Apokalupo 18 - Cook Island Maori Revised New Testament(CIMRNT)

Tō Bābulōnia 'inga'anga

1I muri ake i te reira kua kite au i tēta'i 'āngela kē i te 'eke'anga mai mei te rangi mai, 'e mana ma'ata tōna, ē kua mārama te ao nei i tōna kakā.

2a: Isa 21.9; Ier 51.8; Apo 14.8; b: Isa 13.21; Ier 50.39Kua kāpiki aia ma te reo pakari, nā kō maira, “Kua 'inga, kua 'inga a Bābulōnia ma'ata, ē kua riro 'ei ngā'i no'o'anga nō te au dēmoni, 'ei ngā'i vairanga nō te au vaerua vi'ivi'i kātoatoa, 'ei ngā'i vairanga nō te au manu rere vi'ivi'i ē nō te au manu tā'ae vi'ivi'i ē te mākitakita'ia.

3Isa 23.17; Ier 51.7Kua inu 'oki te au 'iti tangata kātoatoa i te uaina ririnui o tāna 'akaturi'anga, kua 'akaturi te ui ariki o te ao nei i aia, ē kua riro te aronga 'oko'oko o te ao nei 'ei aronga 'apinga nui nā roto mai i te ma'ata roa'anga o tāna au mea nanave.”

4 Isa 48.20; Ier 50.8; 51.6,45 Kua 'akarongo atura au i tēta'i reo kē nō te rangi mai i te nā kō'anga mai ē,

“E 'aere ki va'o mei roto atu i aia, e aku au tangata,

kia kore kōtou e piri atu ki tāna au 'ara,

ē kia kore katoa kōtou e roko'ia atu e tōna au mate.

5 Gen 18.20,21; Ier 51.9 Kua putunga 'oki tāna au 'ara e tae 'ua atu ki te rangi,

ē kua ma'ara i te Atua i tāna au 'anga'anga tikakore.

6 Sal 137.8; Ier 50.29 E rave atu kōtou ki aia mei tāna i rave mai ki te au tangata,

ē e 'akautunga atu i aia kia tau i tāna 'anga'anga kia takirua taime.

E riringi ki roto i tāna kapu e rua taime i te vāito tāna i riringi nō te au tangata kē.

7 Isa 47.7-9 Mei aia i 'akakakā i aia 'ua'orāi ē i no'o ma te 'apinga nui nanave ra,

mei te reira katoa te ma'ata o te mamae ē te taitaiā tā kōtou ka 'ō atu ki aia.

Tē karanga nei 'oki aia i roto i tōna ngākau ē,

‘Tē no'o ariki va'ine 'ua nei au,

ē kāre au i te va'ine taka'ua,

ē kāre au e kite i te taitaiā.’

8Nō reira, ka tae mai tōna au mate i te rā 'okota'i,

koia 'oki, te mate tākiri, te taitaiā ē te onge, ē ka pou tākiri aia i te a'i.

'E mana ma'ata 'oki tō te 'Atu, te Atua,

ko tei 'akautunga mai i aia ra.”

9 Ezek 26.16,17 Te ui ariki o te ao, ko tei 'akaturi i aia ē tei no'o katoa ma tāna 'apinga nui nanave ra, ka auē ē ka iri'ea rātou nō runga i aia, mē 'ākara rātou i te au a'i o tōna pou'anga i te kā.

10Tē tū nei rātou i te ātea kē nō te mataku i tōna tūmatetenga ma'ata i te nā kō'anga ē, “Auē te 'ōire ma'ata ko Bābulōnia ē, te 'ōire ririnui, kua tae mai 'oki tō'ou utunga i te ora 'okota'i 'ua!”

11 Ezek 27.31,36 Tē auē nei ē tē tangi nei te aronga 'oko'oko o te ao nei i aia, nō te mea, kāre 'e tangata e 'oko 'aka'ou mai i tā rātou au 'apinga 'oko,

12Ezek 27.12,13,22koia 'oki, te 'auro, te 'ārio, te au toka mēmeitaki ē te au poe; te kāka'u vare'au, te muramura, te tīrika ē te kutekute; te au tū rākau kakara, te au mea kātoatoa i ma'ani'ia mei roto mai i te ni'o 'erepani, te rākau 'oko ma'ata, te veo, te 'āuri ē te toka 'inu'inu;

13te kīnamo ē te rākau tākakara, te tāpou kakara ē te mura, te manongi, te uaina ē te 'inu, te varāoa mata meitaki ē te sītona, te au puakatoro ē te māmoe, te au 'oro'enua ē te kariota, te au tuika'a ē te ora'anga tangata katoa.

14Tē karanga atu nei rātou ki a koe, “Te au mea kakī ma'ata'ia e koe ra, kua takakē'ia i a koe, ē te au mea mēmeitaki ē te mānea rava kua ngaro kē'ia i a koe na, ē kāre rava e kitea 'aka'ou'ia.”

15Ezek 27.31,36Ko te aronga tei 'oko'oko atu i taua au mea ra ē tei riro 'ei aronga 'apinga nui nā roto i aia, ka tū rātou i te ātea kē nō te mataku i tōna tūmatetenga. Ka auē ē ka tangi rātou

16i te nā kō'anga ē, “Auē te 'ōire ma'ata ē, ko tei kāka'u'ia ki te kāka'u vare'au, te muramura ē te kutekute ē tei 'akamānea'ia ki te 'auro, te au toka mēmeitaki ē te au poe,

17Isa 23.14; Ezek 27.26-30nō te mea, ko taua au 'apinga nui ra kua ngaro i te ora 'okota'i 'ua ra.”

Te au rangatira pa'ī ra ē te aronga teretere pa'ī, te au mātarō ē te aronga 'anga'anga 'aere i te moana, kua tū rātou i te ātea kē.

18Ezek 27.32I tō rātou 'ākara'anga i te au a'i o taua pou'anga i te kā ra, kua kāpiki nui rātou i te nā kō'anga ē, “Ko 'ai ia 'ōire tei 'āiteite i tēia 'ōire ma'ata?”

19Ezek 27.30-34Kua āū rātou i te one pue'u ki runga i tō rātou ūpoko ē kua kāpiki ma te auē ē te tangi i te nā kō'anga ē, “Auē te 'ōire ma'ata ē! Ko te kātoatoa 'e pa'ī tō rātou i runga i te moana, kua riro rātou 'ei aronga 'apinga nui i roto i aia nō tōna 'apinga nui ma'ata rava. Kua ngaro 'oki ia i te ora 'okota'i 'ua ra.”

20 Deut 32.43; Ier 51.48 E rekareka ma'ata nō runga i aia, e te rangi, ē ko kōtou te aronga tapu, te au 'āpōsetolo ē te au peroveta, nō te mea, kua 'akautunga te Atua i aia nō tōna au kino ki a kōtou.

21 a: Ier 51.63,64; b: Ezek 26.21 Kua rave i'ora tēta'i 'āngela ririnui i tēta'i toka ma'ata mei te toka tāviri'anga te tū, ē kua titiri i te reira ki roto i te tai i te nā kō'anga ē, “Mei te reira katoa te 'uri'anga'ia ki raro o Bābulōnia, te 'ōire ma'ata, ē kāre rava e kitea 'aka'ou'ia.

22Ezek 26.13; Isa 24.8

Ier 7.34; 25.10Kāre e 'akarongo 'aka'ou'ia i roto i a koe na te reo o te aronga 'akatangi kītara ē te aronga 'īmene, te au 'akatangi vivo ē te au 'akatangi pū. Kāre katoa e kitea 'aka'ou'ia i roto i a koe na tēta'i tangata kite tikāi nō tēta'i 'ua atu 'anga'anga. Kāre e 'akarongo 'aka'ou'ia i roto i a koe na te 'aruru'anga o te toka tāviri.

23Kāre katoa te mārama o tēta'i lāmepa e kakā 'aka'ou i roto i a koe na, ē kāre rāi te reo o te tāne ē te va'ine 'akaipoipo 'ōu ra i 'akarongo 'aka'ou'ia i roto i a koe na. Ko tō'ou aronga 'oko'oko 'oki ko te aronga mama'ata ia o te ao nei, ē kua arataki kē'ia te au 'iti tangata kātoatoa nā roto i tā'au rāvenga purepure.

24Ier 51.49Ko te toto o te au peroveta ē te aronga tapu ē o te aronga rava rāi i tā'ia i te ao nei, kua maringi'ia i roto i a koe na.”