'Anga'anga 20 - Cook Island Maori Revised New Testament(CIMRNT)

Te tere o Paulo ki Mākedōnia ē Ākaia

1E papa akera taua keu'anga ma'ata ra, kua 'akaputuputu maira a Paulo i te au pipi ki aia e 'akamāro'iro'i atura i a rātou, aro'a 'openga atura, e 'akaruke maira i a rātou e 'aere ki Mākedōnia.

2E oti akera i aia i te 'aere nā roto i taua tu'anga 'enua ra ē te 'akamāro'iro'i atu i te au taeake ma te au ako'anga 'e mānganui, kua tae atura aia ki Ākaia.

3Kua no'o i'ora aia e toru marama ki reira. Nō te mea 'oki ē, kua moetāpapa mai te Ngāti Iūda i aia kia vaitata aia i te tere atu ki Sūria, kua manako i'ora aia ē, e 'oki aia nā Mākedōnia.

4Kua kāpiti maira ki aia a Sōpātero rāua ko Puro nō Bērea mai, ko Ārīsetāreko rāua ko Sēkunedo nō Tēsālōnia mai, ko Gāio nō Dērebe mai ē ko Tīmōteo 'oki, ē ko Tūkiko rāua ko Terōphimo nō Āsia mai.

5Kua tere atura rātou nā mua e tāpapa maira i a mātou i Tēroa.

6Ko mātou rā, kua tere atura mātou i muri ake i te au rā o te Kai 'Aka'ōpuekore'ia mei Philipi atu, e pō rima akera, kua tae atura mātou ki Tēroa ra. Ē kua no'o atura mātou i reira e pō 'itu akera.

Tō Paulo no'o'anga 'openga i Tēroa

7E tae akera ki te rā mua o te 'ebedoma ra, i tō mātou putuputu'anga mai nō te vāvā'i'anga varāoa, kua ako atura a Paulo ki te au taeake. Nō te mea 'oki ē, ka 'akaruke mai aia i a rātou i tērā mai rā, kua tāmou mārie atura aia i te ako'anga atu ē tūruā'ipō akera.

8'E mānganui 'oki te au lāmepa i roto i taua pi'a i runga ra i putuputu ei mātou.

9Tē no'o 'ua ra tēta'i tangata 'ōu, ko Eutiko te ingoa, i runga i te patu māramarama, ē kua varea ma'ata'ia aia e te moe nō te roa 'oki i tā Paulo ako'anga. Moe tīnainai atura aia ē kua topa i'ora aia mei te toru mai o te ta'ua ki raro. Kua mate tākiri rava aia i tō rātou rave'anga mai i aia.

10Kua 'eke atura a Paulo ki raro, tīpapa i'ora ki runga a'o i aia, tākave atura. “Auraka ana kōtou e auē,” i nā Paulo ei, “tē vai nei rāi te ora i roto i aia.”

11Kua kake 'aka'ou atura aia ki runga, vāvā'i i'ora i te varāoa, e kai i'ora. Kua tuatua roa 'aka'ou atura aia e tae 'ua atura ki te māmāiāta, e 'akaruke maira aia.

12Kua takina'ia i'ora taua tangata 'ōu ra ki te kāinga, ē kua ora rava aia; ē kua mareka rava akera rātou.

Te tere mei Tēroa atu ki Mīleto

13Kua 'aere 'ua atura mātou nā mua ki runga i te pa'ī, e tere atura ki Aso nō te 'akakoro'anga i te rave mai i a Paulo i reira. Nāna rāi i 'akaue mai kia 'akapērā, i 'inangaro 'oki aia 'ua'orāi i te 'aere'aere 'ua nā uta ki reira.

14Ē kia 'ārāvei mai aia i a mātou i Aso, kua rave i'ora mātou i aia, ē 'aere atura ki Mitulene.

15Mei reira atu, i tere atura mātou e ao akera nā te pae atura i a Kio, ē ao 'aka'ou akera, kua tāpiri atura mātou ki Samo, ē i tērā mai rā, tae atura mātou ki Mīleto.

16Kua manako ana 'oki a Paulo ē, 'eia'a ē nā Ēphēsia kia tere atu kia kore aia e tāvare i Āsia, nō te mea, tē rapurapu ra 'oki aia kia roko'ia atu e ia te rā Penetekote i Iērūsalēma ra, mei te mea ē ka rauka.

Tō Paulo poroporoaki'anga atu ki te aronga pakari o Ēphēsia

17Kua unga atura a Paulo i te karere ki Ēphēsia mei Mīleto atu, e tiki i te aronga pakari o te 'ēkālēsia ra.

18E tae mai rātou ki aia, kua karanga atura aia ki a rātou,

“Kua mārama kōtou i te tū o tōku no'o'anga i ō kōtou nei i te au tuātau kātoatoa mei te rā mua mai ka tae mai ei au ki Āsia nei,

19i te tāvini'anga i te 'Atu ma te ngākau 'aka'aka roa, ē ma te roimata i roto i te au manamanatā tei 'akatupu'ia mai ki āku nei, ē te moetāpapa'anga'ia e te Ngāti Iūda ra.

20Kua kite katoa 'oki kōtou ē, kāre rava au i 'akaruke i te 'akakite atu ki a kōtou i tēta'i 'ua atu mea e meitaki ei kōtou na; ē kua 'āpi'i atu au i a kōtou i mua i te kātoatoa i tērā 'are ē i tērā 'are,

21ma te umuumu pakari atu i te Ngāti Iūda ē pērā katoa te Eleni, kia 'āriu mai rātou ki te Atua ē kia 'irinaki rātou i tō tātou 'Atu ko Iēsū.

22Inā, tē 'aere nei au i tēianei ki Iērūsalēma ma te arataki'ia e te Vaerua, ē kāre au e kite ē, 'e a'a te ka tupu mai ki āku i reira,

23māri rā, ko tā te Vaerua Tapu i 'akakitekite 'ua mai ki āku i tērā 'ōire ē i tērā 'ōire, ē tē vai ra te 'are 'āuri nōku ē te mate ma'ata.

242 Timo 4.7Inārā, i tōku manako'anga, kāre 'e pu'apinga tōku ora'anga, māri 'ua, kia 'akaoti 'ua au i tāku 'anga'anga, ē kia 'ākono au i te tao'onga tei rauka mai i āku mei kō mai i te 'Atu ra ko Iēsū: koia 'oki, kia 'akakite 'ua atu au i te tuatua meitaki o te aro'a 'ua o te Atua.

25“Ē inā, kua 'ā'āere atu ana au ki rotopū i a kōtou i te tūtū 'aere'anga i te bāsileia, 'e mea pāpū rā i āku i tēianei ē, kāre tēta'i o kōtou kātoatoa nei ē 'ākara 'aka'ou mai i tōku nei mata.

26Nō reira, tē 'akakite 'ua atu nei au ki a kōtou i tēianei rāi rā ē, tē ti'amā nei au i te mate o te tangata kātoatoa ra,

27kāre rava 'oki au i 'akaruke 'ua i te 'akakite atu ki a kōtou i te au anoano rava rāi o te Atua.

28E tiaki meitaki i a kōtou 'ua'orāi ē te 'ānana katoa; nā te Vaerua Tapu 'oki i tuku mai i a kōtou ki runga a'o i te reira 'ei au arataki. E 'ākono meitaki i te 'ēkālēsia a te 'Atu, ko tā Iēsū i rauka mai nā roto i tōna 'ua'orāi toto.

29Kua kite 'oki au ē, i muri ake i tōku 'akaruke'anga atu, ka 'aere mai te au luko tā'ae ki rotopū i a kōtou na, ē kāre rātou e 'akaperepere i te 'ānana.

30Ē nō roto mai 'oki i a kōtou 'ua'orāi, ka tū mai ēta'i tangata ki runga e 'āpi'i mai i te tuatua mingimingi kia āru'ia atu rātou e te au pipi.

31Nō reira, kia matakite, e 'akama'ara kōtou ē, e toru ake nei ōku mata'iti ē kāre au i tīvata i te ako atu i te tangata rava rāi e pini 'ua ake, i te pō ē te ao, ma te roimata.

32“Ē i tēianei, tē tuku atu nei au i a kōtou ki te Atua ē ki te karere o tōna aro'a 'ua, ko tei tika i aia i te 'akamātūtū i a kōtou ē i te 'ōronga mai i te tu'anga nā kōtou ē te aronga rava rāi i 'akatapu'ia.

33Kāre tākiri au i noinoi atu ana i te 'ārio, te 'auro ē te kāka'u o tēta'i 'ua atu tangata.

34Kua kite 'oki kōtou ē, nā tēia ngā rima nei i 'anga'anga kia rauka mai te au mea i umuumu'ia nōku nei, ē nō rātou tei kāpiti mai ki āku nei.

35Nā roto i te au rāvenga rava rāi i 'akaāri'ia atu ana e au ki a kōtou na, kia tauturu kōtou i te aronga 'āpikepike e tikāi nā roto i te 'anga'anga mei tērā te tū; ē kia 'akama'ara katoa 'oki kōtou i te tuatua a te 'Atu kō Iēsū, tāna i 'akakite atu ē, ‘'E ngari ake te 'ōronga atu i te 'āriki 'ua mai.’ ”

36E oti akera tēianei tuatua'anga, kua tuturi i'ora a Paulo ki raro, kua pure i'ora aia ma rātou kātoatoa.

37Auē ma'ata i'ora rātou rava rāi, tākave maira ki runga i te kakī o Paulo, ē kua 'ongi maira i aia.

38'E tūmatetenga ma'ata rava tō rātou nō te tuatua 'oki tāna i 'akakite mai ki a rātou ē, kāre rava rātou e kite 'aka'ou mai i tōna mata. Kua āru atura rātou i aia, e tae 'ua atu ki te pa'ī.