Luka 6 - Cook Island Maori Revised New Testament(CIMRNT)

Te tūranga nō runga i te rā Sābati(Mātaio 12.1-8; Māreko 2.23-28)

1 Deut 23.25 I tēta'i Sābati 'aere atura a Iēsū nā roto i te au koro sītona. Ē kua 'u'uti akera tāna au pipi i te 'ua sītona, kua mirimiri i'ora ki te rima, kua kai i'ora.

2Kua tuatua maira ēta'i o te au Phārīsea ki a rātou, “'E a'a kōtou i rave ei i tei kore i tau kia rave i te Sābati?”

3Kua pa'u atura a Iēsū ki a rātou, nā kō atura, “Kāre āina kōtou i tatau i tā Dāvida i rave, ka pongi ei aia ē tei kāpiti katoa atu ki aia ra?

4Lev 24.9

1 Sam 21.1-6Kua tomo aia ki roto i te 'are o te Atua, e rave atura ē kai atura i te mānga nō te aroaro o te Atua ko tei kore e tau i te Ture kia kai, māri rā nā te kau ta'unga anake ra, ē kua 'apai 'oki nā tei kāpiti katoa ki aia ra.”

5Kua nā kō atura 'oki a Iēsū ki a rātou, “Ko te Tamaiti a te Tangata nei, ko te 'Atu katoa ia o te Sābati.”

Ko te tangata rima 'akamate(Mātaio 12.9-14; Māreko 3.1-6)

6E tae akera ki tēta'i Sābati, tomo atura a Iēsū ki roto i te sūnago, 'āpi'i atura. Tei reira 'oki tēta'i tangata kua 'akamate tōna rima katau.

7Tē 'ākara matariki maira te au Pū'āpi'i Ture ē te au Phārīsea i a Iēsū, ko te 'akaora 'oki aia i taua tangata ra i te rā Sābati, kia rauka tā rātou tāpepe'anga mai i aia.

8Kua nakiro rā a Iēsū i tō rātou 'ēumiumi'anga, ē kua karanga atura ki te tangata nōna te rima 'akamate ra, “Ka tū ki runga, i rotopū nei tū ei.” Kua tū akera aia ki runga, tū i'ora.

9Kua karanga atura a Iēsū ki a rātou, “Ka ui atuna au ki a kōtou i tēta'i mea. Ko tē'ea tei tau kia rave i te rā Sābati, ko te meitaki āina, mē ko te kino? Ko te 'akaora āinei, mē ko te tāmate?”

10Kua 'akarau 'aere atura tōna mata ki a rātou rava rāi e pini 'ua ake. Kua karanga atura aia ki taua tangata ra, “Ka 'akatoro mai ana i tō rima.” Tei te pērā'anga ra, ora tākiri akera tōna rima.

11Kī rava akera rātou i te riri. Kua tuatua i'ora rātou rātou 'ua'orāi i tā rātou ka rave ki a Iēsū.

'Iki i'ora a Iēsū i te au pipi tino nga'uru mā rua(Mātaio 10.1-4; Māreko 3.13-19)

12I te reira au rā tōna 'aere'anga ki runga i tēta'i maunga e pure, e ao 'ua akera te pō i a Iēsū i te pure'anga ki te Atua.

13E ao akera, kua kāpiki atura aia ki tāna au pipi e 'aere mai ki aia ra, ē kua 'iki i'ora aia i e tino nga'uru mā rua o rātou, ē ko tāna ia i tapa i te ingoa 'e au 'āpōsetolo:

14ko Simona, tāna i tapa katoa ē ko Pētero, ē tōna teina ko Ānēderea; ko Iākōbo ē Ioane, ko Philipa ē Baratolomea,

15ko Mātaio ē Toma, ko Iākōbo a Ālephaia, ko Simona tei kāpiki'ia ē ko te Māro'iro'i;

16ko Iūda te tamaiti a Iākōbo, ē ko Iūda Ikariota, ko tei riro mai 'ei tuku pikika'a ra.

Tē 'āpi'i ra a Iēsū ma te 'akaora i te maki(Mātaio 4.23-25)

17Kua 'eke maira a Iēsū ki raro ē rātou katoa, tū i'ora aia ē te aronga pipi ma'ata ra i te ngā'i māniania ma tēta'i urupū tangata ma'ata nō Iūdea kātoatoa, ē nō Iērūsalēma ra, ē nō te pae ta'atai i Tūria ē Sīdona.

18I 'aere mai rātou e 'akarongo i aia ē kia 'akaora'ia rātou i tō rātou au maki. Ē te aronga i tāmanamanatā'ia e te au vaerua vi'ivi'i ra, kua 'akaora'ia rāi rātou.

19Kua umuumu maira taua aronga ma'ata katoa ra i te 'āmiri mai i aia, nō te mea, 'e mana tē pupu ra mei roto atu i aia, e 'akaora i a rātou kātoatoa.

Te 'akameitaki'anga ē te tūmatetenga(Mātaio 5.1-12)

20Kua 'ākara atura tō Iēsū mata ki tāna au pipi ē kua karanga atura aia,

“'E ao tō kōtou e tei 'aka'aka,

nō kōtou 'oki te bāsileia o te Atua ra.

21'E ao tō kōtou e tei pongi i tēianei,

e 'akakī'ia kōtou.

'E ao tō kōtou e tei auē i tēianei,

e kata 'oki kōtou.

22 1 Pet 4.14 “'E ao tō kōtou kia mākitakita mai te tangata i a kōtou, ē kia 'akatakakē mai rātou i a kōtou, kia 'akakino mai, ē kia tākinga kino mai i tō kōtou ingoa nō te Tamaiti a te Tangata nei.

232 Par 36.16; Anga 7.52E rekareka kōtou i te reira rā, e rererere 'aere 'ua i te rekareka. Inā 'oki, tei te ao tā kōtou tūtaki ma'ata. I pērā mai 'oki tō rātou 'ai tupuna ki te au peroveta ra.

24'E 'ae kōtou, e te aronga 'apinga nui,

kua rauka tō kōtou rekareka'anga!

25'E 'ae 'oki kōtou, e tei kī na i tēianei,

ka pongi 'oki kōtou.

'E 'ae 'oki kōtou, e te aronga e kata i tēianei,

ka mi'i 'oki kōtou ē ka auē.

26“'E 'ae 'oki kōtou kia 'akameitaki mai te tangata rava rāi i a kōtou! I pērā mai 'oki tō rātou 'ai tupuna ki te au peroveta pikika'a ra.”

Aro'a atu i tō kōtou au 'enemi(Mātaio 5.38-48; 7.12a)

27“Tēia rā tāku tuatua ki a kōtou, e 'akarongo maira: E aro'a atu i tō kōtou au 'enemi, e tākinga meitaki atu i te aronga i mākitakita mai i a kōtou.

28E 'akameitaki i te aronga i tao mai i a kōtou, ē e pure 'oki i te aronga i 'akakino mai i a kōtou.

29Tei moto maira i tō pāpāringa na, e anga katoa atu i tēta'i. Ē tei rave i tō kāka'u pū na, auraka katoa e tāpū i tō pereue.

30E 'ōronga atu nā tei pati mai ki a koe, ē ko tei rave i tō'ou 'apinga, auraka e pati 'aka'ou atu.

31Māt 7.12Ē tā kōtou e 'inangaro i te tangata kia rave ki a kōtou na, ka 'akapērā katoa atu kōtou ki a rātou ra.

32“Mē aro'a atu kōtou i te aronga tei aro'a mai i a kōtou, 'e a'a te 'akameitaki'anga i a kōtou i reira? Tē aro'a katoa nei 'oki te aronga rave 'ara i te aronga e aro'a mai i a rātou.

33Ē kia tākinga meitaki atu kōtou i te aronga e tākinga meitaki mai i a kōtou, 'e a'a te 'akameitaki'anga i a kōtou i reira? Tē pērā katoa nei 'oki te aronga rave 'ara.

34Ē kia 'ōronga atu kōtou ki te aronga tā kōtou i manako ē, ka rauka mai tā kōtou, 'e a'a te 'akameitaki'anga i a kōtou i reira? Tē 'ōronga katoa nei 'oki te rave 'ara ki te aronga rave 'ara, kia 'ārite mārie tā rātou ka rauka mai.

35E aro'a rā kōtou i tō kōtou au 'enemi, ē e tākinga meitaki ē e 'ōronga atu, auraka 'ua atu 'ei manako i te tūtaki. 'E tūtaki ma'ata tā kōtou i reira, ē ka riro 'oki kōtou 'ei tamariki nā tei Teitei Rava. 'E tākinga meitaki 'oki tōna i te aronga marekakore'ia ē te tangata kikino ra.

36E aro'a atu 'oki kōtou, mei tō kōtou Metua e aro'a maira.”

Te 'akavā'anga i tēta'i kē(Mātaio 7.1-5)

37“Auraka e 'akavā atu, ē kāre kōtou e 'akavā'ia mai. Auraka e 'aka'apa, ē kāre katoa kōtou e 'aka'apa'ia mai. E 'akakore atu i te 'apa, ē ka 'akakore'ia mai tā kōtou.

38Ka 'ōronga, ē ka 'ōronga'ia mai tā kōtou; ko te 'āite kī meitaki, kua taomi'ia ē kua ruru'ia e māringiringi 'ua atu, ko tā rātou ia ka tuku mai nā kōtou. Ko te 'āite tā kōtou e 'āite atu, ko tā kōtou rāi ia e 'āite'ia mai.”

39 Māt 15.14 Kua tuatua katoa atura a Iēsū i tēta'i parabole ki a rātou, “'E tika āina i te matapō kia arataki i te matapō? Kāre āina e topa kāpipiti rāua ki roto i te va'arua?

40Māt 10.24,25; Ioa 13.16; 15.20Kāre te pipi i ma'ata atu i tōna pū'āpi'i. Ko te pipi rā i karape i te kite, ka riro ia i te 'ārite ki tōna pū'āpi'i.

41“'E a'a 'oki koe i 'ākara ai i te tānga iti i roto i te mata o tō taeake, kāre 'oki koe i kite ē tei roto i tō'ou 'ua'orāi mata te rākau ma'ata?

42'E 'akapē'ea e rauka ai i a koe kia tuatua ki tō taeake, ‘E taku taeake, 'ō mai nāku e kiriti i te tānga iti i roto i tō mata na’, kāre 'oki koe i kite ē, 'e rākau ma'ata tei roto i tō'ou 'ua'orāi mata? E tērā ra tangata tāpikipiki ē! E 'akamata ana i te kiriti i te rākau ma'ata mei roto mai i tō'ou 'ua'orāi mata, 'ei reira koe e kite meitaki ei kia kiriti i te tānga iti mei roto mai i te mata o tō taeake.”

Tēta'i pū rākau ē tōna 'ua(Mātaio 7.16-20; 12.33-35)

43“Kāre te pū rākau meitaki ra e 'ua mai i te 'ua kino, ē kāre katoa te pū rākau kino ra e 'ua mai i te 'ua meitaki.

44Māt 12.33Tē kitea nei te au pū rākau i tōna 'ua'orāi 'ua tikāi. Kāre 'oki te suke e rauka mai ana mei runga mai i te rākau taratara, ē te vine katoa, kāre ia mei runga mai i te tātarāmoa.

45Māt 12.34E tuku mai te tangata meitaki i te mea meitaki nō roto mai i te putunga meitaki i roto i tōna ngākau. Ē e tuku mai te tangata kino i te mea kino nō roto mai i te putunga kino i roto i tōna ngākau. Nō te kī 'oki o te ngākau i tuatua'ia ai te va'a.”

Ngā tangata patu 'are e rua(Mātaio 7.24-27)

46“'E a'a rāi kōtou e kāpiki mai ei i āku nei ē, ‘E te 'Atu! E te 'Atu!’, ē kāre kōtou i rave i tāku i tuatua atu?

47Ko te 'aere mai ki āku nei ē e 'akarongo ei i tāku au tuatua, ē e 'ākono tikāi i'ora, e 'akakite atu au ki a kōtou i tōna tū:

48'E tau aia ki te tangata i patu i te 'are, ē kō atura kia 'ō'onu ki raro roa, tāmou i'ora i te pange ki runga a'o i te tokapapa. 'E vai puke'ia i'ora, viviki rava atura taua vai ra i te ta'e'anga mai ki taua 'are ra, kāre rā te 'are i keukeu i te reira, kua tāmou'ia 'oki ki runga i te tokapapa.

49Kāreka te 'akarongo 'ua ē kāre i 'ākono, 'e tau ia ki te tangata i patu i te 'are ki runga i te one, ē kāre ōna pange. E ta'e maira te vai puke, topa viviki i'ora taua 'are ra ki raro. 'E nga'anga'ā ma'ata 'oki tōna.”