1 Petero 1 - Cook Island Maori Revised New Testament(CIMRNT)

Te aro'a'anga

1Ko au, ko Pētero, 'e 'āpōsetolo nō Iēsū Mesia, tē tātā atu nei au ki a kōtou, te aronga 'iki'ia e no'o 'ei aronga kē, tei pue'urikiriki i Ponoto, i Gālātia, i Kapadōkia, i Āsia ē i Bītūnia.

2Kua 'iki'ia 'oki kōtou e te Atua Metua, mei tei tau ki tāna i 'akakoro nā roto i tā te Vaerua 'akatapu'anga, kia kauraro kōtou i a Iēsū Mesia ē kia tāmā'ia e tōna toto.

Kia ma'ata 'ua atu rāi te aro'a 'ua ē te 'au ki a kōtou na.

'E tatari'anga ora tā tātou

3Kia 'akameitaki'ia te Atua, te Metua o tō tātou 'Atu ko Iēsū Mesia! Nō tōna aro'a ma'ata kua 'ōronga mai aia ki a tātou i te ora'anga 'ōu nā roto i te 'akatū'anga i a Iēsū mei te mate maira. Nō reira, kua kī tātou i te mānakonako'anga ora,

4ē tē tatari nei tātou kia rauka mai te tu'anga pēkore ē te mā ē te maemaekore tei vai'o'ia nō kōtou i te rangi ra.

5Ko kōtou 'oki tei pāruru'ia e te mana o te Atua nā roto i te 'irinaki'anga, nō te rāvenga ora i 'akaāri'ia tei 'akate'ate'amamao'ia nō te 'ōronga'anga mai ki a kōtou i te tuātau 'openga ra.

6Nō reira, e rekareka kōtou, noa atu ē kua taitaiā poto 'ua kōtou i tēianei nō te au tīmata'anga tūkēkē ra. Kia tae mai te reira e tikāi,

7kia tīmata'ia tō kōtou 'akarongo. Ka tīmata'ia rāi te 'auro ki te a'i, noa atu ē ka ngaro te reira. Koia katoa tō kōtou 'akarongo, tei ma'ata atu te meitaki i te 'auro, e tīmata'ia kia kitea tōna tū tikāi. Ka rauka i reira i a kōtou te 'akapa'apa'a'anga, te kakā ē te ngāteitei i te mama'anga mai o Iēsū Mesia.

8Tei kore i kitea e kōtou, kua 'inangaro rā kōtou i aia; tei kore i 'ākara'ia e kōtou i tēianei, kua 'irinaki kōtou i aia. Kia kī rāi rā kōtou i te rekareka tei kore e rauka kia tuatua'ia, ē tei kī 'oki i te kakā.

9Ka rauka 'oki i a kōtou te 'akakoro'anga o tō kōtou 'akarongo, ko te ora 'oki ia o tō kōtou au vaerua.

10Nō runga 'oki i tēia ora i kimikimi'ia ē i uiui mārie ei te au peroveta, ē kua toto'u rātou i te aro'a 'ua te ka tae atu ki a kōtou na.

11Ko te Vaerua o te Mesia tei no'o i roto i a rātou i 'akakite mamao ki a rātou i te au mate o te Mesia ē te kakā te ka tupu i muringa a'o. Ē kua kimi mārie rātou ē, ka 'akapē'ea e tupu ei tei 'akakite'ia mai ē 'e a'a te tuātau.

12Kua 'akamārama'ia ki a rātou ē, kāre te reira i 'akakite'ia ki a rātou nō rātou 'ua'orāi, nō kōtou rā. Ē kua 'akakite'ia mai te reira i tēianei ki a kōtou e te aronga tei tūtū 'aere i te 'ēvangelia nā roto mai i te Vaerua Tapu i tonokia mai mei te rangi maira. Ē tē 'inangaro katoa ra te au 'āngela i te 'ākara i te reira.

Te ora'anga o te 'iti tangata tapu o te Atua

13Nō reira, kia vai te'ate'amamao kōtou nō te 'anga'anga ē kia 'akamako meitaki i a kōtou. E tuku i tō kōtou mānakonako'anga kātoatoa ki te aro'a 'ua, te ka 'ōronga'ia mai ki a kōtou i te mama'anga mai o Iēsū Mesia ra.

14Auraka kia 'aka'aere'ia kōtou e tō kōtou au noinoi mei te tuātau rāi i kamakura ai kōtou, mei te tamariki kauraro rā.

15Kia tapu kōtou i tō kōtou tū ora'anga katoa, mei aia 'oki e tapu ra ko tei kāpiki i a kōtou.

16Lev 11.44,45; 19.2Kua tātā'ia 'oki ē, “Kia tapu kōtou, tē tapu nei 'oki au.”

17Tē pure nei kōtou ē tē kāpiki nei i aia 'ei Metua, ko te ka 'aka'āite i te 'akavā'anga i te 'anga'anga a te tangata tātakita'i. Nō reira, e ora 'oki kōtou i te tuātau o tō kōtou no'o tuitārere'anga i te ao nei ma te tū mataku i te Atua.

18Kua nakiro 'oki kōtou ē, kāre kōtou i 'oko'ia mai ki te mea pē 'ua, mei te 'auro ē te 'ārio, mei roto mai i te tū ora'anga pu'apingakore tei tukuna'ia mai ki a kōtou e tō kōtou 'ai metua ra,

19ki te toto meitaki rava rā o te Mesia, mei te punua māmoe kāre ōna ngā'i kino.

20Kua 'iki'ia aia e te Atua, 'ōu 'ua 'oki te kāpua'anga o tēianei ao; ē nō kōtou 'oki i 'akakite'ia mai ei aia i tēia au tuātau 'openga nei.

21Nā roto 'oki i aia i 'irinaki ei kōtou i te Atua, ko tei 'akatū i aia mei te mate maira ē i 'ōronga atu ei i tōna kakā nōna. Nō reira, kua 'akamou'ia tō kōtou 'irinaki'anga ē tō kōtou mānakonako'anga i te Atua.

22Ē tēnā na, kua kauraro kōtou i te tuatua mou ē kua tāmā'ia tō kōtou au vaerua kia rauka mai i a kōtou te aro'a taeake pikika'akore. Nō reira, e aro'a kōtou tēta'i ki tēta'i nō roto mai i te 'ō'onu'anga o tō kōtou ngākau.

23Kua 'ānau 'aka'ou'ia 'oki kōtou nā roto mai i te tuatua a te Atua te ka vai e mutukore 'ua atu, kāre mei te tamariki a te metua mate 'ua nei, mei te tamariki rā a te metua matekore ra.

24Isa 40.6-8Mei tei tātā'ia ra ē,

“Mei te ngāngā'ere te tangata katoa nei,

ē tōna mānea rava ra mei te tiare ngāngā'ere rāi ia;

kua mae te ngāngā'ere, kua topa i'ora te tiare ki raro,

25kāreka te tuatua a te 'Atu ra e tū ia ē rīmua.”

Ko tēia tuatua 'oki ko te 'ēvangelia ia i tūtū 'aere'ia ki a kōtou na.