Philipi Nō runga i tēia leta - Cook Island Maori Revised New Testament(CIMRNT)

Nō runga i tēia letaKua tātā a Paulo i tēia leta mei roto mai i te 'are 'āuri (1.7) 'ei 'akameitaki i te au Keretitiāno i Philipi, nō te mea, kua tauturu rātou i aia ma tā rātou 'apinga aro'a ē te pure (1.5; 4.10-19). Tē mānakonako nei aia ē, kua tuku'ia aia ki va'o i te 'are 'āuri, kia rauka i aia i te ako 'aka'ou i te karere meitaki (3.17-18). Kua kite rā aia ē, pēnei 'e mate tōna utunga (1.21; 2.17; 3.10).Ko Philipi, ko tēta'i 'ōire i Mākedōnia, te tu'anga 'apatokerau o Eleni. Ē i reira kua ako atu aia i te tuatua meitaki ē kua 'akamata i tēta'i 'ēkālēsia ('Anga'anga 16). Ē i tēianei, tē 'akamatakite nei aia i te au Keretitiāno i Philipi ē, ka tākinga kino'ia pa'a rātou mei te Mesia rāi, ē mei a Paulo nei rāi. Mē ka tupu te reira, kia ma'ara rātou ē, 'e 'akameitaki'anga te reira nō kō mai i te Atua nō tō rātou 'irinaki'anga i te Mesia (1.28-30).'E mānganui te au manamanatā i roto i te 'ēkālēsia i Philipi. Tē 'āpi'i nei 'oki ēta'i aronga ē, kāre 'e rāvenga ora nō te tangata tei kore i 'ākono i te Ture a Mōse. Tē pāto'i nei a Paulo i te reira manako. Ē kāre aia i 'akaperepere i taua aronga ra ē te 'akamatakite atu nei aia i te 'ēkālēsia, i te nā kō'anga ē, “E matakite i te aronga 'anga'anga kikino, taua au puakaaoa ra” (3.2-11).Kua kī katoa tēia leta i te rekareka. Noa atu ē tei roto aia i te 'are 'āuri, tē rekareka nei a Paulo. Kua kite 'oki aia ē, kua tupu rāi te meitaki nōna i roto i te tūranga kino. Ē kua ma'ara katoa 'oki aia i te tū tākinga meitaki o tō Philipi 'ēkālēsia ki aia.Tē 'akama'ara nei a Paulo i a rātou ē, kia no'o te 'iti tangata o te Atua ma te ngākau 'okota'i e tikāi (2.2; 4.2,3), ē kia 'okota'i ō rātou manako ē tō te Mesia ko Iēsū:“Ko tōna tū, ko te tū 'oki ia o te Atua, kāre rā aia i manako i te umuumu kia 'āite aia ki te Atua. Kua tuku kē atura aia i tōna 'ua'orāi tū, ē kua rava i tō te tuika'a i te riro'anga mai mei te tangata nei rāi” (2.6,7).Te 'akano'ono'o'anga o tēia leta1. Te aro'a'anga ē te pure 1.1-112. Tō Paulo manako o te ora'anga tika tikāi 1.12-303. Ko tō te Mesia 'ākara'anga o te tū 'aka'aka 2.1-184. Te tuatua nō runga i te au 'oa o Paulo 2.19-305. Te tuatua tika nō kō mai i te Atua 3.1—4.96. Tō Paulo 'akameitaki'anga i tō Philipi 4.10-207. Te ve'eve'e'anga aro'a 4.21-23