1 Kōrīnētia 7 - Cook Island Maori Revised New Testament(CIMRNT)

Nō runga i te 'akaipoipo'anga

1I tēianei, nō runga i te au mea tā kōtou i tātā mai ki āku nei: 'e mea meitaki i te tangata kia kore aia e 'akaipoipo.

2Nō te tū kanga vi'ivi'i rā, 'ei va'ine mou tā te tāne tātakita'i, ē 'ei tāne mou rāi tā te va'ine tātakita'i.

3Kia 'ō atu te tāne i te au mea tau ki tāna va'ine, pērā katoa te va'ine ki tāna tāne.

4Kāre 'oki tei te 'oa va'ine te tika i tōna 'ua'orāi kōpapa, tei tāna tāne rā; pērā katoa kāre tei te 'oa tāne te tika i tōna 'ua'orāi kōpapa, tei tāna va'ine rā.

5'Eia'a kōrua e 'akangere atu tēta'i i tēta'i, māri 'ua nō tēta'i tuātau poto 'ua ē te 'akatika'ia e kōrua kia rauka tēta'i 'ati'anga nō te pure; ē i muri ake ka tōpiri 'aka'ou ei kōrua, kia kore a Sātani e tīmata i a kōrua nō tō kōrua tū rave ngō'ie 'ua i te kino.

6Tē 'akakite 'ua nei au i tēia mea nei ē, ka rauka ia i te rave, kāre rā mei te mea ē, 'e 'akaue'anga te reira.

7Ko tōku 'inangaro 'oki kia 'āite te tangata kātoatoa mei āku nei rāi te tū. Inārā, tei te tangata tātakita'i rāi tōna 'ua'orāi 'apinga aro'a vaerua nō kō mai i te Atua ra; ko tēta'i i tēia, ko tēta'i i tērā.

8Tēia tāku tuatua ki te aronga 'akaipoipokore ē te aronga taka'ua, te tāne ē te va'ine: 'E mea meitaki i a rātou kia no'o 'ua rātou mei āku nei rāi.

9Kia kore rā e rauka i a rātou ra, e 'akaipoipo rātou; 'e ngari ake rātou i te 'akaipoipo i te kā 'ua i te morimori tāne, mē kāre, i te morimori va'ine.

10 Māt 5.32; 19.9; Mār 10.11,12; Luk 16.18 Ē tēia tāku 'akaue'anga ki te aronga 'akaipoipo ra, kāre nāku, nā te 'Atu rā: 'eia'a te va'ine e tatara i tāna tāne,

11mē ka tatara rā aia, e no'o 'akaipoipokore 'ua aia, mē kāre ra, kia 'aka'au'ia aia ki tāna tāne. 'Eia'a katoa te tāne e kōpae kē atu i tāna va'ine.

12Ē tēia tāku tuatua ki te aronga e toe ra; nāku tēia, kāre ē nā te 'Atu: Mē 'e va'ine 'akarongokore tā tēta'i taeake, ē kua tika i taua va'ine ra kia no'o rāi ki aia, 'eia'a e kōpae kē atu i aia.

13Ē mē 'e tāne 'akarongokore tā tēta'i va'ine ra, ē kua tika i taua tāne ra kia no'o rāi ki aia, 'eia'a aia e kōpae kē atu i tāna tāne.

14Kua 'akatapu'ia 'oki te tāne 'akarongokore nā roto i te va'ine, ē kua 'akatapu'ia te va'ine 'akarongokore nā roto i te taeake ra; nāringa kāre ra, kua noa tā kōtou tamariki; i tēianei rā kua tapu rātou.

15Mē tatara rā te pae 'akarongokore ra, e 'akaruke kia 'aere 'ua atu ia. Kāre 'oki te taeake, mē kāre te tua'ine, e tā'ī'ī atu i te reira. Kua kāpiki 'oki te Atua i a kōtou kia 'au kōtou.

16'E a'a 'oki koe e kite ei, 'e mā'ine, mē ka ora tā'au tāne i a koe? Mē kāre, 'e a'a koe e kite ei, 'e tama, mē ka ora tā'au va'ine i a koe?

Kia tau te ora'anga ki tō te Atua kāpiki'anga

17Kia no'o rāi te tangata tātakita'i ki te tūranga tā te 'Atu ra i 'ōronga ki aia, ē ki tā te Atua i kāpiki i aia. Ko te 'akatere'anga tēia tāku e tuku ki te au 'ēkālēsia rava rāi.

18I kāpiki'ia āina tēta'i tangata tei oti i te peritome'ia? Auraka aia kia 'akangaro i tōna tū peritome! I kāpiki'ia āina tēta'i tangata tei kore i peritome'ia? Auraka aia kia peritome'ia.

19Kāre ō te peritome pu'apinga, kāre katoa ō te peritomekore pu'apinga, ko te 'ākono rā i te 'akaue'anga a te Atua ra ko te mea pu'apinga rava ia.

20Kia no'o rāi te tangata tātakita'i i te tū i kāpiki'ia ai aia ra.

21'E tuika'a āina koe e kāpiki'ia ra? Auraka e ma'ara atu! Inārā, mē 'e rāvenga kia riro koe 'ei tangata rangatira, 'e ngari ake kia pērā koe.

22Ko te tuika'a 'oki i kāpiki'ia e te 'Atu ra, 'e tangata rangatira ia nō te 'Atu. Pērā katoa te tangata rangatira i kāpiki'ia, 'e tuika'a ia nō te Mesia ra.

23Kua 'oko'ia mai kōtou ki te 'oko e te Atua. Auraka kōtou kia riro 'ei au tuika'a nō te tangata nei.

24E te au taeake ē, kia no'o rāi te tangata tātakita'i i mua i te aroaro o te Atua i te tū i kāpiki'ia ai aia ra.

Te au tamā'ine pāretēnia ē te au va'ine taka'ua

25Nō runga i te au tamā'ine pāretēnia: kāre āku 'akaue'anga nō kō mai i te 'Atu ra, tē tuku atu nei rā au i tōku manako, mei tō tēta'i tangata te ka rauka kia 'irinaki'ia mai, nō te mea, kua aro'a'ia mai au e te 'Atu.

26Nō te mea ē 'e tuātau tūmatetenga 'oki tēia, tē manako nei au ē ko tēia te mea meitaki, koia 'oki, kia no'o 'ua te tangata i tōna tū rāi.

27Kua tāpeka'ia āinei koe ki te va'ine? 'Eia'a e kimi i te rāvenga kia matara. Kāre koe i tāpeka'ia ki te va'ine? 'Eia'a koe e kimi i tēta'i va'ine.

28Mē ka 'akaipoipo rā koe, kāre i a koe e 'ara i reira. Ē mē ka 'akaipoipo te tamā'ine pāretēnia, kāre ia aia e 'ara. 'E manamanatā rā tō te reira i te ora'anga nei, ē tē 'inangaro nei au i te pāruru i a kōtou nō te reira.

29Ko tēia te 'āite'anga o tāku tuatua, e te au taeake ē: tē poto 'ua nei te tuātau; ē mei tēianei atu kia riro te aronga 'e va'ine tā rātou mei te mea ē kāre ā rātou va'ine;

30ē te aronga i auē ra, mei te mea ē kāre rātou i auē; ē te aronga i rekareka ra, mei te mea ē kāre rātou i rekareka; ē te aronga i 'oko maira, mei te mea ē kāre ā rātou;

31ē te aronga i 'akapu'apinga i tō tēianei ao ra, mei te mea ē kāre 'ua te reira 'e pu'apinga nō rātou. Nō te mea, tē ngaro kē nei tēianei tū o te ao nei.

32Ko tōku 'inangaro 'oki kia apiapikore kōtou. Te tangata 'akaipoipokore 'oki, tē 'ākonokono ra ia i tā te 'Atu, 'akapē'ea e mareka mai ei te 'Atu i aia.

33Kāreka ko te tangata 'akaipoipo ra, tē 'ākonokono ra ia i tā tō tēianei ao, 'akapē'ea e mareka mai ei tāna va'ine i aia,

34ē kua paparua tōna manako. Ē ko te va'ine 'akaipoipokore, mē kāre, te tamā'ine pāretēnia ra, tē 'ākonokono ra ia i tā te 'Atu, kia tapu aia i te pae kōpapa ē i te pae vaerua katoa. Kāreka te va'ine 'akaipoipo ra, tē 'ākonokono ra ia i tā tō tēianei ao, 'akapē'ea e mareka mai ei tāna tāne i aia.

35Tē 'akakite nei au i tēia mea ki a kōtou 'ei meitaki nō kōtou, kāre rā ē kia tāpeka'ia kōtou ki te 'ere. Kia tau rā tō kōtou ora'anga ē kia 'ākonokono kōtou i tā te 'Atu ma te manamanatākore ra.

36Mē tē manako nei rā tēta'i tangata ē, kāre e tau ana tāna 'ākono'anga ki tāna tamā'ine pāretēnia i momoko'ia ra, ē tē pakari ra tōna 'inangaro, ē tē manako ra aia ē kia 'akaipoipo aia e tikāi, kāre aia e 'ara i te reira. E tau rāi kia 'akaipoipo rāua.

37Ko te tangata rā tei pāpū tikāi tōna manako, ē kāre aia i umuumu'ia mai, tē rauka ra 'oki i aia i te 'iki i tāna 'ua'orāi ka rave, ē tē 'akatika mārie ra aia i roto i tōna 'ua'orāi ngākau ē, e tāpū aia i te tamā'ine pāretēnia nāna ra, tē rave ra aia i te mea meitaki.

38Nō reira, ko tei 'akaipoipo i tāna tamā'ine pāretēnia, tē rave ra aia i te mea meitaki; ē ko tei kore i 'akaipoipo, tē rave ra aia i te mea meitaki ma'ata atu.

39Kua tāpeka'ia te va'ine i te tuātau tē ora 'ua ra tāna tāne; kia mate rā tāna tāne, tē ti'amā ra aia kia 'akaipoipo ki te tangata tāna i 'inangaro, inārā, kia tau i te 'Atu ra.

40'E ao ma'ata atu rā tōna, i tōku nei manako'anga, kia no'o 'ua aia mei tērā te tū. Ē tē manako nei au ē, tei āku rāi te Vaerua o te Atua.