2 Kōrīnētia 10 - Cook Island Maori Revised New Testament(CIMRNT)

Tē pāruru nei a Paulo i tāna 'anga'anga 'ēvangelia

1Ko au nei, ko Paulo tei tuatua'ia ē, “'E tū ā 'aka'aka tōna i mua i a kōtou na, kia kore rā aia i ko nā 'e tū ā raurau tōna,” tē tuku atu nei au i tēta'i pati'anga ki a kōtou i roto i te tū marū ē te ngākau meitaki tikāi o te Mesia ra.

2Ē ko tēia te pati'anga: mē tae atu au, auraka tei tupu kia riro 'ei raurau'anga atu nāku mei tāku e manako nei ki tēta'i pāpāki tangata na, tei manako i a mātou ē, tē tau nei tō mātou 'aerenga ki tō te tū tangata anake ra.

3Noa atu 'oki ē, tē ora nei mātou i te ora'anga tangata nei, kāre rā tā mātou tamaki'anga i te tamaki mei tā te tangata 'ua nei.

4Ko tā mātou au 'apinga tamaki, kāre tākiri te reira ē nā te tangata nei, 'e au mea mana rā rātou nō kō mai i te Atua nō te tākore atu i te au pūnanga ketaketa ra.

5Ka tākore tākiri 'oki mātou i te au taumārōrō'anga tuatua ra ē te au pāto'i'anga katoa ra tei ārairai mai i te kite i te Atua ra, ē ka 'akatuika'a mātou i te au manako rava rāi kia kauraro i te Mesia ra.

6Ka vave mātou i te 'akautunga atu i te au tū kaurarokore kātoatoa ra mē papa meitaki tikāi tō kōtou kauraro'anga.

7E 'ākara kōtou i te tū tikāi o te au mea i mua i a kōtou. Mē tē manako pāpū ra tēta'i 'ua atu tangata ē nō te Mesia aia, e 'akama'ara katoa rāi aia ē mē nō te Mesia aia ra, nō te Mesia katoa rāi 'oki mātou.

8Noa atu 'oki ē, tē ma'ata ra pa'a tāku 'akaparau i te mana i 'ōronga'ia mai e te Atua, 'ei 'akapāpū kia meitaki kōtou, 'eia'a nō tē totō i a kōtou ki raro, kāre rava au e 'akamā i te reira.

9Kāre 'oki au e 'inangaro ana kia karanga'ia ē, tē tāmataku atu nei au i a kōtou ki tāku au leta.

10Mei tei karanga'ia 'oki e tēta'i pāpāki ē, “E teima'a ē te pakari tāna au leta, kāreka rā tōna tū tangata, 'e tū 'āpikepike 'ua ia, ē kāre 'e kai ō roto i tāna tuatua.”

11Kia 'akamanako rā tei pērā ra ē, ko tō mātou tū i roto i tā mātou au leta ra i a mātou e takakē ra, ko tō mātou tū tikāi ia mē tei mua a'o mātou i a kōtou.

12Kāre 'oki mātou e tano kia 'akavā mātou i a mātou mei a rātou rāi, mē kāre ra, kia 'aka'āite i a mātou 'ua'orāi ki te aronga i 'akameitaki i a rātou 'ua'orāi. Tē 'akatano ra rātou i a rātou 'ua'orāi ki tō rātou 'ua'orāi vāito, ē tē 'aka'āite ra rātou i a rātou 'ua'orāi ki tō rātou 'ua'orāi tū. E nēneva tikāi rātou!

13Ko mātou nei rā, kāre mātou e 'akaparau atu ki va'o mai i te au mea tau; ka 'akaparau 'ua rā mātou i te vāito o te 'anga'anga tā te Atua i tuku mai ki a mātou, ē kua tae atu taua vāito ra ki a kōtou na.

14Kāre ē tē 'aere atu nei mātou ki va'o mai i taua vāito ra i tō mātou tae'anga atu ki a kōtou na, nō te mea, ko mātou te mōmua tei tae atu ki a kōtou na ma te 'ēvangelia o te Mesia ra.

15Kāre 'oki mātou i 'akaparau atu ki va'o mai i te mea tau, koia 'oki, i tā ēta'i kē ra 'anga'anga. Tēia rā tō mātou mānakonako'anga, mē kua tupu tō kōtou 'akarongo ki te ma'ata, kia ra'i atu rāi tā mātou 'anga'anga ki ō kōtou na mei tei tau i tō mātou vāito ra,

16'ei reira 'oki e rauka ai i a mātou i te tūtū 'aere i te 'ēvangelia ki te au ngā'i i kō rava atu i a kōtou na. Kāre 'oki mātou i reira e 'akaparau i te 'anga'anga tei oti takere i roto i tō tēta'i tangata kē ra vāito.

17 Ier 9.24 Tē nā kō ra 'oki te tuatua i tātā'ia ra ē, “Ko tei 'akaparau ra, kia 'akaparau rāi aia i te 'Atu.”

18Nō te mea, kāre ē ko tei 'akameitaki i aia 'ua'orāi tei 'āriki'ia mai, ko tā te 'Atu rā e 'akameitaki.