2 Kōrīnētia 4 - Cook Island Maori Revised New Testament(CIMRNT)

Te 'apinga nui vaerua i roto i te au pōtera karakaraea

1Ē nō reira, kāre 'ua atura mātou i 'akaro'iro'i i te 'apai i tēianei tao'onga, i te mea 'oki ē, i nā roto mai ia i tō te Atua aro'a.

2Kua 'akaruke rā mātou i te au rāvenga muna ngaro ē te 'akamā. Kāre tō mātou i te 'aerenga tāpikipiki, ē kāre katoa 'oki mātou i te aronga tāviriviri i te tuatua a te Atua. Nā roto rā i te 'akakitekite 'ua'anga i te tuatua mou, tē 'akameitaki nei mātou i a mātou 'ua'orāi ki te 'akavā ngākau o te tangata rava rāi i mua i te aroaro o te Atua.

3Ē mei te mea ē, tē tāpoki'ia nei tā mātou 'ēvangelia, tē tāpoki 'ua'ia ra ki te aronga kāre i 'akaora'ia.

4Kua 'akapōiri'ia 'oki te ngākau o taua aronga 'akarongokore ra e te atua o tēia tuātau nei, kia kore rātou e kite i te mārama o te 'ēvangelia kakā o te Mesia, koia 'oki te tūtū o te Atua ra.

5Kāre 'oki ē tē tūtū 'aere ra mātou i a mātou 'ua'orāi, māri rā, ko Iēsū Mesia ko te 'Atu ia, ē ko mātou 'ua'orāi nei, ko tō kōtou ia au tāvini ra nō Iēsū 'oki.

6Gen 1.3Ko te Atua ra 'oki tei tuatua ē, “Kia kakā mai te mārama mei roto mai i te pōiri ra,” ko ia rāi 'oki e tūrama mai nei i tōna mārama ki roto i tō tātou nei ngākau, kia kite tātou i te mārama 'ō'onu tikāi o te kakā o te Atua i roto i a Iēsū Mesia ra.

7Tei roto rā tēia 'apinga nui nei i te au pōtera karakaraea, kia nakiro tātou ē, nō kō mai i te Atua tēia mana ma'ata 'āitekore'ia, ē kāre ē nō konei atu i a mātou.

8Tē taomi'ia nei mātou e te au manamanatā, kāre rā mātou i paruparu; tē apiapi nei, kāre rā i ngaro te mānakonako'anga;

9tē tīnaimate'ia nei, kāre rā i 'akaruke tākiri'ia; tē paia'ia nei ki raro, kāre rā i mate rava;

10ē tē 'apai 'aere nei rāi mātou i te mate o Iēsū i roto i tō mātou kōpapa nei, kia kitea katoa'ia tō Iēsū ora'anga i roto i tō mātou nei kōpapa.

11Ko mātou nei 'oki e ora nei, tē tuku 'ua'ia nei rāi mātou ki te mate nō Iēsū, kia kitea'ia tōna ora'anga i roto i tō mātou nei kōpapa mate 'ua.

12Tē 'anga'anga nei i reira te mate i roto i a mātou nei, ko te ora rā tei roto ia i a kōtou na.

13 Sal 116.10 Nō te mea ra ē, tei a mātou katoa taua ngākau 'akarongo ra mei tei tātā'ia ra ē, “Kua 'akarongo au, nō reira au i tuatua ai,” kua 'akarongo katoa mātou ē nō reira katoa mātou i tuatua ai,

14ma te kite 'oki ē, ko tei 'akatū i te 'Atu i a Iēsū mei te mate maira, e 'akatū katoa rāi aia i a mātou ma Iēsū, ē ka tuku atu ei aia i a mātou ē i a kōtou katoa ki mua i tōna aroaro.

15Nō kōtou 'oki tēia au mea kātoatoa nei. Kua toto'a te aro'a 'ua o te Atua ra ki te au tangata 'e mānganui rava atu, ē ka māringiringi 'ua mai tā rātou 'akameitaki'anga nō te kakā 'oki o te Atua.

Te ora'anga 'akarongo

16Ē nō reira, kāre mātou e 'akaro'iro'i. Noa atu 'oki ē, tē māmate nei ā va'o i tō mātou au kōpapa, ka ā roto rā tē 'aka'ōu'ia nei mātou i tērā rā ē i tērā rā.

17Nō te mea, ko tō mātou au manamanatā meangiti ē te vata poto 'ua o tēia tuātau nei, e 'akatupu maira ia i te kakā ma'ata rava ē te mutukore nō mātou; 'e kakā ma'ata rava atu ia i taua au manamanatā rava rāi.

18Tē 'ākara tāmou nei 'oki mātou, 'eia'a ki te au mea e kitea'ia ra, ki te au mea kiteakore'ia rā. Ko te au mea 'oki e kitea'ia nei, nō tēia 'ati'anga poto 'ua nei ia; kāreka te au mea kiteakore'ia ra 'e mutukore te reira.