1 Ier 51.13 Kua 'aere maira tēta'i o ngā 'āngela toko'itu tei mou i ngā kapu e 'itu ra, ē kua nā kō maira ki āku, “'Aere mai, ka 'akakite atu au ki a koe i te utunga o te va'ine 'akaturi ma'ata ko tei no'o i runga a'o i te au vai 'e mānganui.
2Isa 23.17; Ier 51.7Kua 'akaturi te ui ariki o te 'enua nei i aia, ē kua kona te au tangata i no'o i te ao nei i te uaina o tāna 'akaturi'anga.”
3 Apo 13.1 Kua 'apai aia i āku ki roto i te mētēpara nā roto i te Vaerua, kite atura au i tēta'i va'ine i te no'o'anga ki runga a'o i tēta'i puaka tā'ae kutekute, e 'itu ōna mīmiti ē e ta'i nga'uru ōna tara. Kua pini rava ā runga i aia i te au ingoa 'akakino Atua.
4Ier 51.7Kua kāka'u'ia taua va'ine ra i te kāka'u vare'au ē te kāka'u kutekute, ē kua 'akamānea'ia ki te 'auro, te au toka mēmeitaki ē te au poe. Tei tōna rima tēta'i kapu 'auro kī i te au mea rikarika ē te au mea vi'ivi'i o tāna 'akaturi'anga.
5Kua tātā'ia tēta'i ingoa, 'e mea muna ngaro, ki runga i tōna rae, koia 'oki: “Bābulōnia ma'ata, te metua va'ine o te aronga 'akaturi ē te au mea vi'ivi'i o te ao nei.”
6Kite atura au i taua va'ine ra i te kona'anga i te toto o te aronga tapu ē te toto o te aronga tei riro 'ei au kite nō Iēsū.
I tōku kite'anga i taua va'ine ra, vā ma'ata rava atura au.
7Kua tuatua maira te 'āngela ki āku, “'E a'a koe i vā 'ua ai? Ka 'akakite atu au ki a koe i te mea muna ngaro o taua va'ine ra ē o te puaka tā'ae, e 'itu ōna mīmiti ē e ta'i nga'uru ōna tara, ko tei 'apai atu i aia ra.
8a: Dan 7.7; Apo 11.7; b: Sal 69.28Ko te puaka tā'ae tā'au e kite ra i vai ana, ē kāre ia i tēianei. Tē vaitata nei aia i te kake mai ki runga mei raro mai i te va'arua takerekore ē i te 'aere atu ki te mate. Te aronga e no'o ki te ao nei tei kore tō rātou ingoa i tātā'ia ki roto i te puka o te ora mei te 'akamata'anga o tēianei ao, ka vā 'ua rātou i te 'ākara'anga i taua puaka tā'ae ra tei vai ana, ē kāre i tēianei, ka tae 'aka'ou mai rā.
9“Ka umuumu'ia te kite pakari i konei. Ko ngā mīmiti e 'itu ra, ko ngā maunga ia e 'itu e no'o'ia e taua va'ine ra.
10E 'itu 'oki ariki. Kua mate e rima, 'okota'i tē vai nei, ē tēta'i kāre i tae mai ake. Mē tae mai rā aia, kia no'o aia 'e tuātau poto e tikāi.
11Kāreka te puaka tā'ae, ko tei vai ana ē kāre ia i tēianei, ko te tokovaru ia. Tei roto rāi ia i te toko'itu ē tē 'aere atu nei ki te mate.
12 Dan 7.24 “Ko ngā tara e ta'i nga'uru tā'au i kite ana, e ta'i nga'uru ia ariki, tei kore i rauka ake tō rātou mana ariki. Ka rauka rā tō rātou mana ariki ē tō te puaka tā'ae 'okota'i ora.
13'Okota'i rāi 'oki ō rātou manako ē, ka 'ōronga atu rātou i tō rātou ririnui ē te mana nō te puaka tā'ae.
14Ka tamaki mai rātou i te Punua Māmoe. Ka 'autū rā te Punua Māmoe ē te aronga nōna tei kāpiki'ia, tei 'iki'ia ē tei 'ākono meitaki'ia ki runga a'o i taua ui ariki ra.”
15Kua tuatua katoa maira te 'āngela ki āku, “Te au vai tā'au e kite nei e no'o'ia e taua va'ine 'akaturi ra, 'e urupū tangata ma'ata ia nō roto mai i te au 'iti tangata, te au 'enua ē te au reo.
16Ko ngā tara e ta'i nga'uru tā'au e kite ra ē te puaka tā'ae, ka mākitakita rātou i taua va'ine 'akaturi ra ē ka 'akatane'a rātou i aia, ka kiriti i tōna kāka'u, ka kai i tōna kiko ē ka 'akapou i aia ki roto i te a'i.
17Nā te Atua 'oki i tuku i tōna 'akakoro'anga ki roto i tō rātou ngākau. Ka tupu tōna 'akakoro'anga nā roto i tēia manako 'okota'i, i te 'ōronga'anga i tō rātou mana ariki nō te puaka tā'ae e 'ope 'ua atu te tuatua a te Atua i te 'akatupu'ia.
18“Te va'ine tā'au e kite nei, ko te 'ōire ma'ata ia tei tūtara ki runga a'o i te ui ariki o te ao nei.”
Who We AreWhat We EelieveWhat We Do
2025 by iamachristian.org,Inc All rights reserved.
