'Anga'anga 26 - Cook Island Maori Revised New Testament(CIMRNT)

Tē pāruru nei a Paulo i aia 'ua'orāi i mua i a Āgeripa

1Kua tuatua maira a Āgeripa ki a Paulo, “Ka tika i a koe kia pāruru i a koe 'ua'orāi.” Kua 'akatika atura a Paulo i tōna rima, ē kua pa'u atura,

2“E te ariki, ē Āgeripa, tē manako nei au ē, 'e ākā manuia tōku i te pāruru atu i āku nō te au mea kātoatoa i tāpepe'ia mai ei au e te Ngāti Iūda ra,

3nō te mea, kua nakiro tikāi koe i te au peu rava rāi ē te au taumārōrō'anga a te Ngāti Iūda. Ē nō reira, tē pati atu nei au ki a koe kia 'akarongo mārie mai koe i āku.

4“Kua kite 'oki te Ngāti Iūda rava rāi i te tū o tōku ora'anga mei tōku 'ōu'anga mai rāi, koia 'oki, kua no'o au mei muatangāna mai rāi i rotopū i tōku 'ua'orāi 'iti tangata ē i Iērūsalēma katoa ra.

5Anga 23.6; Phil 3.5Kua kite takere rāi 'oki rātou i āku mei muatangāna mai, ē, nāringa rātou i 'inangaro, ka rauka i a rātou i te 'akaāri mai ē, i no'o Phārīsea 'ua ana au kia tau ki te pupu 'ākono pakari tikāi i roto i tō mātou 'akamori'anga.

6Tē tū nei au i tēianei i konei kia 'akavā'ia mai nō runga i te tatari'anga i te papa'u'anga tā te Atua i tuatua mai ki tō mātou 'ui tupuna ra,

7ē ko taua papa'u'anga ra tā tō mātou au kōpū tino nga'uru mā rua i tatari ra kia rauka mai, nā roto i tā rātou 'akamori'anga tukumoekore i te Atua i te pō ē te ao. Ē nō taua tatari'anga ra, e te ariki, i tāpepe'ia mai ei au e te Ngāti Iūda nei.

8'E a'a rā kōtou, e te Ngāti Iūda, i manako ei ē, kāre rava e rauka i te Atua i te 'akatū i tei mate?

9 Anga 8.3; 22.4,5 “Kua pāpū tikāi 'oki au i mua ana ē, 'e mea tau tikāi kia ma'ata 'ua atu tāku au pāto'i'anga atu i te ingoa o Iēsū nō Nāzarēta.

10Ē kua pērā 'oki au i Iērūsalēma. 'E mānganui 'oki te aronga tapu i titiri'ia e au ki roto i te 'are 'āuri, i raro ake i te tika'anga mei kō mai i te kau ta'unga nunui ra; ē kua 'akatika au kia tāmate'ia rātou.

11Kua putuputu 'oki au i te pāpā i a rātou i roto i tērā sūnago ē i tērā sūnago, ē kua tāmātakutaku pakari au i a rātou kia 'akakino i te Atua, ē nō te ma'ata roa o tōku riri 'oto'oto i a rātou, kua tākinga kino atura au i a rātou e tae 'ua atura ki te au 'ōire i te au 'enua kē ra.

Tē 'akakite nei a Paulo i tōna 'aka'āriu'anga'ia('Anga'anga 9.1-19; 22.6-16)

12“Nō taua 'akakoro'anga ra i āku e 'aere ra ki Dāmāseko i te avatea pū ra, i raro ake i te mana ē te tika'anga a te kau ta'unga nunui ra.

13E te ariki, kua kite atura au i tēta'i mārama nō te rangi mai i runga i te mataara, 'e ma'ata atu tōna kakā i tō te rā, ē kua 'akapini'ia i'ora au ē te aronga katoa i āru mai i taua tere nōku ra e taua mārama ma'ata ra.

14Ē kua topa i'ora mātou pou roa ki raro i te one, ē kua 'akarongo atura au i tēta'i reo i te tuatua'anga mai ki āku nā roto i te reo 'Ēbera, ‘E Saula, e Saula, 'e a'a koe i tākinga kino mai ei i āku? 'E mea rave ngatā 'oki nā'au kia tu'e ki runga i te kō.’

15Kua ui atura au, ‘E te 'Atu, ko 'ai koe?’ Kua pa'u maira te 'Atu ki āku, ‘Ko au, ko Iēsū, tā'au e tākinga kino mai nei.

16E tū rā, e tū mai ki runga i tō vaevae. Nō tēia 'akakoro'anga 'oki i mama atu ei au ki a koe, nō te 'akariro i a koe 'ei tāvini ē 'ei kite nō te au mea katoa tā'au i 'ākara ra ē te au mea katoa tāku ka 'akaāri atu ki a koe na,

17nā roto i te 'iki'anga mai i a koe mei roto mai i tōku 'iti tangata ē te au 'ētene ra. Ē tē tono atu nei au i a koe ki a rātou

18'ei 'akapu'era i tō rātou mata, kia 'aka'āriu mai koe i a rātou mei roto mai i te pōiri ki te mārama, ē mei roto mai i te mana o Sātani ki te Atua, kia rauka i a rātou te 'akakore'anga i tā rātou au 'ara, ē kia rauka katoa i a rātou tēta'i ngā'i i rotopū i te aronga i 'akatapu'ia nā roto i te 'irinaki'anga i āku.’

Tē 'akakite nei a Paulo i tāna 'anga'anga

19“Mei reira mai, e te ariki, e Āgeripa, kāre rava au i kaurarokore ana i taua 'ōrama nō te rangi maira.

20Anga 9.20,28,29Kua nā mua rā au i te 'akakite ki a rātou i Dāmāseko, ē ki tō Iērūsalēma, ē i muri akera, ki te au tu'anga 'enua katoa o Iūdea ra, ē pērā katoa ki te au 'ētene, kia tatarā'ara rātou ē kia 'āriu mai ki te Atua nā roto i te rave'anga i te au 'anga'anga e tau i te tatarā'ara'anga.

21Nō taua au mea ra i 'opu mai ei te Ngāti Iūda i āku i roto i te 'iero, ē kua tāmata maira i te tāmate i āku.

22Kua tauturu'ia maira rā au e te Atua e tae rava ake nei ki tēianei rā. Ē tē tū nei au i konei i te 'akakite 'ua'anga atu ki te aronga mama'ata ē te aronga rikiriki katoa i tā te au peroveta ē tā Mōse i 'akakite ana ē ka tupu:

23a: 1 Kōr 15.20; b: Isa 42.6; 49.6koia 'oki, ka mate rāi te Mesia e tikāi, ē ko ia te mōmua te ka tū'aka'ou mai mei te mate maira, ē ka 'akakite aia i te mārama ki tōna 'iti tangata ē te au 'ētene katoa.”

24Ē tē pērā 'ua ra a Paulo i te pāruru'anga i aia, kua kāpiki ma'ata 'ua maira a Fēsito, “E Paulo, kua 'āuouō'ia koe; nō te ma'ata roa o tō'ou kite i 'āuouō'ia ai koe.”

25Kua karanga atura a Paulo, “Kāre au i 'āuouō'ia, e Fēsito Ngāteitei, tē 'akakite nei rā au i te tuatua mou.

26Kua nakiro 'ua 'oki te ariki i tēianei au mea tāku i 'akakite matakukore atu nei ki aia; ē 'e mea pāpū i āku kāre rava tēta'i o tēianei au mea i kore i kitea'ia e ia, nō te mea, kāre te reira i rave'ia ki te ngā'i pōiri.

27E te ariki, e Āgeripa, tē 'irinaki āinei koe i te au peroveta? Tē kite nei au ē, tē 'irinaki nei koe!”

28Kua karanga maira a Āgeripa ki a Paulo, “Kua manako tikāi koe ē, kāre e roa'ia atu ka riro mai au 'ei Keretitiāno!”

29Kua karanga atura a Paulo, “Ko tāku ia pati'anga ki te Atua, auraka ko koe anake 'ua, ko te aronga katoa rā e 'akarongo mai i āku i tēianei rā, noa atu te roa ē te poto o te tuātau, kia 'āiteite mai kōtou kātoatoa mei āku nei rāi, auraka rā tēianei piri'anganaoa.”

30Tū akera te ariki ki runga, ē te kāvana, ē Berenike ē te aronga i no'o katoa rātou ra,

31ē kia 'akaātea atu rātou, kua kārangaranga i'ora rātou, rātou 'ua'orāi, “Kāre rava ā tēianei tangata mea i rave e tau ei te mate i aia, mē kāre ra i te mou'āuri.”

32Kua karanga atura a Āgeripa ki a Fēsito, “E tau tēianei tangata kia tuku'ia, nāringa kāre aia i karanga ē, ‘Nā Kaisara au e 'akavā.’ ”