Galatia 6 - Cook Island Maori Revised New Testament(CIMRNT)

Kia amo tātou i tā tēta'i 'apainga

1E te au taeake ē, mē roko'ia tēta'i e te 'apa ra, 'e mea tau i a kōtou tei 'ākono i tā te Vaerua ra kia 'akatika mārie kōtou i aia ma te ngākau marū. E matakite rā i a kōtou 'ua'orāi, ko te tīmata katoa ā'ea'ia mai kōtou.

2E amo atu tēta'i i tā tēta'i 'apainga, ē kia pērā kōtou ra, tē rave tāmou ra kōtou i te katoa'anga o te ture a te Mesia.

3Mē tē manako ra tēta'i 'ua atu i aia ē, 'e tangata ma'ata aia, ē kāre 'ua rāi aia, tē tāvare ra aia i aia 'ua'orāi.

4Kia tā'ē te tangata tātakita'i i tāna 'ua'orāi 'anga'anga, 'ei reira e rauka ai i aia i te parau i tāna anake 'ua'orāi 'anga'anga, ē kāre i tā tēta'i kē;

5nō te mea, 'e 'apainga tā te tangata tātakita'i.

6Ko tēta'i 'ua atu e 'āpi'i'ia ra ki te karere ra, kia 'ōronga atu aia i ēta'i mea o tāna au meitaki rava rāi nā tōna ra pū'āpi'i.

7Auraka e vāvare; kāre rava e tika i te Atua kia 'akanēneva'ia aia! Ko tā te tangata 'oki e rūrū ra, ko tāna rāi ia e kokoti.

8Ko tei rūrū i tā te tū tangata 'ua nei, ka kokoti ia i tā te tū tangata 'ua nei rāi, koia 'oki, te mate; kāreka tei rūrū i tā te Vaerua ra, ka kokoti ia i tā te Vaerua, koia 'oki, te ora mutukore.

9Auraka tātou e ro'iro'i i te tākinga meitaki; i te tuātau tau tikāi 'oki tātou e kokoti ei mē kore tātou e 'akaparuparu.

10Nō reira, mē vā anake tātou, kia tākinga meitaki atu tātou i te au tangata rava rāi, koia tikāi 'oki tō te ngutu'are o te 'akarongo ra.

Te 'akameitaki'anga 'openga ē te aro'a'anga

11E 'ākara na ki te au leta mama'ata tāku i tātā atu ki a kōtou na ki tōku 'ua'orāi rima!

12Ko rātou e 'inangaro ra kia reka 'ua'ia rātou i te 'ākono'anga o te pae kōpapa 'ua nei, tē mānono maira rātou i a kōtou kia peritome'ia. Ko te tumu anake 'ua i pērā ai rātou, kia kore rātou e tākinga kino'ia mai nō te sātauro o te Mesia.

13Kāre 'oki rātou 'ua'orāi tei peritome'ia ra e 'ākono ana i te Ture, inārā, tē 'inangaro maira rātou kia peritome'ia kōtou kia 'akati'eti'e rātou i tō kōtou piri'anga ki a rātou nā roto i tō kōtou peritome'ia'anga.

14Auraka rava au kia 'akati'eti'e, māri rā i te sātauro o tō tātou 'Atu ko Iēsū Mesia i 'akasātauro'ia ai te ao nei nōku, ē ko au 'oki nō te ao nei.

15Kāre ō te peritome pu'apinga, ē kāre katoa 'oki ō te peritomekore, ko te pu'apinga rā kia riro tātou 'ei tangata 'ōu.

16'Ei 'au ē te aro'a tō te tangata kātoatoa tei āru i tēianei 'aerenga, ē pērā katoa ki tō te Īserā'ela a te Atua.

17Mei tēianei atu, auraka rava tēta'i e 'akapekapeka mai ki āku, nō te mea, ko au, tē 'apai nei au i te iraira o te 'Atu ra a Iēsū ki runga i tōku nei kōpapa.

18E te au taeake ē, 'ei tō kōtou vaerua tā'okota'i te aro'a 'ua o tō tātou 'Atu ra ko Iēsū Mesia. Āmene.