Kolosa Nō runga i tēia leta - Cook Island Maori Revised New Testament(CIMRNT)

Nō runga i tēia letaKo Kolosa, ko tēta'i 'ōire pu'apinga ma'ata tēia i te tu'anga 'opunga o Āsia Mīnora i tō Paulo tuātau. Ē mei tēia 'ōire ki Ēphēsia mei te ta'i 'ānere maire te mamao ki te tu'anga 'opunga. Kāre rava a Paulo i tae ana ki Kolosa, inārā, kua mareka aia i te rongo'anga ē, kua mātūtū tikāi te 'akarongo o te au Keretitiāno i reira (1.3-7; 2.6,7). Kua 'āriki rātou i te karere nā roto mai i te tuatua a tēta'i tangata tei karanga'ia ē ko Ēpāphera tei no'o ana i reira (1.7; 4.12,13). Tei roto rā aia i te 'are 'āuri rāua ko Paulo (Philemona 23) i te 'ati'anga i tātā ai a Paulo i tēia leta (1.14; 4.3,10, 18).'E ma'ata te au tangata i roto i tō Kolosa 'ēkālēsia nō roto mai i te au 'ētene (1.27). Ē tēta'i pae o rātou kua āru rāi i te 'āpi'i'anga tūkē ē te au peu tūkē (2.16-23). Kua manako 'oki rātou ē, ka meitaki anake te kauraro i te Atua kia kōpae kē katoa rātou i te tū 'inangaro kōpapa; ē te meitaki ra kia 'akamori katoa rātou i te au 'āngela ē ēta'i mana vaerua kē atu. Kua 'inangaro rā a Paulo kia mārama rātou ē, ko te Mesia tei runga aia i te rangi ra i kō i te Atua, ē tē tūtara nei aia ki runga a'o i te au mana 'akateretere rava rāi o te reva nei (3.1). Nō reira, mē ka 'akamori rātou, kia 'akamori rātou i te Mesia e tikāi.Kua tā'iku a Paulo i tēta'i 'īmene mānea tei 'akamārama mai ē, ko 'ai tikāi te Mesia: “Ko te Mesia ko te tū tikāi ia nō te Atua 'ākarakore'ia. Ko ia te tama mua o te au mea rava rāi i 'anga'ia ra....Ē i mareka ai 'oki te Atua kia no'o tōna 'ua'orāi kī katoa ki roto i te Mesia.” Ē i mareka katoa ai te Atua kia nā roto i aia e 'aka'ongi'ia ai te au mea rava rāi. Kua 'akatupu'ia 'oki te 'au nā roto i te maringi'angā toto i runga i te sātauro (1.15,19, 20).Te 'akano'ono'o'anga o tēia leta1. Te aro'a'anga 1.1-22. Te pure 'akameitaki'anga 1.3-83. Tō te Mesia tū ē tāna 'anga'anga 1.9—2.194. Te ora'anga 'ōu i roto i te Mesia 2.20—4.65. Te ve'eve'e'anga aro'a 4.7-18