Mātaio 24 - Cook Island Maori Revised New Testament(CIMRNT)

Tē tuatua nei a Iēsū nō te 'akatane'a'anga i te 'iero(Māreko 13.1-2; Luka 21.5-6)

1Ē tei te 'aere'anga o Iēsū ki va'o mai i te 'iero ra, kua 'aere maira tāna au pipi ē tē to'uto'u atura ki aia i te au 'are o te 'iero ra.

2Kua karanga atura a Iēsū ki a rātou, “Kāre āinei kōtou e 'ākara ana i ēia nei mea kātoatoa? Koia mou tāku e karanga atu ki a kōtou na, kāre tākiri tēta'i toka i konei e vai'o'ia ki runga a'o i tēta'i, e 'ope rava i te 'uri'ia ki raro.”

Te au pekapeka ē te au tākinga kino'anga(Māreko 13.3-13; Luka 21.7-19)

3Ē tē no'o ra a Iēsū ki runga i te Maunga o te Ōlive, kua 'aere pōiri 'ua maira te au pipi ki aia, nā kō maira, “E 'akakite mai koe ki a mātou ē, ā'ea tēia au mea e tupu ei? Ē 'e a'a te 'akairo o tō'ou 'aere'anga mai ē te 'openga o tēianei ao?”

4Kua pa'u atura a Iēsū, nā kō atura ki a rātou, “Kia matakite, kia kore tēta'i 'ua atu e arataki kē i a kōtou.

5'E mānganui te ka 'aere mai ma tōku nei ingoa ē te nā kō'anga mai ē, ‘Ko au te Mesia,’ ē 'e mānganui 'oki te ka vare i a rātou.

6Ka 'akarongo rā 'oki kōtou i te au aoaoa tamaki ē te au rongo tamaki; kia matakite, 'eia'a e taitaiā; e nā mua 'oki te au mea mei te reira te tū i te tupu e tikāi, kāre rā te 'openga i vaitata mai ake.

7E tū mai 'oki tēta'i 'iti tangata e tamaki mai ki tēta'i 'iti tangata, ē tēta'i bāsileia e tamaki mai ki tēta'i bāsileia. Ē ka tupu mai te onge ē te ngāruerue 'enua i tērā ngā'i ē i tērā ngā'i.

8'E mōmua anake tēia au mea nei nō te au mate.

9 Māt 10.22 “'Ei reira rātou e tuku ei i a kōtou nō te tākinga kino, ē ka tāmate tākiri i a kōtou. Ē e mākitakita'ia mai kōtou e te au 'iti tangata rava rāi nō tōku nei ingoa.

10'E mānganui i reira te ka maitu'ia, ē ka tuku pikika'a tēta'i i tēta'i, ē ka mākitakita 'oki tēta'i i tēta'i.

11'E mānganui te au peroveta pikika'a te ka tū mai ki runga, ē 'e mānganui 'oki te ka vare i a rātou.

12Ē nō te mea 'oki ē, ka ma'ata atu te tupu'anga o te kino, ka iti mai te 'inangaro o te tangata 'e mānganui.

13Māt 10.22Kāreka ko tei tāpū tikāi e tae 'ua atu ki te 'openga ra, ka ora ia.

14Ē ka tūtū 'aere'ia tēia 'ēvangelia o te bāsileia nei e kako rava ake te ao katoa nei, 'ei kite nō te au 'iti tangata rava rāi, 'ei reira te 'openga e tae mai ei.

Te rikarika'anga ma'ata ē te vinivini(Māreko 13.14-23; Luka 21.20-24)

15 Dan 9.27; 11.31; 12.11 “I reira, mē kite kōtou i te rikarika'anga o te tane'a'anga ra tei tuatua'ia mai e Dāniela peroveta i te tū'anga mai i te ngā'i tapu ra — ko tei tatau ra, kia nakiro aia —

16i reira, ko rātou i Iūdea kia 'oro rātou ki te au maunga.

17Luk 17.31Ē ko ia i runga a'o i te 'are ra, auraka aia kia 'eke mai ki raro kia rave i te au 'apinga mei roto atu i tōna 'are.

18Ē ko ia i roto i te kāinga ra, auraka aia kia 'oki mai e tiki i tōna pereue.

19'E 'ae rā 'oki tō te au va'ine i 'apū ra, ē rātou e 'akangote i te tamariki i aua rā ra.

20E pure 'oki kōtou kia kore tō kōtou 'oro'anga e tupu i te tuātau paroro, mē kāre, i te Sābati katoa.

21Dan 12.1; Apo 7.14'E tākinga kino'anga ma'ata 'oki tō te reira tuātau, tei kore i tupu ake mei te kāpua'anga mai o tēianei ao ē tēia noa ai, ē kāre katoa ā muri atu.

22Ē nāringa 'oki kāre aua rā ra i tāpoto'ia, kāre rava tēta'i 'ua atu tangata e ora. Nō te aronga rā i 'iki'ia ra, e riro ia aua rā i te tāpoto'ia.

23“Ē kia 'akakite mai tēta'i 'ua atu tangata ki a kōtou ē, ‘Inā, tēia te Mesia!’ mē kāre ra, ‘Ko tērā ia!’, auraka e 'irinaki atu.

24'E au Mesia pikika'a ē te au peroveta pikika'a 'oki te ka tū mai ki runga ē ka 'ōronga mai i te au 'akairo mama'ata ē te au rāvenga ūmeremere, kia vare te aronga 'iki'ia, nāringa e rauka.

25Inā, kua 'akakite takere atu ana au ki a kōtou.

26 Luk 17.23,24 “Ē tēianei, kia 'akakite mai rātou i reira ki a kōtou ē, ‘Inā, tei te mēdēbara aia!’, auraka e 'aere. ‘Inā, tei roto aia i te au pi'a ngaro!’; auraka e 'irinaki atu.

27E tau 'oki te 'aerenga mai o te Tamaiti a te Tangata nei ki te uira e kanapa i te 'itinga o te rā ra e mārama 'ua atu ki te 'opunga o te rā.

28Luk 17.37Te ngā'i 'ua atu tei reira te kōpapa mate, ka putuputu rāi te au 'āeto ki reira.”

Te 'aere'anga mai o te Tamaiti a te Tangata(Māreko 13.24-27; Luka 21.25-28)

29 a: Isa 13.10; Ioel 2.10,31; 3.15; Apo 6.12; b: Isa 13.10; Ezek 32.7; Ioel 2.10; 3.15; c: Isa 34.4; Apo 6.13 “Ē i muringa a'o 'ua ake i aua rā tākinga kino'anga ra, ‘ka 'akapōiri'ia te rā, kāre te marama e tūrama mai i tōna mārama, ka pururū mai 'oki te au 'ētū o te rangi, ē ka rūrū'ia mai te au mea mana o te rangi ra.’

30Dan 7.13; Zek 12.10-14; Apo 1.7'Ei reira e mama mai ei te 'akairo o te Tamaiti a te Tangata i runga i te rangi. Ē 'ei reira te au kōpū tangata rava rāi o te ao nei e auē ei, ē ka kite rātou i te Tamaiti a te Tangata i te 'aere'anga mai nā runga i te au tiao rangi ma te mana ē te kakā ma'ata.

31Ē ka tono aia i tāna au 'āngela ma te tangi ma'ata o te pū ra, ē nā rātou e 'akaputuputu mai i tōna aronga 'iki'ia mei ngā pore mai e 'ā o te ao ra, ē mei tēta'i 'ope mai o te rangi e tae 'ua atu ki tēta'i 'ope.”

Te 'āpi'i'anga nō runga i te pū suke(Māreko 13.28-31; Luka 21.29-33)

32“E 'āpi'i rā kōtou i te parabole nō te pū suke mai: kia ni'oni'o mai te kao ē kia pu'era mai te rau, tē kite ra kōtou ē, tē vaitata maira te tuātau vera.

33Pērā katoa i a kōtou. Mē kite kōtou i ēia mea kātoatoa nei, kia kite 'oki kōtou ē, kua vaitata mai nei te 'openga, tei te pae ngūtupa ia.

34Koia mou tāku e karanga atu ki a kōtou na, kāre rava tēianei uki e 'ope, kia tupu rava tēia au mea kātoatoa nei.

35Ka kore ake te rangi ē te 'enua, kāre tākiri rā tāku nei au tuatua e kore.”

Kāre tēta'i e kite i te rā ē te ora(Māreko 13.32-37; Luka 17.26-30,34-35)

36“Kāreka rā tō runga i te reira rā ē te ora, kāre rava tēta'i e kite, kāre te au 'āngela o te rangi, ē kāre katoa 'oki te Tamaiti, māri 'ua ko tōku Metua anake ra.

37Gen 6.5-8Ē mei te tuātau i a Noa ra, mei te reira katoa te 'aere'anga mai o te Tamaiti a te Tangata nei.

38Mei tei te tuātau i mua a'o i te vai puke ra, tē kaikai ra rātou ē tē inu ra, tē 'akaipoipo ra, ē tē 'ōronga'ia ra kia 'akaipoipo'ia e tae rava atu ki te rā i tomo ei a Noa ki roto i te 'āraka ra.

39Gen 7.6-24Kāre rava 'oki rātou i kite, e roko'ia maira rātou e te vai puke, ē tā'iripoti atura i te au mea kātoatoa. Mei te reira katoa te 'aere'anga mai o te Tamaiti a te Tangata nei.

40I reira rāi, 'e tokorua tangata i roto i te koro, e riro atu e ta'i, e ora mai e ta'i.

41'E tokorua va'ine e tāviri ra i te ngā'i tāviri'anga, e riro atu e ta'i, e ora mai e ta'i.

42“E ara i reira, kāre kōtou i kite i te ora e tae mai ei tō kōtou 'Atu.

43Luk 12.39,40E ma'ara meitaki kōtou i tēia: nāringa te tangata kāinga i kite ē, 'e a'a te ora e tae mai ei te keiā, kua ara ia, ē kāre e 'akaruke 'ua i tōna 'are kia vā'i'ia.

44Ē nō reira 'oki, kia vai te'ate'amamao rāi kōtou, nō te mea, 'ei te ora manakokore'ia e kōtou e tae mai ei te Tamaiti a te Tangata.”

Te tāvini 'irinaki'ia ē te tāvini 'irinakikore'ia(Luka 12.41-48)

45“Ko 'ai i reira te tāvini 'irinaki'ia ē te pakari tei tuku'ia e tōna pū 'ei 'aka'aere i tōna ngutu'are tāvini nō te tu'a i te kai nā rātou i te ora tau ra?

46'E ao tō te reira tāvini tei roko'ia mai e tōna pū ē, tē pērā ra.

47Koia mou tāku e karanga atu ki a kōtou na, e 'akariro te pū i aia 'ei 'aka'aere i te au 'apinga rava rāi nāna ra.

48Inārā, mē ka tuatua te tāvini kino ra ki roto i tōna ngākau ē, ‘E tāvarevare tōku pū i te 'aere mai,’

49ē kua 'akamata atura i te pāpā i tōna au taeake tāvini ra, ē kua kaikai i'ora ē te inuinu ma te au tangata kaikava ra,

50ka tae mai te pū o taua tāvini ra i te rā manakokore'ia e ia ē te ora kiteakore'ia e ia ra.

51Ka 'akautunga ma'ata'ia aia e tōna pū, ē ka kāpiti'ia aia ki te au tangata tāpikipiki. Tei reira te auē'anga ē te pākati'angā ni'o ra.”