1Ko te 'irinaki'anga, ko te pāpū'anga ia o te au mea i mānakonako'ia; ko te 'ēkōkōkore'anga ia nō runga i te au mea kāre i 'ākara'ia.
2Nō te 'irinaki'anga 'oki i rauka ai i te 'ui tupuna tō rātou rongo meitaki.
3 Gen 1.1; Sal 33.6,9; Ioa 1.3 Nō te 'irinaki'anga 'oki i mārama ai tātou ē, nā te Atua i 'anga i te ao katoa nei nā roto i tāna tuatua; koia 'oki, nā roto mai i tei 'ākarakore'ia te au mea i 'ākara'ia.
4 Gen 4.3-10 Nō te 'irinaki'anga 'oki i meitaki atu ei te 'ātinga tā Ābela i 'apai atu ki te Atua i tā Kaina. Kua 'āriki te Atua i a Ābela 'ei tangata tuatua tika, nō te mea, 'e 'irinaki'anga tōna. Ē nō reira i mareka ai te Atua i tāna au 'ātinga. Ē tē tuatua mai nei rāi aia nā roto i taua 'irinaki'anga ra, noa atu ē kua mate aia.
5 Gen 5.21-24 Nō te 'irinaki'anga 'oki i kore ei a Enoka i mate, kua 'apaina'ia atu rā ki te rangi. Kua tātā'ia 'oki ē, “Kāre atura aia i kitea'ia, nō te mea, kua 'apai te Atua i aia ki runga.” 'Ōu tōna 'apaina'anga'ia atu, “kua mareka'ia aia e te Atua,” mei tei tātā katoa'ia ra.
6Kāre 'oki 'e tangata e mareka'ia mai aia e te Atua mē kāre ōna 'e 'irinaki'anga. Ko te tangata tei 'akavaitata ki te Atua 'e mea umuumu'ia kia 'irinaki aia ē, 'e Atua tēta'i; ē kia 'irinaki katoa aia ē, nā te Atua e tūtaki mai i te aronga tei kimi pū tikāi i aia.
7 Gen 6.13-22 Nō te 'irinaki'anga 'oki i 'āriki ei a Noa i te 'akamatakite'anga nō runga i te au mea kāre i 'ākara'ia ake, ē i ma'ani ei aia i tēta'i pa'ī kia ora tōna ngutu'are. I 'akapērā i 'aka'apa ai aia i tō te ao nei, ē i rauka ai i aia te tū tuatua tika i mua i te aroaro o te Atua tei nā roto mai i te 'irinaki'anga.
8 Gen 12.1-5 Nō te 'irinaki'anga 'oki i kauraro atu ei a Āberahāma i te kāpiki'anga kia 'aere atu ki tēta'i 'enua, te ka riro mai tāna tu'anga ā muri atu. Kua 'akaruke 'oki aia i tōna 'ua'orāi 'enua ma te kore aia i kite ē, tē 'aere nei aia ki 'ea.
9Gen 35.27Nō te 'irinaki'anga 'oki i no'o tuitārere 'ua ai aia i te 'enua i papa'u'ia ra ki aia. Kua no'o aia i roto i te pū'ākapa, mei a Īsā'aka ē Iākōba, ngā tangata te ka rauka katoa 'oki taua papa'u'anga ra.
10Kua tāpapa 'oki a Āberahāma i te 'ōire tango mātūtū tikāi i tāmanako'ia ē i 'akatū'ia e te Atua.
11 Gen 18.11-14; 21.2 Nā roto i te 'irinaki'anga i rauka ai i a Āberahāma i te riro mai 'ei metua tāne, noa atu ē, kua ma'ata roa ōna mata'iti ē kua pā katoa a Sara. Kua manako 'oki aia ē, ka 'ākono rāi te Atua i tāna i papa'u mai.
12Gen 15.5; 22.17; 32.12Ē nō reira, nā roto mai i taua tangata 'okota'i ra ko Āberahāma, ē ko ia tei rua'ine kino, i 'ānau'ia mai ei te 'uānga 'e mānganui mei te au 'ētū o te rangi ē mei te one ta'atai kāre e 'ope kia tatau'ia.
13 Gen 23.4; 1 Par 29.15; Sal 39.12 E mate atura taua aronga kātoatoa ra ma te 'irinaki'anga, ē kāre i rauka mai ake tei papa'u'ia maira. Kua 'ākara rā rātou i te reira i te ātea kē ē kua 'āriki rekareka. Kua 'akakite pū rātou ē, 'e aronga kē 'ua rātou ē te tuitārere i tēia ao nei.
14Ko te aronga 'oki i pērā maira, kua 'akaāri mai ē, tē kimi ra rātou i tēta'i 'enua nō rātou 'ua'orāi.
15Nāringa rātou i manako 'ua i te 'enua tā rātou i 'akaruke ana, 'e rāvenga rāi tā rātou i te 'oki ki reira.
16'E 'enua meitaki atu rā tā rātou i 'inangaro, te 'enua i te rangi ra. Nō reira kāre te Atua i 'akamā kia kāpiki rātou i aia 'e Atua nō rātou; kua 'akate'ate'amamao 'oki aia i tēta'i 'ōire nō rātou.
17-18 Gen 22.1-14 Gen 21.12 Nō te 'irinaki'anga 'oki i 'apai ei a Āberahāma i a Īsā'aka 'ei 'ātinga i tō te Atua tīmata'anga i aia. Ko ia 'oki te tangata tei 'āriki mai i te au papa'u'anga, ē kua 'akatika i te 'apai i te tamaiti 'ānau ta'i, nō runga 'oki i aia i 'akakite'ia mai ei ē, “Ka 'akapāpū'ia ē, 'e 'uānga tō'ou nā roto i a Īsā'aka.”
19Kua manako 'oki aia ē, 'e rauka rāi i te Atua i te 'akatū mai i a Īsā'aka mei te mate maira. 'E tano i reira i te tuatua ē, “I rauka 'aka'ou i a Āberahāma tāna tamaiti mei te mate maira.”
20 Gen 27.27-29,39,40 Nō te 'irinaki'anga 'oki i 'akakite ei a Īsā'aka ki a Iākōba rāua ko Ēsau, ka tākinga meitaki te Atua i a rāua i te tuātau ki mua.
21 a: Gen 48.1-20; b: Gen 47.31 Nō te 'irinaki'anga 'oki i 'akameitaki ei a Iākōba i ngā tamariki a Iōsēpha ka mate ei aia, ē kua 'akamori aia i te Atua ma te 'irinaki ki runga i tōna tokotoko.
22 Gen 50.24,25; Exo 13.19 Nō te 'irinaki'anga 'oki i tuatua ai a Iōsēpha ka mate ei aia ē, e riro kē atu te tamariki Īserā'ela mei Aiphiti, ē kua 'iku'iku aia ki a rātou nō runga i tōna au ivi.
23 a: Exo 2.2; b: Exo 1.22 Nō te 'irinaki'anga 'oki i 'u'una'ia ai a Mōse e tōna ngā metua nō tēta'i toru marama i muri ake i tōna 'ānau'anga, nō te mea, kua kite rāua ē, 'e tamaiti purotu aia; ē kāre rāua i mataku i te 'akaue'anga a te ariki ra.
24 Exo 2.10-12 Nō te 'irinaki'anga 'oki i pāto'i ei a Mōse kia kāpiki'ia aia i te tamaiti a te tamā'ine a Phārao i tōna pakari'anga maira.
25'E mea meitaki atu i aia kia tākinga kino kāpiti'ia ki te 'iti tangata o te Atua i te navenave o te 'ara nō tēta'i tuātau poto 'ua.
26Kua manako 'oki aia ē, 'e pu'apinga ma'ata atu te 'akakino'anga'ia nō te Mesia i te 'apinga nui o tō Aiphiti, nō te mea kua ma'ara 'ua i aia te tūtaki te ka tae mai.
27Nō te 'irinaki'anga 'oki i 'akaruke ei aia i a Aiphiti ma te matakukore i te riri o te ariki. Kua rave tāmou 'ua atu rāi 'oki aia, mei te mea ē, tē 'ākara nei aia i te Atua 'ākarakore'ia.
28Exo 12.21-30Nō te 'irinaki'anga 'oki i 'ākono ei aia i te Pāsa ē i 'akaue ei aia kia pīpī'ia te au ngūtupa ki te toto kia kore te 'āngela o te mate e tā i te au tama mua o Īserā'ela ra.
29 Exo 14.21-31 Nō te 'irinaki'anga 'oki i 'aere ei tō Īserā'ela nā raro i te Tai Muramura, mei te mea ē nā runga i te one marō; kia tīmata rā tō Aiphiti i te rave katoa i te reira, kua maremo'ia atura rātou.
30 Iosu 6.12-21 Nō te 'irinaki'anga 'oki i 'inga ai te au patu o Iēriko ra ki raro, kia oti tō Īserā'ela takapini'anga i te reira e 'itu rā.
31a: Iosu 6.22-25; b: Iosu 2.1-21Nō te 'irinaki'anga 'oki i kore ei i mate te va'ine 'akaturi a Rā'aba, ka mate ei te aronga 'akarongokore ra, nō te mea, kua 'āriki meitaki ana aia i ngā tangata 'ākarakara i te 'enua ra.
32 a: Aka 6.11—8.32; b: Aka 4.6—5.31; c: Aka 13.2—16.31; d: Aka 11.1—12.7; e: 1 Sam 16.1—1 Arik 2.11; f: 1 Sam 1.1—25.1 Ē 'e a'a atu rāi tāku ka 'akakite? Kāre e rava te tuātau i te 'akamārama atu i a kōtou nō runga i a Gideona, i a Bāraka, i a Sāmāsona, i a Iēpheta, i a Dāvida, i a Sāmuela ē te au peroveta 'oki.
33Dan 6.1-27Nō te 'irinaki'anga 'oki i pou ei i a rātou te au bāsileia, i 'akatupu ei rātou i te tuatua tika, ē i rauka ai i a rātou tei papa'u'ia mai. Kua tāpiri rātou i te va'a o te au liona,
34Dan 3.1-30kua tāmate rātou i te a'i ma'ata, kua ora rātou i te mata koke ra. I paruparu rātou, kua riro rā 'ei aronga māro'iro'i; 'e au toa ririnui rātou i te tamaki ē kua 'a'ati atura rātou i te au nuku o te au 'enua kē ra.
351 Arik 17.17-24; 2 Arik 4.25-37Nō te 'irinaki'anga 'oki i rauka ai i te au va'ine nā roto i te tū'aka'ou'anga te ora nō tō rātou kōpū tangata i mate.
Ko tēta'i pae i tāmamae'ia kia mate, nō te mea kāre rātou i 'āriki i te tū rangatira i raro nei. I pērā rātou kia rauka i a rātou te tū'aka'ou'anga ki te ora meitaki atu.
361 Arik 22.26,27; 2 Par 18.25,26; Ier 20.2; 37.15; 38.6Ko tēta'i pae i 'āviri'ia ē i pāpā'ia, ko tēta'i pae rā i tāpeka'ia ē i tīria'ia ki roto i te 'are 'āuri.
372 Par 24.21Kua pē'i'ia rātou ki te toka, kua keke'ia i rotopū, ē kua tāmate tākiri'ia ki te koke. Kua 'ā'āere rātou ma te 'a'ao 'ua i te kiri māmoe ē te kiri puakani'o. Kua ngere rātou, kua tā'iro'ia ē kua tākinga kino'ia.
38Kāre 'oki tēianei ao i tau i a rātou! Kua koka 'aere 'ua rātou i te au mēdēbara ē i runga i te au maunga, ē kua no'ono'o i roto i te au ana ē te au va'arua o te 'enua nei.
39'E rongo meitaki tō rātou pou roa nō tō rātou 'irinaki'anga. Kāre rā i rauka i a rātou tei papa'u'ia maira.
40Kua 'akakoro 'oki te Atua i tēta'i mea meitaki atu, ma te ma'ara katoa i a tātou, koia 'oki, ka meitaki rava rātou kia kāpiti katoa'ia atu tātou.
Who We AreWhat We EelieveWhat We Do
2025 by iamachristian.org,Inc All rights reserved.
