūsalēma maira, kua nā kō maira rātou, “Tei aia a Bēlezebūba. I te mana o taua dēmoni ma'ata ra i tuaru ei aia i te au dēmoni ra ki va'o.”

23Kua kāpiki atura a Iēsū i a rātou kia 'aere mai ki aia, ē kua tuatua parabole atura aia ki a rātou, “'E a'a e tikāi kia tuaru a Sātani i a Sātani 'ua'orāi?

24Kia mavete tēta'i bāsileia ē te rave i aia 'ua'orāi, kāre 'oki te reira bāsileia e mou.

25Ē kia mavete tēta'i ngutu'are tangata ē tē rave i aia 'ua'orāi, kāre rāi te reira ngutu'are tangata e 'okota'i.

26Ē kia tū mai a Sātani e rave i aia 'ua'orāi, e mavete i'ora, kāre aia e mou, 'e 'openga rāi i reira tōna.

27“Kāre 'oki 'e tangata e tomo 'ua ki roto i te 'are o te tangata māro'iro'i ra, ka 'aru ei i tōna 'apinga. E nā mua ana rā aia i te tāpeka i taua tangata māro'iro'i ra, 'ei reira e tikāi kia 'aru aia i tōna kāinga.

28“Koia mou tāku e karanga atu ki a kōtou na, ka 'akakore'ia te au 'ara rava rāi a te tamariki a te tangata nei, ē pērā katoa te 'akakino Atua tā rātou ka 'akakino ra;

29Luk 12.10kāreka ia te ka 'akakino i te Vaerua Tapu ra, kāre tākiri rava tāna 'ara e 'akakore'ia, 'ei runga rāi i aia te 'ara mutukore.”

30Kua pērā a Iēsū, nō te mea, kua tuatua ana rātou ē, “Tei roto i aia tēta'i vaerua vi'ivi'i.”

Tō Iēsū metua va'ine ē tōna 'ai taeake(Mātaio 12.46-50; Luka 8.19-21)

31Kua 'aere maira 'oki i reira tōna metua va'ine ē tōna 'ai taeake, tū maira i va'o, ē kua tono maira i te kāpikipiki i aia.

32Kua no'o takapini tēta'i urupū i aia, ē kua karanga atura ki aia, “Inā, tei va'o tō metua va'ine ē tō 'ai taeake, e tiki mai i a koe.”

33Kua ui maira aia ki a rātou, nā kō maira, “Ko 'ai tōku metua va'ine ē tōku 'ai taeake?”

34Kua 'akarau atura tōna mata i te aronga i no'o takapini i aia, nā kō akera, “Inā, tēia tōku metua va'ine ē tōku 'ai taeake!

35Nō te mea, ko tei 'ākono i te anoano o te Atua ra, ko tōku ia taeake ē tōku ia tua'ine ē tōku ia metua va'ine.”