Luka 7 - Cook Island Maori Revised New Testament(CIMRNT)

Tē 'akaora nei a Iēsū i te tāvini o te rangatira 'ānere(Mātaio 8.5-13; Ioane 4.43-54)

1Ē kia 'akaoti akera a Iēsū i tāna tuatua kātoatoa ki roto i te taringa o te 'iti tangata, tomo atura aia ki roto i a Kāperenāuma.

2Kua roko'ia te tāvini tūmanava o tēta'i rangatira 'ānere e te maki, ē kua vaitata i te mate.

3I tōna 'akarongo'anga i a Iēsū, kua unga atura aia i ēta'i aronga pakari o te Ngāti Iūda ki a Iēsū ma te pati atu kia 'aere mai e 'akaora i tōna tāvini.

4E tae atura rātou ki a Iēsū ra, kua pati 'akatenga atura rātou ki aia, nā kō atura, “'E tangata tau aia kia rave koe i te reira nōna,

5nō te mea, e aro'a 'oki aia i tō tātou 'iti tangata, ē nāna i 'akatū i te sūnago nō mātou.”

6Kua 'aere maira a Iēsū ē ko rātou katoa. E āvaitata i'ora aia ki taua 'are ra, kua tono atura taua rangatira 'ānere ra i ēta'i 'oa e karanga atu ki aia ē, “E te 'Atu, 'eia'a koe e tāmanamanatā, nō te mea, kāre au e tau kia tomo mai koe ki roto i taku 'are.

7Nō reira 'oki i manako au ē, kāre e tau i āku 'ua'orāi kia 'aere atu ki a koe na. E karanga 'ua mai rā koe i tēta'i tuatua, ka ora'ia tōku tāvini i reira.

8Ko au katoa nei 'oki 'e tangata i raro ake i a ēta'i kē, 'e au va'e'au rāi tō raro ake i āku. Ē tē 'akakite nei au ki tēta'i, ‘E 'aere atu,’ tē 'aere atu aia, ē ki tēta'i, ‘E 'aere mai,’ ē tē 'aere mai nei aia, ē ki taku tāvini, ‘E rave koe i tēia,’ ē tē rave nei aia i te reira.”

9I tōna 'akarongo'anga i te reira, vā 'ua i'ora a Iēsū ki aia, ē kua 'āriu atura aia ki te tangata tini i āru mai i aia, nā kō atura, “Tē karanga atu nei au ki a kōtou nei, kāre rāi au i kite i tēta'i 'irinaki'anga mei tēia te ma'ata i Īserā'ela nei!”

10Ē kua 'oki maira taua aronga tei tonokia ra ki te kāinga. Kitea maira taua tāvini ra, kua ora.

Tē 'akatū nei a Iēsū i te tamaiti a te va'ine taka'ua i Nāina

11Ē i te rā i muri mai, 'aere atura a Iēsū ki roto i tēta'i 'ōire, ko Nāina te ingoa. Ē kua 'aere katoa atura tāna au pipi ē te tangata tini 'e mānganui.

12E vaitata atura aia ki te ngūtupa o taua 'ōire ra, ē inā, tē 'apai'ia maira tēta'i mate ra ki va'o, 'e tamaiti 'ānau ta'i nō tōna metua va'ine, 'e taka'ua 'oki aia. Ē 'e urupū ma'ata tō taua 'ōire ra i āru mai i aia ra.

13Ē kia 'ākara atura te 'Atu i taua va'ine ra, tangi atura i aia, ē kua karanga atura ki aia, “Auraka e auē.”

14Kua 'akavaitata atura aia, 'āmiri atura i te pā'ata ē kua tū i'ora te aronga i 'apai ra. Ē kua karanga atura aia, “Tēianei tangata 'ōu, tē karanga atu nei au ki a koe: e tū ki runga!”

15Ē kua no'otū maira taua tangata mate ra ē kua 'akamata i te tuatua. Kua tuku atura a Iēsū i aia ki tōna metua va'ine ra.

16Roko'ia kātoatoa i'ora rātou e te mataku, ē 'akakakā atura i te Atua, nā kō akera, “'E peroveta ma'ata tei kitea i rotopū i a tātou nei. Ē kua 'ātoro mai te Atua i tōna 'iti tangata.”

17E tutuki atura taua rongo nōna ra i Iūdea rava rāi ē te 'enua e pini rava ake.

Ngā karere nō kō mai i a Ioane Bāpetīto(Mātaio 11.2-19)

18Kua 'akakite atura te au pipi a Ioane ki aia i tēia au mea katoa nei. Kua kāpiki maira a Ioane i e tokorua pipi āna ra,

19kua 'akaunga atura ki te 'Atu ra, e ui ki aia ē, “Ko koe āinei te ka tae mai? Ē ko tēta'i kē āinei tā mātou e tāpapa atu?”

20E tae atura aua ngā tangata ki a Iēsū ra, kua karanga atura rāua, “Nā Ioane Bāpetīto i tono mai i a māua ki a koe e ui ki a koe ē, ‘Ko koe āinei te ka tae mai? Ē ko tēta'i kē āinei tā tātou e tāpapa atu?’ ”

21I taua taime rāi tē 'akaora ra a Iēsū i te aronga 'e mānganui i tō rātou au maki, te au mate ē te au vaerua kino; ē tē 'akapu'era ra aia i te au mata o te au matapō 'e mānganui.

22a: Isa 35.5,6; b: Isa 61.1Kua pa'u atura a Iēsū ki a rāua, nā kō atura, “Ka 'aere kōrua, e 'akakite ki a Ioane i te au mea tā kōrua e kite nei ē tā kōrua e 'akarongo nei: tē kite nei te matapō, tē 'aere nei te pirikoki, tē tāmā'ia nei te lēpera ē tē 'akarongo nei te turi, tē 'akatū'ia nei te mate ē tē tūtū 'aere'ia te tuatua meitaki ki te tangata rikiriki.

23Ē 'e ao tōna ko tē kore e maitu i āku nei.”

24Ē kia riro ngā karere a Ioane ra, kua 'akamata a Iēsū i te tuatua ki te tangata tini ra i a Ioane, “I 'aere kōtou ki te mēdēbara ra i te 'ākara i te a'a? I tēta'i kāka'o tākirikiri'ia e te matangi?

25I 'aere rā kōtou e 'ākara i te a'a? I tēta'i tangata i te kāka'u'anga i te kāka'u marū? Inā 'oki, te aronga e kāka'u i te kāka'u mānea ē tē no'o i te ora'anga meitaki rava, tei te 'are ia o te 'ui ariki.

26I 'aere rā kōtou e 'ākara i te a'a? I tēta'i peroveta? Koia ia, ē tē 'akakite atu nei au ki a kōtou, 'e ma'ata roa aia i te peroveta.

27Mal 3.1Ko Ioane 'oki tēia, nōna te tuatua i tātā'ia ra ē, ‘Inā, e 'akaunga au i tāku karere nā mua i a koe, nāna e 'akate'ate'amamao i tō'ou mataara i mua i a koe.’

28Tē 'akakite atu nei au ki a kōtou, kāre atu 'e mea ma'ata atu i a Ioane i rotopū i tā te au va'ine i 'ānau nei. Ko te iti rava rā i te bāsileia o te Atua ra, 'e ma'ata atu ia i a Ioane.”

29 Māt 21.32; Luk 3.12 Nā te tangata kātoatoa tei 'akarongo ē te aronga ko'i tero i 'akatika ana i te tuatua tika a te Atua, nō te mea, kua bāpetīto'ia rātou ki te bāpetīto a Ioane,

30kāreka te au Phārīsea ē te au Pū'āpi'i Ture kua kōpae rātou i tō te Atua anoano nō rātou, nō te mea, kāre rātou i bāpetīto'ia e ia.

31Kua tuatua atu rāi a Iēsū, “Ē tēianei, e 'aka'āite au i te tangata o tēia uki nei ki te a'a? 'E 'āite rātou ki a 'ai?

32'E 'āite rātou ki te tamariki e no'o i te ngā'i 'oko'oko'anga ra ē tē kāpiki ēta'i ki ēta'i i te nā kō'anga ē, ‘I 'akatangi atu ana mātou i te vivo ko'e, ē kāre kōtou i 'ura mai; i tūporo atu ana mātou i te pe'e tangi, ē kāre kōtou i auē mai.’

33Nō te mea, i 'aere mai nei a Ioane Bāpetīto ma te kaikore i te mānga ē te inukore i te uaina, ē tē karanga nei kōtou ē, ‘'E dēmoni tōna.’

34I 'aere mai nei te Tamaiti a te Tangata nei ma te kaikai ē te inu, ē te karanga nei kōtou ē, ‘Inā, 'e tangata kaikai ma'ata ē te konā kava, 'e taeake nō te aronga ko'i tero ē te aronga 'ara.’

35E 'akapāpū'ia rā te pakari e tāna katoa ra au tamariki.”

Tō Iēsū 'akamā'inu'anga'ia e tēta'i va'ine 'ara

36Kua pati maira tēta'i o te au Phārīsea ra ki a Iēsū, e kai aia i te kai ōna. 'Aere atura aia ki roto i te 'are o taua Phārīsea ra, no'o 'ua atura i te kaingākai ra.

37Māt 26.7; Mār 14.3; Ioa 12.3Ē inā, tēta'i va'ine 'ara i taua 'ōire ra, kite akera aia ē, tē kaikai ra a Iēsū i te 'are o taua Phārīsea ra, kua tao'i maira i tēta'i pi'a 'alabata manongi ra.

38Tū 'ua i'ora aia i muri i tō Iēsū po'o vaevae ma te auē, ē mā'ū'ū akera taua vaevae ra i te roimata, ē 'ōrei i'ora ki tōna rauru, 'ongi'ongi akera, ē 'akatā'inu i'ora i te vaevae ki te manongi.

39Kite akera te Phārīsea i pati mai i a Iēsū i taua mea ra, kua tuatua mai aia i roto i aia 'ua'orāi, nā kō akera, “Nāringa tēianei tangata 'e peroveta, kua kite aia ē ko 'ai tēianei va'ine, e 'āmiri mai nei i aia, ē 'e a'a 'oki tōna tū, 'e va'ine 'ara 'oki aia.”

40Kua tuatua akera a Iēsū ki aia, nā kō atura, “E Simona, 'e mānga tuatua tāku ki a koe na.”

Kua tuatua maira aia, “E tuatua 'ua mai koe, e te Pū'āpi'i.”

41Kua karanga atura a Iēsū, “'E tokorua tangata kaio'u tā tēta'i tangata 'akakaio'u moni: e rima 'ānere moni 'ārio i tā tēta'i, e rima nga'uru i tā tēta'i.

42Nō te mea rā ē kāre rava ā rāua rāvenga 'ei tūtaki atu, 'akakore 'ua atura aia i tā rāua kaio'u. Ē tēnā na, ko 'ai ra i a rāua te ka aro'a ma'ata atu i aia?”

43Kua pa'u maira a Simona, nā kō maira, “Tē manako nei au ē, ko te tangata nāna te kaio'u ma'ata i 'akakore'ia.”

Kua karanga atura a Iēsū ki aia, “Kua tika tā'au tukungā tika.”

44Tē 'āriu atura aia ki taua va'ine ra, kua karanga atura rā ki a Simona, “Tē 'ākara nei koe i tēianei va'ine? I tomo mai nei au ki roto i tō'ou nei 'are, ē kāre koe i riringi mai i te vai ki runga i ōku vaevae; kua 'akamā'u'u rā aia i ōku nei vaevae ma te roimata, ē kua tāmarō ki tōna rauru.

45Kāre koe i 'ongi mai i āku; kāreka aia, kāre rava ake nei i tīvata i te 'ongi'ongi i ōku vaevae mei tōku tomo'anga mai rāi.

46Kāre koe i 'akatā'inu i tōku ūpoko ki te 'akari; kāreka aia, kua 'akamā'inu'inu i ōku vaevae ki te manongi.

47Ē tēianei, e 'akakite atu au ki a koe, i tāna 'ara ma'ata kua 'akakore'ia ia, i ma'ata ai 'oki tōna aro'a. I meangiti rā te aro'a o tei 'akakore'ia te 'ara meangiti ra.”

48Kua tuatua akera a Iēsū ki taua va'ine ra, “Kua 'akakore'ia tā'au 'ara.”

49Kua tuatua akera taua aronga i te kaingākai ra i roto i a rātou 'ua'orāi, “Ko 'ai tēia e 'akakore katoa i te 'ara nei?”

50Kua karanga atura a Iēsū ki taua va'ine ra, “Kua ora koe i tō'ou 'irinaki'anga. E 'aere ma te 'au.”