2 Kōrīnētia 9 - Cook Island Maori Revised New Testament(CIMRNT)

Te 'anga'anga tauturu nā te aronga tapu

1Ē kāre 'oki i te mea tau kia tātā 'aka'ou atu au ki a kōtou nō runga i te 'anga'anga tauturu i te aronga tapu,

2nō te mea, tē nakiro nei au i tō kōtou ngākau mā'ora'ora, ē tē 'akapa'apa'a nei au i a kōtou nō te reira ki tō Mākedōnia nei i te nā kō'anga ē, “Kua te'ate'amamao takere tō Ākaia mei tēia mata'iti i topa ake nei.” Ē nā tō kōtou tūranga māro'iro'i i 'akatupu i te māro'iro'i ki te ma'ata'anga o rātou.

3Tē tono atu nei au i te au taeake, kia kore e riro tā mātou pa'apa'a'anga i a kōtou nō tēia 'anga'anga nei 'ei mea pu'apingakore. Kia te'ate'amamao rāi kōtou mei tāku i 'akakite ake nei.

4Mē ka āru mai tō Mākedōnia i āku, ē mē kite rātou ē kāre kōtou i te'ate'amamao, ka 'akamā mātou, nō te mea, kua pāpū tikāi i a mātou. Ka ma'ata rava atura tō kōtou 'akamā!

5Nō reira, kua manako au ē, 'e mea tau i te pati 'akatenga atu i te au taeake kia nā mua rāi rātou i āku i te 'aere atu ki a kōtou na ē te 'akate'ate'amamao i te 'apinga 'ōronga tā kōtou i papa'u takere maira. I reira, ka papa taua 'apinga 'ōronga ra 'ei 'apinga aro'a tikāi, 'eia'a rā mei tēta'i 'apinga mārō'ia.

6E ma'ara ē, ko te rūrū ma te karapi'i ra ka kokoti ia i te 'ua meangiti ra, ko te rūrū rā ma te karapi'ikore ka kokoti ia i te 'ua ma'ata ra.

7E 'ōronga atu te tangata tātakita'i i tāna i 'akataka i roto i tōna ngākau, 'eia'a ma te auē ngākau, mē kāre, nō te mea ē i mārō'ia. E mareka mai 'oki te Atua i te tangata tei 'ōronga ma te rekareka.

8Ē ka tika i te Atua i te 'akama'ata rava atu i te au mea meitaki katoa nā kōtou, kia rava te au mea i umuumu'ia ra nā kōtou 'ua'orāi i te au tuātau rava rāi ē kia toe rāi nā kōtou nō te au 'anga'anga mēmeitaki katoa ra,

9Sal 112.9mei tei tātā'ia ra ē,

“Kua tu'a mārie aia i tāna, kua 'ōronga nā te aronga puta'ua,

ka vai rāi tōna tākinga meitaki e tuātau 'ua atu.”

10 Isa 55.10 Ko te Atua 'oki tei tuku mai i te 'ua nā te rūrū 'ua ē te mānga 'ei kai, ka tuku katoa mai ia ki a kōtou i te 'ua 'ei rūrū, ē ka 'akama'ata 'oki i te reira. Ē ka 'akama'ata katoa aia i te 'ua'anga o tō kōtou tākinga meitaki ra.

11Kua ra'i te au mea katoa nei ki a kōtou kia 'ōronga atu kōtou ma te ngākau tae. Tā kōtou e 'ōronga atu nā roto i a mātou nei ka riro 'ei 'akameitaki'anga i te Atua.

12Nō te mea, ko te rave i tēia 'anga'anga aro'a, ka 'ōronga ia te reira ki te aronga tapu i te au mea tā rātou i ngere, ē ka riro katoa te reira 'ei tumu nō te au 'akameitaki'anga 'e mānganui i te Atua.

13Nā roto 'oki i tēia 'akairo o tā kōtou tauturu, ka 'akakakā'ia te Atua e te aronga tei 'āriki i te reira nō tō kōtou kauraro mārie'anga i te 'ēvangelia o te Mesia i mouria e kōtou na, ē nō tō kōtou ngākau 'ōronga i te piri'anga atu ki a rātou ē ki te kātoatoa.

14Ē ka pure 'oki rātou i a kōtou nō tō rātou 'inangaro ma'ata i a kōtou nō te ra'i 'oki o te aro'a 'ua o te Atua i roto i a kōtou na.

15Kia 'akameitaki'ia te Atua nō tāna 'apinga aro'a tei kore e rauka kia tuatua'ia ra!