Luka 13 - Cook Island Maori Revised New Testament(CIMRNT)

E tatarā'ara kia kore e mate

1Tei reira tēta'i pae tangata i taua tuātau rāi i tuatua mai ki a Iēsū i te au tangata Galilea tei 'irokia e Pilato tō rātou toto ē tā rātou au 'ātinga.

2Kua pa'u atura a Iēsū ki a rātou, nā kō atura, “Tē manako na kōtou ē, 'e aronga 'ara ma'ata taua au tangata Galilea ra i tō Galilea kātoatoa, nō te mea, kua mate rātou i te reira?

3Kāre tākiri! Tē 'akakite atu nei au ki a kōtou, kia kore rā kōtou e tatarā'ara, ka mate rāi kōtou kātoatoa mei a rātou rāi.

4Ē taua tangata e tino nga'uru mā varu ra i topa'ia i te pūnanga i Sīloama ra ē mate rava atura, tē manako na kōtou ē, 'e aronga 'ara ma'ata rātou i te au tangata kātoatoa tei no'o i Iērūsalēma?

5Kāre tākiri! Tē 'akakite atu nei au ki a kōtou, kia kore rā kōtou e tatarā'ara, ka mate rāi kōtou kātoatoa mei a rātou rāi.”

Te parabole nō te pū suke 'uakore

6Kua taki atura a Iēsū i tēianei parabole, “'E pū suke tā tēta'i tangata i tanumia i roto i tōna kāingā vine. E 'aere atura aia e 'ākara i te kai i runga a'o ra, kāre rā 'e mea i kitea'ia.

7Kua karanga atura aia ki te tangata 'ākonokono i taua kāingā vine ra, ‘Inā, ka toru ake nei ōku mata'iti i te 'aere'anga mai e 'ākara i te kai i runga a'o i tēianei pū suke, ē kāre e kitea. E tīpū atu. 'E a'a aia e 'akakapikapi ei i te kāinga?’

8Kua pa'u maira rā aia, ‘E te pū ē, e vai'o 'ua ana, 'e 'okota'i 'ua ake mata'iti toe. E kenu 'ua atu au takapini i aia, e kia maniva atu te reira.

9Pēnei ake ko tē 'ua mai i te tuātau ki mua, mē kāre rā, e tīpū atu i aia.’ ”

Tē 'akaora nei a Iēsū i tēta'i va'ine pirikoki i te Sābati

10Tē 'āpi'i ra a Iēsū i roto i tēta'i sūnago i te Sābati.

11Ē inā, tei reira tēta'i va'ine, 'e vaerua 'akatupu maki tōna e ta'i nga'uru mā varu mata'iti. Kua mingi rava ki raro, kāre rava i rauka i aia i te tū tika.

12I tō Iēsū kite'anga i aia, kua kāpiki atura aia ki aia, nā kō atura, “E mā'ine, kua ora koe i tō'ou maki.”

13Ē kua tuku atura a Iēsū i ōna rima ki runga a'o i aia. Ē i taua 'ati'anga rāi kua tū tika mai taua va'ine ra ki runga, ē kua 'akakakā atura i te Atua.

14 Exo 20.9,10; Deut 5.13,14 Kua riri akera te tūtara o te sūnago, i te mea, kua 'akaora a Iēsū i te rā Sābati, ē kua tuatua atura aia ki te tangata tini, nā kō akera, “E ono rā e tau ei nō te 'anga'anga. 'Ei reira kōtou ka 'aere mai ei kia 'akaora'ia, auraka i te rā Sābati!”

15Kua pa'u atura te 'Atu, nā kō atura ki aia, “E tērā ra tangata tāpikipiki ē, ko 'ai tā kōtou nei e kore e tatara i tāna puakatoro, mē kāre tāna 'āsini, nō te vairangā kai ra, ka taki ei ki te vai i te Sābati?

16Ko tēia va'ine nei i tāpeka'ia e Sātani, inā, e rau nga'uru mā varu ake nei mata'iti, kāre āinei i te mea tau kia tatara'ia aia mei tēia tāpeka nei i te rā Sābati, nō te mea, 'e 'uānga aia nō Āberahāma?”

17Tei te tuatua'anga a Iēsū i te reira, 'akamā anake i'ora te aronga i mārō mai i aia ra. Mareka rava atura rā te tangata tini rava rāi i te au mea vāvāria katoa i rave'ia e ia ra.

Ngā parabole o te 'ua sinapi ē te 'ōpue(Mātaio 13.31-33; Māreko 4.30-32)

18Kua karanga atura a Iēsū, “Mei te a'a te tū o te bāsileia o te Atua? Ē ka 'aka'āite au i te reira ki te a'a?

19'E 'ārite aia ki tēta'i 'ua sinapi i rave'ia e tēta'i tangata ē i tanumia atura ki roto i tōna kāinga. E tupu atura, e riro atura 'ei rākau ma'ata, ē e tō maira te au manu o te reva i runga a'o i tōna rārā.”

20Kua karanga 'aka'ou atura a Iēsū, “Ka 'aka'āite au i te bāsileia o te Atua ki te a'a?

21'E 'āite te bāsileia o te ao ra ki tēta'i va'ine i kā'iro e 'ā ngauru litera 'ōpue ki te varāoa mata. Kua 'aka'ōpue'ia i reira te varāoa katoa ra.”

Te ngūtupa 'ōiti(Mātaio 7.13-14,21-23)

22E 'aere atura a Iēsū nā roto i te au 'ōire mama'ata ē te au 'ōire rikiriki i te 'āpi'i 'aere'anga, i aia e 'aere ra ki Iērūsalēma.

23Kua ui maira tēta'i tangata ki aia, “E te 'Atu, 'e tokoiti 'ua āinei te ka 'akaora'ia?”

Kua tuatua atura a Iēsū ki a rātou,

24“E aruaru 'ua atuna i te tomo nā roto i te ngūtupa 'ōiti, nō te mea, tē karanga atu nei au ki a kōtou, 'e mānganui te ka tāmata i te tomo ki roto, ē kāre e rauka i a rātou.

25Kia tū mai te pū ngutu'are ki runga e tōpiri i te pā, tē tū 'ua ra kōtou i va'o ē ka tōpāpā i te pā i te nā kō'anga mai, ‘E te 'Atu, e 'e'eu ana i te pā ki a mātou.’ Ka pa'u atura aia ki a kōtou, ‘Kāre au i kite i a kōtou, ē nō 'ea mai kōtou.’

26'Ei reira kōtou e tuatua mai ē, ‘I kaikai ana mātou i mua i tō aroaro ē i inu 'oki, ē kua 'āpi'i koe ki te au arāta'a i ō mātou ra.’

27Sal 6.8Ka karanga atura aia ē, ‘Kāre au i kite i a kōtou, ē nō 'ea mai kōtou. E 'aere kē atu kōtou mei konei i āku, e te aronga rave i te tuatua tikakore ē!’

28Māt 22.13; 25.30

Māt 8.11,12I reira te auē'anga ē te pākati'angā ni'o, mē kite kōtou i a Āberahāma, ē Īsā'aka, ē Iākōba, ē te au peroveta kātoatoa i roto i te bāsileia o te Atua, ko kōtou rā e tīria'ia ki va'o.

29Ka 'aere mai te au tangata mei te 'itinga ē te 'opunga, mei 'apatokerau ē mei 'apatonga mai, ka no'o ei rātou ki te kaingākai i te bāsileia o te Atua.

30Māt 19.30; 20.16; Mār 10.31Ē inā, ka riro tō muri nō mua, e riro tō mua rā nō muri.”

Tō Iēsū auē'anga i a Iērūsalēma(Mātaio 23.37-39)

31I taua 'ati'anga rāi kua 'aere maira ēta'i Phārīsea ki a Iēsū, ē kua tuatua maira, “E 'aere kē atuna koe ma te 'akaruke mai i konei, nō te mea, tē 'inangaro ra a Heroda i te tā i a koe.”

32Kua pa'u atura aia ki a rātou, “E 'aere kōtou e 'akakite atu ki taua suoli ra ē, ‘Inā, e tuaru au i te dēmoni ki va'o ē e 'akaora au i te maki i tēia rā ē āpōpō, kia tae ki te pō toru rā, ka oti rava taku 'anga'anga.’

33Inārā, kia 'aere atu au i tēia rā, āpōpō, ē āpōpō atu e tikāi. Kāre 'oki i te mea tau kia tāmate'ia tēta'i peroveta i va'o ake i a Iērūsalēma.

34“E Iērūsalēma, e Iērūsalēma ē, ko koe tei tā i te au peroveta ē i pē'i ki te toka i te aronga i tonokia atu ki a koe na! 'E mānganui tōku anoano i te 'akaputuputu mai i tō au tamariki, mei te moa e 'akako'uko'u i tāna punupunua ki raro ake i tōna ngā pē'au, kāre rā i tika i a kōtou.

35Sal 118.26Inā, ka 'akaruke tane'a'ia tō kōtou 'are ki a kōtou. Tē 'akakite atu nei au ki a kōtou, kāre kōtou e kite 'aka'ou mai i āku e tae 'ua atu ki te rā e tuatua ai kōtou ē, ‘Kia ora aia ko tei 'aere mai ma te ingoa o te 'Atu ra.’ ”