Tito 2 - Cook Island Maori Revised New Testament(CIMRNT)

Te 'āpi'i'anga nō te aronga tūkēkē

1Ko koe rā, e 'āpi'i atu koe i te au mea tau i te 'āpi'i'anga mou ra.

2E 'āpi'i atu i te au tangata pakari kia 'ākono meitaki, kia marū, kia mako, kia māro'iro'i i te pae o te 'akarongo, te aro'a ē te 'akakoromaki.

3Mei te reira katoa, e 'āpi'i atu i te au va'ine pakari kia tau tō rātou tū i te aronga tapu ra, auraka e uruto'e, auraka e inuinu uaina, kia 'āpi'i atu rātou i te au mea meitaki,

4'ei tauturu i te au va'ine 'ōu ra kia riro rātou 'ei au va'ine tei 'akaperepere atu i tā rātou au tāne ē tā rātou au tamariki.

5'Ei au va'ine mako katoa rātou ē te mā te ngākau, tei 'ākono meitaki i te ngutu'are ma te kauraro i tā rātou 'ua'orāi au tāne. 'Ei reira, kāre te karere a te Atua e 'akakino'ia.

6E 'akamāro'iro'i katoa atu i te au tangata 'ōu kia mako meitaki rātou.

7E riro koe 'ei 'ākara'anga o te 'anga'anga meitaki i te au mea katoa ra: 'ei 'āpi'i'anga 'irokore, 'ei ora'anga kangakore,

8ē 'ei karere mou tei kore e tika kia 'aka'apa'ia. Ka 'akamā i reira te tangata pāto'i, nō te mea, kāre e rauka i aia i te 'akakite i tēta'i 'ua atu mea kino nō runga i a tātou.

9E 'akamāro'iro'i katoa atu koe i te au tuika'a, kia mōraro ki tō rātou au pū i te au mea katoa. Kia 'akamareka rātou i tō rātou au pū, auraka e pa'upa'u tuatua.

10Auraka rātou e rave pōiri 'ua i tēta'i 'ua atu 'apinga, inārā, kia 'akaāri rātou nā roto i te au mea kātoatoa ē, 'e mea tau kia 'irinaki meitaki'ia rātou. Ka 'akariro rātou i reira i te 'āpi'i'anga a te Atua tō tātou 'Akaora 'ei mea mānea i te au 'ati'anga rava rāi.

Te aro'a o te Atua ē te ora'anga 'ōu

11Kua mama mai 'oki te aro'a 'ua o te Atua kia ora te tangata rava rāi.

12Tē 'āpi'i mai nei aia i a tātou ko tei kōpae atu i te tū 'ākonokore Atua ē te au mea navenave o tēianei ao, kia no'o tāmou tātou ma te meitaki, te tuatua tika ē te 'ākono Atua i tēia tuātau nei,

13i a tātou e tāpapa nei i te meitaki i mānakonako'ia nei, koia 'oki, te mama'anga mai o te kakā o tō tātou Atua ma'ata ra, ko te 'Akaora ko Iēsū Mesia.

14a: Sal 130.8; b: Exo 19.5; Deut 4.20; 7.6; 14.2; 1 Pet 2.9Kua 'ōronga mai 'oki aia i aia 'ua'orāi nō tātou i te 'akaora'anga mai i a tātou mei roto mai i te au kino rava rāi, ē i te 'akariro'anga mai i a tātou 'ei 'iti tangata tapu nōna 'ua'orāi, 'e 'iti tangata tei kimikimi 'ua i te rave i te 'anga'anga mēmeitaki.

15E 'akakite koe i tēia au tuatua nei, e 'akamāro'iro'i atu ē e kauvae atu ma tō'ou mana katoa. Auraka tēta'i tangata e 'akava'ava'a i a koe.