2 Ioane 1 - Cook Island Maori Revised New Testament(CIMRNT)

Te aro'a'anga ē te pure

1Ko Ioane, te tangata pakari, ki te 'ēkālēsia 'iki'ia ē tē au mema i roto i aia tāku e aro'a tika tikāi atu nei. Ē kāre ē ko au anake, ko te aronga katoa rā tei 'āriki na i te tuatua mou.

2Nā te tuatua mou 'oki e no'o nei i roto i a tātou ē ka no'o ia i rotopū i a tātou e tuātau 'ua atu.

3Kia 'ōronga 'ua mai te Atua te Metua ē Iēsū Mesia te Tamaiti a te Metua, i te aro'a 'ua, te tākinga meitaki e te 'au ki a tātou; kia rauka tēia i a tātou nā roto i te tuatua mou ē te aro'a.

Te tuatua mou ē te aro'a

4Kua rekareka ma'ata rava au i tōku kite'anga i ēta'i o tā'au tamariki i te 'ākono'anga i te tuatua mou, mei tei tau ki te 'akaue'anga tā mātou i 'āriki ana nō kō mai i te Metua ra.

5Ioa 13.34; 15.12,17I tēianei tē pati atu nei au ki a koe, e aro'a tātou tēta'i ki tēta'i. Kāre au e tātā i tēia ki a koe mei tēta'i 'akaue'anga 'ōu. Tei a tātou rāi ia mei muatangāna maira.

6Ē ko tēia 'oki te aro'a: kia 'ākono tātou i tāna au 'akaue'anga. Ko tēia 'oki te 'akaue'anga tā kōtou i 'akarongo ana mei te 'akamata'anga maira: e 'ā'āere kōtou i roto i te aro'a.

7'E mānganui te aronga i roto i tēianei ao tei arataki kē i te tangata ma te kore e 'a'aki ē, kua 'aere ā tangata mai a Iēsū Mesia. Ko rātou 'oki te pikika'a ē te pāto'i Mesia.

8E matakite kia kore kōtou e ngere i te 'ua o tā mātou 'anga'anga, kia rauka rā i a kōtou te tūtaki kātoatoa.

9Ko tei kore e tinamou i te 'āpi'i'anga o te Mesia, ē tei 'akatūkē rā i te reira, kāre tei aia te Atua. Ko tei tinamou rā i tāna 'āpi'i'anga, tei aia 'oki te Metua ē te Tamaiti.

10Mē tē 'aere mai nei tēta'i tangata ki a kōtou ē kāre aia e 'apai mai i tēia 'āpi'i'anga, auraka e 'ō'ō mai i aia ki roto i tō kōtou ngutu'are ē auraka katoa e aro'a atu i aia.

11Ko te tangata 'oki tei aro'a atu i aia tē kāpipiti nei ia ki tāna 'anga'anga kino.

Te ve'eve'e'anga aro'a

12'E mānganui te au mea tei tau i te 'akakite atu ki a kōtou, kāre rā au e 'inangaro i te tātā i te reira ma te 'inika ki runga i te pēpa. Tē manako nei rā au i te 'ārāvei i a kōtou, kia tuatua va'a tātou tēta'i ki tēta'i, kia meitaki rava atu tō tātou rekareka'anga.

13Tē aro'a atu nei te au mema o tēia 'ēkālēsia 'iki'ia i a kōtou na.