1 Kōrīnētia Nō runga i tēia leta - Cook Island Maori Revised New Testament(CIMRNT)
Nō runga i tēia letaNoa atu ē ko tēia leta kua karanga'ia ē, “Ko te Leta mua ki tō Kōrīnētia,” kāre ē ko te leta mua tikāi tēia tā Paulo i tātā ki tēia 'ēkālēsia. Kua mārama 'oki tātou i te reira, nō te mea, kua tā'iku aia i tēta'i leta tāna i tātā i mua ake (5.9). Kua tātā katoa atu te au Keretitiāno o Kōrīnētia ki aia (7.1), ē ko tēta'i tu'anga o te leta mua ki tō Kōrīnētia 'e pa'u'anga te reira i te au ui'anga tei ui'ia e rātou.Ko Kōrīnētia, tēta'i 'ōire ma'ata i te tua 'apatonga o Eleni, 'e ava tōna. Kua 'akamata a Paulo i tāna 'anga'anga 'ēvangelia i reira ki roto i te ngā'i i 'uipā 'ei te Ngāti Iūda. I muri mai, kua no'o atu aia i te pae tikāi o taua ngā'i 'uipā'anga ra, i te ngutu'are o tēta'i tangata 'ētene ko tei riro mai 'ei pipi nō Iēsū ('Anga'anga 18.1-17). Ko te ma'ata'anga o te tangata i Kōrīnētia tei 'āriki i tā Paulo 'āpi'i'anga, 'e au tangata puta'ua (1.26-29); ko tēta'i pāpāki rā 'e aronga pu'apinga (11.18-21); ē tēta'i o rātou ko ia te tangata ma'ata o te moni o te 'ōire (Rōma 16.23). I aia i roto i Kōrīnētia, kua rave a Paulo i te 'anga'anga ma'ani pū'ākapa kia rauka i aia te tūtaki i aia 'ua'orāi ('Anga'anga 18.3; 1 Kōrīnētia 4.12; 9.1-18).Tē tāmanamanatā nei a Paulo i te tū taumārōrō o te au Keretitiāno i Kōrīnētia ē tō rātou mavete'anga i te au pupu tūkēkē (1.10—4.21), ē pērā katoa i tō rātou 'ākono'anga tēta'i i tēta'i (5.1—6.20). Ko tēia tā Paulo ngā manamanatā ma'ata i aia e tātā nei i tēia leta. Inārā, tē 'inangaro katoa nei aia i te pa'u atu i tā rātou i ui ki aia nō runga i te 'akaipoipo (7.1-40) ē te kai 'aka'ātinga'ia ki te au 'ītoro (8.1-13). Kua 'akamāro'iro'i atu a Paulo i a rātou kia 'akamori rātou i te Atua ma te tau tikāi (10.1—14.40) ē kia tinamou tō rātou 'irinaki'anga ē, nā te Atua i 'ōronga mai ki a rātou i te rē ki runga a'o i te mate nā roto i a Iēsū Mesia (15.1-58).Ko te aro'a i nā Paulo ei, 'e ma'ata atu ia i te 'akarongo, mē kāre, i te mānakonako'anga. Ko te au manamanatā kātoatoa i roto i te 'ēkālēsia ka kore te reira mē rauka i te au mema kātoatoa i te aro'a atu tēta'i i tēta'i mei tei tau i te au Keretitiāno kia pērā:“'E 'akakoromaki'anga roa tō te aro'a ē te tākinga meitaki. Kāre te aro'a e vare'ae, kāre te aro'a e 'akateitei i aia 'ua'orāi, kāre e 'akaparau...e rekareka i te 'anga'anga tikakore, e rekareka rā i te tuatua mou. E pāruru katoa te aro'a i te au mea kātoatoa, e 'irinaki i te au mea kātoatoa, e mānakonako i te au mea kātoatoa, e mou mārie i te au mea kātoatoa. Kāre 'ua te aro'a e kore...” (13.4; 6-8).Te 'akano'ono'o'anga o tēia leta1. Tō Paulo aro'a'anga ē te 'akameitaki'anga 1.1-92. Te pati'anga kia 'okota'i 1.10—4.213. Te manamanatā nō runga i te riri'anga tēta'i ki tēta'i 5.1—7.404. E 'akamori i te Atua, auraka i te au 'ītoro 8.1—11.15. Te 'akamori'anga ē te ora'anga 'ēkālēsia 11.2—14.406. Te Mesia tei ūpokotū ki runga a'o i te mate 15.1-587. Te 'apinga aro'a nā te puta'ua 16.1-48. Te au tere tā Paulo e 'akakoro ra 16.5-129. Tā Paulo pati'anga 'openga ē te aro'a 16.13-24
