Ebera Nō runga i tēia leta - Cook Island Maori Revised New Testament(CIMRNT)
Nō runga i tēia letaKua pararauare viviki te tuatua a te Atua i te 'ānere'anga mua o te mata'iti o te 'ēkālēsia Keretitiāno. Ē 'e mānganui te au tangata 'ākono Atua o te Ngāti Iūda, ē pērā katoa tō te au 'ētene, tei ui mai ē, mē kua tika taua 'akarongo 'ōu ra. Kua 'inangaro rātou i te au 'akairo 'ei 'akapāpū'anga. Kua 'irinaki 'oki te Ngāti Iūda i te semeio o te 'aere'anga o tō rātou 'ui tupuna nā roto i te Tai Muramura, ē i te kōreromotu tā te Atua i 'akatinamou ki a rātou i runga i te Maunga ko Sinai. 'E a'a rā te au 'akairo o te au Keretitiāno? 'E au 'anga'anga mānea tā te Ngāti Iūda i tā rātou 'akamori'anga, ē 'e Ta'unga Ma'ata tō rātou tei 'apai i te au tārangā'ara i roto i te 'iero kia 'akakore'ia tā rātou au 'ara. 'E a'a rā tā te au Keretitiāno? Ko te mea ma'ata o tēia 'akarongo 'ōu, ko te 'irinaki ia i a Iēsū. 'Akapē'ea e tikāi i te reira i te 'akatupu i te 'akakore'angā 'ara ē te piri'anga ki te Atua?Kua tātā'ia Te Leta ki tō 'Ēbera 'ei pa'u'anga i tēia tū ui'anga. Kua 'akakite'ia ki te aronga tatau te tū ma'ata o Iēsū. 'E ma'ata atu ia i tēta'i 'ua atu 'āngela a te Atua (1.5-14), 'e ma'ata atu ia i tēta'i 'ua atu peroveta, ē 'e ma'ata atu rāi ia i a Mōse ē Iōsua (2.1—4.14). Ko Iēsū, ko te Ta'unga Ma'ata meitaki rava ia, nō te mea, kāre tākiri āna 'ara, ē i nā roto i te 'aka'ātinga'anga i tōna ora'anga, kua tuku aia i te tārangā'ara meitaki rava atu nō te au tuātau kātoatoa (9.2—10.18). Nā roto i tōna mate'anga ē tōna tū'aka'ou'anga mai kua 'akatu'era aia i te mataara nō te tangata kātoatoa i te 'aere atu ki te Atua (4.14—5.10; 7.1—8.13).Ko te au manako mama'ata i roto i tēia leta nei nō runga te reira i te mea pu'apinga ma'ata o te 'akarongo. Kua 'akamārama'ia ē, nā roto i te 'akarongo anake 'ua e rauka mai ei te au meitaki tā Iēsū i 'inangaro i te 'ōronga atu. Nā roto i taua 'akarongo ra, e pāpū ei i te aronga tei āru i a Iēsū te au mea tā rātou e tatari nei. Ē nā roto i taua 'akarongo rāi e kite ei rātou i te au mea kāre i 'ākara'ia.Tē 'akapa'apa'a'ia nei te au tangata tei 'irinaki i te Atua i te tuātau tei topa ki muri (11.1-40), ē tē 'akamāro'iro'i'ia nei te au tangata tei āru i a Iēsū i tēianei kia tāmou rātou i tō rātou mata ki aia (12.1-3).'E a'a te meitaki te ka rauka mai i a tātou nō kō mai i tō tātou Ta'unga Ma'ata ko Iēsū?“'E Ta'unga Ma'ata 'oki aia tei kite meitaki i tō tātou au paruparu, nō te mea, kua tīmata katoa'ia aia i te au mea rava rāi mei a tātou nei rāi, inārā, kāre rava āna 'ara. Ē tēianei, e 'akavaitata atu tātou ki te terōno o te Atua aro'a 'ua ma te 'ēkōkōkore kia 'akaaro'a'ia mai tātou ē kia rauka i a tātou te tauturu meitaki nō te tuātau 'inangaro'ia” (4.15-16).Te 'akano'ono'o'anga o tēia leta1. Te tū ma'ata o te Tamaiti a te Atua 1.1-42. 'E ma'ata atu a Iēsū i te au 'āngela 1.5—2.183. 'E ma'ata atu a Iēsū i a Mōse ē Iōsua 3.1—4.134. Ko Iēsū te Ta'unga Ma'ata 4.14—7.285. 'E meitaki atu te kōreromotu tā Iēsū i 'akatupu 8.1—9.226. Tō Iēsū 'aka'ātinga'anga i aia 'ua'orāi 9.23—10.317. Te aronga 'e 'irinaki'anga ma'ata tō rātou 11.1-408. E āru i a Iēsū 'ei 'ākara'anga 12.1—13.199. 'Akameitaki'anga ē te ve'eve'e'anga aro'a 13.20-25
