2 Kōrīnētia 2 - Cook Island Maori Revised New Testament(CIMRNT)

1I manako 'oki au ē, auraka au e 'aere 'aka'ou atu ki a kōtou na, ko te taitaiā ā'ea 'ua atu kōtou.

2Mei te mea ē, ko au tei 'akaauē atu i a kōtou na, nā 'ai e 'akarekareka mai i āku, māri rā, nā te tangata tāku i 'akaauē atu?

3Nō reira au i tātā atu ei i te tuatua ki a kōtou, koia 'oki, auraka au kia 'akaauē'ia mai i tōku tae'anga atu e te aronga tei tau kia 'akarekareka mai i āku. Kua pāpū tikāi 'oki au i a kōtou rava rāi ē ko tōku nei rekareka, ko tō kōtou kātoatoa rāi ia rekareka'anga.

4I tātā atu 'oki au ki a kōtou ma te teia'a tukituki ē te mamae o te ngākau ē te roimata ma'ata; kāre rā ē nō te 'akaauē i a kōtou, māri rā kia kite mai kōtou i te 'ō'onu o tōku aro'a i a kōtou.

Te 'akakore'anga 'apa

5Kāre au e 'inangaro i te 'akama'ata i tei tupu ra. Mē kua 'akatupu ra tēta'i tangata i te auē, kāre ē ko au anake 'ua tāna i 'akaauē, kua 'akatupu katoa rā aia i tēta'i mamae ki a kōtou kātoatoa.

6Kua rava 'ua te utunga a taua tangata ra i tukuna'ia e te ma'ata'anga o tā kōtou 'ēkālēsia.

7Nō reira, 'e ngari ake kōtou kia 'akakore atu i tōna 'apa ē kia 'akamāro'iro'i atu i aia, kia kore aia e maremo'ia e te iri'ea'anga ma'ata rava.

8Nō reira, tē pati 'akatenga atu nei au kia 'akaāri pū tikāi kōtou i tō kōtou aro'a ki aia.

9Ko te tumu 'oki tēia i tātā atu ei au: kia kite au i tō kōtou tū tikāi, mē te kauraro ra kōtou i te au mea rava rāi.

10Mē 'akakore kōtou i tā tēta'i 'ua atu tangata 'apa ra, e 'akakore katoa 'oki au. Ko tāku 'oki i 'akakore ra, mē kua tau kia 'akakore au i tēta'i 'ua atu mea, i pērā au ki mua i te Mesia ra nō kōtou na,

11kia kore rava a Sātani e rauka i te tūtara ki runga a'o i a tātou nei, nō te mea, kua kite meitaki tikāi tātou i tōna au 'akakoro'anga.

Tō Paulo taitaiā i Tēroa

12 Anga 20.1 I āku 'oki i tae atu ki Tēroa nō te ako i te 'ēvangelia o te Mesia ra, 'e 'ati'anga tau tikāi 'oki tēia nōku nō te rave 'anga'anga meitaki i roto i te 'Atu;

13kāre rava rā tōku manava i papa, nō te mea, kāre taku taeake ko Tito i kitea atu e au ki reira. Poroaki atura au i te tangata i reira, 'akaruke i'ora nō Mākedōnia.

Te ūpokotū'anga i roto i te Mesia

14Kia 'akameitaki'ia rā te Atua ko tei arataki kāpiti i a mātou ki roto i te ūpokotū o te Mesia ra, kāre 'e tīvata, ē tei toto'a i te 'aunga kakara o te kite i te Mesia ra nā roto i a mātou nei ki te au ngā'i kātoatoa.

15'E 'aunga kakara 'oki mātou nō te Mesia ki te Atua, ē ki te aronga te ka 'akaora'ia ē tē kāre e 'akaora'ia.

16Ki te aronga 'oki tē kāre e 'akaora'ia e 'aunga pīrau ia, ē ka tāmate tākiri i a rātou, kāreka ki te ka 'akaora'ia ra 'e 'aunga meitaki ia te ka 'ōronga mai i te ora. Ko 'ai rā tei tau kia rave i ēia mea nei?

17Kāre 'oki mātou i 'āite mei ēta'i pāpāki tei 'akariro i te tuatua a te Atua 'ei kimi pu'apinga nō rātou 'ua'orāi. Inārā, 'e au tangata pikika'akore mātou i mua i te aroaro o te Atua, ē tē tuatua nei mātou i roto i te Mesia mei te aronga i tonokia mai e te Atua.