2 Kōrīnētia 7 - Cook Island Maori Revised New Testament(CIMRNT)

1Nō te mea 'oki ē, tei a tātou nei tēia au papa'u'anga nei, e aku au 'akaperepere, e tāmā ana tātou i a tātou 'ua'orāi mei te au mea rava rāi e tāvi'ivi'i ana i te kōpapa ē te vaerua, ma te 'aka'ope mārie i tō tātou 'ua'orāi 'akatapu'anga'ia nā roto i te mataku'anga i te Atua.

Tō Paulo rekareka

2E 'āriki mai i a mātou ki roto i tō kōtou au ngākau. Kāre rava ā mātou tangata i tākinokino ana, kāre rava ā mātou tangata i tātipakē ana, ē kāre rava ā mātou tangata i tā'anga'anga pikika'a ana.

3Kāre tēia e karanga atu nei au ē tē 'aka'apa nei i a kōtou; i tuatua ana 'oki au i mua ana ē, tei roto kōtou i tō mātou ngākau. Mē tē ora nei tātou, mē tē mate nei tātou, tē kāpiti'ia nei rā tātou.

4Tē mā'ora'ora tikāi nei tōku ngākau ki a kōtou, ē, 'e 'akaparau'anga ma'ata tōku i a kōtou. I roto i tō mātou au manamanatā rava rāi, kua kī tikāi au i te pūma'ana, ē kāre 'e 'openga'anga i tōku nei rekareka.

5 2 Kōr 2.13 I a mātou 'oki i tae ki Mākedōnia ra, kāre rava 'e 'akangāro'i'anga o tō mātou nei kōpapa, kua kako rā mātou i te au manamanatā: 'e taumārōrō'anga tō va'o, 'e mātakutaku'anga tō roto.

6Ko te Atua rā, ko tei 'akapūma'ana i te aronga ngākau paruparu ra, kua 'akapūma'ana mai i a mātou nā roto i te tae'anga mai o Tito ra.

7Kāre 'oki ē nō tōna tae'anga mai anake, māri katoa rā, nō te pūma'ana tā kōtou i 'ōronga atu ki aia. Kua 'akakite mai aia ki a mātou i te ra'i o tō kōtou 'inangaro mai i āku, tō kōtou tangi ma'ata ē tō kōtou umuumu'anga ma'ata i te pāruru mai i āku. Nō reira, i ma'ata rava atu ei tōku rekareka.

8Mei te mea 'oki ē, kua 'akaauē au i a kōtou nō tāku leta i tātā atuna, kāre au ē tē manatā ra i te reira. Tē kite nei au ē, kua 'akaauē tāku leta i a kōtou nō tēta'i tuātau poto 'ua ra.

9Tē mareka nei rā au i tēianei, kāre nō te mea ē, kua 'akaauē au i a kōtou, nō te mea rā ē, kua riro tō kōtou auē'anga 'ei rāvenga kia 'akatūkē'ia tō kōtou ngākau. I auē 'oki kōtou i tō te Atua ra anoano, ē nō reira, kāre rava kōtou 'e kino i a mātou.

10E 'akatūkē 'oki te auē'anga i tō kōtou ngākau i tō te Atua ra anoano kia rauka te ora, ē kāre te reira e tatarā'ara'ia. Ko te auē rā o tēianei ao, e 'akatupu ia i te mate.

11Ka 'ākara na 'oki ki tā te auē'anga i 'akatupu i roto i a kōtou na i tō te Atua ra anoano: koia 'oki, tō kōtou tū 'inangaro tāmou mārie; te aruaru ma'ata i te 'akati'amā i a kōtou 'ua'orāi; te kinokino ngākau, te vai mātakutaku'anga, te 'inangaro mai i āku, te umuumu'anga ma'ata i te pāruru mai i āku, ē te vai te'ate'amamao 'ua'anga i te 'akautunga'anga atu i te au rave 'ara. Kua 'akaāri 'ua mai kōtou ē, kua 'apakore kōtou i ēia mea katoa nei.

12Mei te mea ē, kua tātā atu au ki a kōtou na, kāre ē nō te tangata tei rave i te kino, mē kāre nō tei tākinga kino'ia ra, māri rā, nō te 'akamārama atu ki a kōtou 'ua'orāi i mua i te aroaro o te Atua ra i tō kōtou 'inangaro tāmou mārie mai ki a mātou.

13Ē nō reira, kua pūma'ana'ia ē kua 'akamāro'iro'i'ia mātou.

Kāpiti atu ki tēia pūma'ana nei, kua pingapingareka tikāi mātou i te kite'anga i te rekareka o Tito, nō te mea, kua 'akamarū mai kōtou kātoatoa i tōna ngākau.

14Mē kua 'akapa'apa'a atu ana 'oki au i a kōtou ki aia, kāre au i tā'akamā'ia mai, inārā, mei te au mea rava rāi tā mātou i 'akakite atu ki a kōtou na ē, 'e tuatua mou, pērā katoa tā mātou 'akapa'apa'a'anga atu i a kōtou ki a Tito ra, kua riro ia 'ei tuatua mou.

15Ē tē ma'ata rava nei tōna tangi ngākau i a kōtou, mē mā'ara'ara aia i tō kōtou kātoatoa na tū kauraro, ē te 'āriki'anga mai kōtou i aia ma te mataku ē te rūtetetete.

16Tē rekareka ma'ata nei au, i te mea ē, kua tika rava tōku 'irinaki'anga i a kōtou na.