Philipi 4 - Cook Island Maori Revised New Testament(CIMRNT)

Tā kōtou i 'āpi'i'ia ra, e rave i te reira

1Nō reira, e aku au taeake, tei 'akaperepere'ia ē tei mā'ara'ara pakari'ia e au, ko taku rekareka'anga ē taku korōna, kia ngāueuekore kōtou i tō kōtou piri'anga ki te 'Atu, e aku au taeake 'akaperepere'ia ē.

2Tē ako atu nei au i a Euōdia ē tē ako katoa atu nei au i a Sunetuke kia 'okota'i rāi ō rāua ngākau nō te 'Atu 'oki.

3Ē tē pati katoa atu nei au ki a koe, e taku 'oa mou, e tauturu koe i ēia ngā va'ine. Tei rave kāpiti 'oki mātou i te 'anga'anga 'ēvangelia nei ma Kalemeno ē tēta'i pāpāki 'oa rave 'anga'anga nōku ra, ko tei tātā'ia tō rātou ingoa i roto i te puka ora ra.

4E rekareka kōtou i te 'Atu ra, 'aua e tīvata. Tē 'akakite 'aka'ou atu nei au ē, e rekareka kōtou.

5Kia kitea'ia tō kōtou tū marū ki te tangata kātoatoa. Kāre e roa ka tae mai te 'Atu!

6Auraka kōtou e apiapi i tēta'i 'ua atu mea, e 'akakite 'ua rā i tō kōtou ngere'anga ki te Atua i roto i tā kōtou au pure ē te au pati'anga rava rāi ma te 'akameitaki'anga.

7Ē tō te Atua 'au, tei ma'ata atu tāna rāvenga i tā te manako tangata, ka 'akatinamou ei i te māro'iro'i o tō kōtou ngākau ē tō kōtou manako i roto i te Mesia ko Iēsū.

8'Ei tā'openga, e aku au taeake ē, e manako 'ua kōtou i te mea mou ē te tau meitaki, te mea tika ē te 'apakore, te mea taurekareka ē te rongo meitaki, koia 'oki te mea 'e tū meitaki tōna ē te tika kia 'akameitaki'ia.

9E rave i tā kōtou i 'āpi'i'ia atu ē tā kōtou i mou ra nō kō nei atu i āku nei, mē nā roto i tā kōtou i 'akarongo, mē kāre, nā roto i tā kōtou i kite. Ē ka no'o i reira te Atua o te 'au ki ō kōtou na.

Tō Paulo 'akameitaki'anga i tō Philipi nō tā rātou tauturu

10'E rekareka ma'ata tōku i roto i te 'Atu, i te mea ē, 'e rāvenga 'aka'ou tā kōtou i te 'akaāri mai i tō kōtou ma'ara'anga mai i āku i muri ake i tēta'i tuātau roa. Kua ma'ara mai rāi kōtou i āku, kāre rā ā kōtou rāvenga i te 'akaāri mai i te reira.

11Kāre nō te ngere i tuatua atu ei au, nō te mea, kua 'akamātau au i āku kia no'o pōnuiā'au i te au mea rava rāi i roko'ia mai ei au nei.

12Kua kite au i te ngere'anga i tōku ora'anga ē kua kite katoa au i te ma'ata roa o tāku 'apinga. I te au ngā'i kātoatoa ē i te au 'ati'anga rava rāi, kua kite au ka 'akapē'ea au i te merengo ē te pongi, i te ra'i roa'anga ē te meangiti roa'anga.

13'E rauka i āku te au mea rava rāi nā roto i te Mesia tei 'akamāro'iro'i mai i āku nei.

14'E meitaki rā te mea tā kōtou i rave i te piri'anga mai ki tōku nei tūmatetenga nā roto i tā kōtou tauturu.

15E tō Philipi na ē, kua nakiro 'oki kōtou ē, i te 'akamata'anga te 'anga'anga 'ēvangelia i rotopū i a kōtou na, ka 'akaruke atu ei au i a Mākedōnia, kāre rava tēta'i 'ēkālēsia i piri mai ki āku i te pae o te 'ōronga atu ē te 'ōronga mai, māri rā ko kōtou anake.

16Anga 17.1

2 Kōr 11.9Ē i tōku no'o'anga i Tēsālōnia, kua 'akaū mai kōtou i te 'apinga nōku i tōku ngere'anga, ē kua 'akaū 'aka'ou mai rāi.

17Tē mataora nei tōku ngākau i te 'apinga 'ōronga'ia. 'E tika rāi. Tē mataora ma'ata atu nei rā au nō te tupu'anga o te pu'apinga nō kōtou.

18Exo 29.18Kua rauka mai i āku te au mea katoa tāku i ngere, ē kua ma'ata 'ua atu rāi. Kua rava roa tāku, i te mea, kua rauka mai i āku te tauturu tā kōtou i 'akaū mai nā roto i a Ēpāperodito. Kua riro te reira mei te 'ātinga kakara ma'ata ki te Atua, 'e mea tau ē te mareka'ia.

19Ē te au mea kātoatoa ra tei umuumu'ia e kōtou, nā taku Atua e 'ō mai i te reira ki a kōtou nō kō mai i tōna 'apinga nui pāpānunui nā roto i te Mesia ra i a Iēsū.

20'Ei te Atua tō tātou Metua te kakā e tuātatau 'ua atu. Āmene.

Te ve'eve'e'anga aro'a

21E aro'a atu kōtou i te aronga tapu rava rāi i roto i te Mesia ra i a Iēsū. Tē aro'a atu nei 'oki te au taeake ōku nei i a kōtou.

22Tē aro'a katoa atu nei te aronga tapu rava rāi i a kōtou, 'e ma'ata atu rā tō te ngutu'are o Kaisara nei.

23'Ei tō kōtou vaerua te aro'a 'ua o tō tātou 'Atu ra ko Iēsū Mesia.