1 Kōrīnētia 4 - Cook Island Maori Revised New Testament(CIMRNT)

Te tūranga tāvini o te au 'āpōsetolo

1Ē tēianei, kia manako te tangata i a mātou nei ē, 'e au tāvini anake mātou nō te Mesia, ē 'e au 'aka'aere nō te au mea muna ngaro a te Atua ra.

2'E mea umuumu'ia 'oki kia kitea i roto i te au 'aka'aere nei ē, 'e tangata ia te ka rauka kia 'irinaki'ia.

3'E meangiti po'epo'e rava 'oki i āku tā kōtou 'akavā'anga mai i āku nei ē te 'akavā'anga tangata 'ua nei; ē kāre katoa rāi au e 'akavā i āku 'ua'orāi.

4Kua ti'amā 'oki au i tōku 'akavā ngākau, kāre rā au i 'akatikatika'ia mai i te reira; nā te 'Atu 'oki au e 'akavā mai.

5Nō reira, auraka kōtou e 'akavā i tēta'i 'ua atu tangata i mua ake i te tuātau tikāi. E tiaki rā kia tae mai te 'Atu, ē nāna e tuku ki te mārama i te au mea i 'u'una'ia i roto i te pōiri, ē nāna rāi e 'akaāri mai i te au 'akakoro'anga o te ngākau tangata nei. Ē ka rauka i te tangata tātakita'i te 'akameitaki'anga nō kō mai i te Atua i reira.

6E te au taeake ē, kua 'ākarakara ana rāi au i tēia au mea nō runga i āku ē Āpolo, nō kōtou 'oki, kia kite kōtou nā roto atu i tā māua 'ākara'anga i te 'āite'anga o te kī'anga ē, “Auraka e 'aere atu ki va'o ake i tei tātā'ia ra,” kia kore rava tēta'i o kōtou e 'akaparau i tēta'i ē te 'akava'ava'a atu i tēta'i.

7Nā 'ai 'oki koe i 'akatūkē mei tēta'i tangata kē atu? Ē 'e a'a tā'au, kāre i 'ōronga 'ua'ia mai? Ē, mē i 'ōronga 'ua'ia mai te reira, 'e a'a koe i ngākau parau ei, mei te mea ra ē, kāre i 'ōronga 'ua'ia mai te reira ki a koe?

8Kua kī kōtou i tēnā na! Tē ma'ata na 'oki tō kōtou meitaki i tēnā na! Tē tūtara nei kōtou mei te 'ui ariki ra, kāre rā mātou! Tōku 'inangaro ma'ata tikāi kia tūtara rāi kōtou, ē kia tūtara katoa rāi mātou ma kōtou na!

9Nō te mea, tē manako nei au ē, kua 'akataka te Atua i te ngā'i 'openga nō mātou, nō te au 'āpōsetolo, mei te aronga i 'ākono'ia nō te mate ra. Kua 'akariro'ia 'oki mātou 'ei 'ākarakara'anga nā tō te ao nei, koia 'oki, nā te au 'āngela ē pērā katoa nā te tangata rava rāi.

10Ko mātou nei 'oki e nēneva ia nō te Mesia nei, ko kōtou rā e pakari ia i roto i te Mesia nei! Ko mātou nei e parukā 'ua, ko kōtou rā 'e māro'iro'i! Ko kōtou te aronga rongonui, ko mātou rā te aronga ngāteiteikore.

11E tae rava ake nei ki tēianei rāi ora, tē pongi nei mātou ē tē kakī vai nei; tē kāka'u nei mātou i te kāka'u veruveru; tē pāpā'ia nei mātou; kāre rava ō mātou ngā'i no'o'anga tinamou,

12Anga 18.3ē tē ro'iro'i nei mātou i te 'anga'anga ma tō mātou 'ua'orāi rima. Kia tao'ia mai, tē 'akameitaki nei mātou; kia tākinga kino'ia mai, tē 'akakoromaki nei mātou;

13kia 'akakino'ia rā, tē tuatua meitaki nei mātou. Kua 'akariro'ia mātou mei te tītā o te ao nei, mei te ota o te au mea rava rāi nei ē tēia noa ai!

14Kāre au i tātā i tēianei au mea kia 'akamā kōtou, tē ako atu nei rā au i a kōtou mei tāku tamariki 'akaperepere.

15Nō te mea, nāringa e ta'i nga'uru tauatini ō kōtou tiaki i roto i te Mesia nei, kāre e ra'i ana ō kōtou au metua. Nāku 'oki kōtou i 'ānau i roto i te Mesia ra ko Iēsū, nā roto i te 'ēvangelia nei.

161 Kōr 11.1; Phil 3.17Ē tēianei, tē pati 'akatenga atu nei au ki a kōtou ē, e āru mai kōtou i taku rua tapuae.

17Nō reira 'oki au i tono atu ei i a Tīmōteo ki a kōtou na, taku tamaiti 'akaperepere'ia ē te 'irinaki'ia i roto i te 'Atu nei. Nāna 'oki e 'akakite 'aka'ou atu ki a kōtou i tōku au 'aerenga i roto i te Mesia nei, mei tāku i 'āpi'i atu ki te au 'ēkālēsia rava rāi i te au ngā'i kātoatoa ra.

18Kua 'akaparau tēta'i pāpāki i ō kōtou na, nō te mea, kua manako rātou ē, kāre au e tae atu ki a kōtou na.

19Ka tae viviki atu au ki a kōtou na, kia tika i te 'Atu ra, ē ka mārama au i te tū o te mana o taua aronga 'akaparau ra, ē kāre i tā rātou tuatua anake 'ua,

20nō te mea, kāre te bāsileia o te Atua ē tei roto i te tuatua, tei roto rā i te mana ririnui.

21'E a'a ra tō kōtou na 'inangaro? Kia tae atu āina au ki a kōtou ma te pāpā, mē kāre ma te aro'a ē te ngākau marū āina?